1 Daudi kawapeta maasikali wake, kawaghola wakale elufu elufu aku wolongotsighwa na iwakulu wawo, na wakale miya miya aku wolongotsighwa na iwakulu wawo.

2 Daudi kawaghola maasikali wake makingili madatu, wamwenga walongotsighwa na Yoabu, na wamwenga walongotsighwa na Abishai, mwana wa Seruya, ndughu yake Yoabu, na wangi walongotsighwa na Itai, Mgiti. Kuya mfalume Daudi kawalongela wose, "Nene nimwenyegho nitsoghenda na mwemwe."

3 Lekeni maasikali wamlongela, "Ghweghwe uleke kulawa kunze kwa ghumji, kwaapfila tung'atsuma, wawo watsakwona si chinu baye. Na inusu ya wanu wetu wang'akomighwa wawo pfipfila watsakwona si chinu baye. Lekeni ghweghwe kuna samani ng'ulu kubita twetwe wanu elufu kumi. Apfo pfinogha ghweghwe usighale, na kutsotwapfila kulawa kuko kuna ghumji."

4 Mfalume Daudi kawalongela, "Chochose chamkona chinogha, nene nitsotenda." Apfo, mfalume kema habehi na lilango aku maasikali wake wolawa kunze kwa miya miya, na kwa elufu elufu.

5 Mfalume Daudi kawalaghitsa Yoabu, Abishai na Itai, "Mtendeleni pfinoghile imsongolo Absalomu, kwaajili yangu." Maasikali wose tsawamuhulika mfalume hayang'ali yowalaghitsa iwakulu wake wa ing'ondo, wamtendele pfinoghile Absalomu.

6 Apfo maasikali wa Daudi waghenda kunyika, wetowa na iwanu wa Isiraeli kuna muhulo ghwa Efuraimu. 7 Imaasikali wa Daudi wawatowa maasikali wa Absalomu. Wanu wengi tsawakomighwa mna litsuwa alyo, na wanu elufu ishilini wakomighwa. 8 Ing'ondo ayo yenela muisi yose, na iwanu iwafile kwa ukughaya mna ghumhulo tsawengi kubita awala iwakomighwe na lipanga.

9 Kuya Absalomu aku kakwila ipunda falasi wake, ketingana na watumighwa wa Daudi. Imnyama ayo hayabitile hasi ha maputila makulu gha mbiki mkulu ghwa mwaloni, baho litwi lya Absalomu lifang'ama mna ghumwaloni. Absalomu kalekighwa kolebela aku ipunda falasi wake yang'ali yoghendelela hambele.

10 Munu yumwenga kamwona, apfo kaghenda kumlongela Yoabu, "Nimwona Absalomu kolebela kuna ghumbiki ghwa mwaloni."

11 Yoabu kamlongela imunu ayo, "Choni? Kumwona Absalomu? Hebali ng'umtowile mbaka yaghwe hasi baye? Tsaning'akwing'ile fetsa shekeli kumi na msipi."

12 Lekeni imunu ayula kamlongela Yoabu, "Hata ka ung'angaile pfihande elufu imwe pfa fetsa tsa sigholosa baye ghumoko nimtowe imwana wa mfalume. Kwaapfila tsatumuhulika hayang'ali yokulaghitsa ghweghwe, Abishai na Itai, hayalongile, ‘Mleke kumlagha imsongolo Absalomu.’ 13 Ka ning'alekile kumtegheletsa mfalume na kumkoma imwanaghe, yeye yang'amanyile chila chinu kwaapfila kuduhu chochose ichipfisika kuna yeye, hata ghweghwe ghumwenyegho ung'anihunduke."

14 Yoabu kamlongela, "Nene sidaha kughendelela kulonga naghwe baye." Baho Yoabu kasola migoha midodo midatu kaghenda kumhoma Absalomu mna ghumoyo. Yoabu hayaghendile kumhoma, kampfika Absalomu yang'ali mgima na kolebela mna liputila lya ghumwaloni. 15 Kuya iwasongolo kumi iwaghalile tsisilaha tsa Yoabu, wamtsunguluka Absalomu, wamtowa na wamalitsila ukumkoma.

16 Apfo Yoabu katowa malati na maasikali wose woya, kwaapfila Yoabu kawaghoma waleke kuwawinza Waisiraeli.

17 Walusola ilukuli lwa Absalomu walwasa mna lipondo kulu kumhulo, kuya walulundikila lundo kulu lya mabwe. Iwanu wose wa Isiraeli watsuma, chila munu ukaye yake.

18 Mna ghamatsuwa gha ugima wake, Absalomu tsakasimika ngutso yake mna lwanda lwa mfalume, kwaapfila tsakalonga, "Nene nahela mwana mmale wa kughendeletsa taghwa lyangu ili wang'umbuke." Ingutso ayo tsakaing'a taghwa lyake, mbaka leloli yokemighwa, "Ngutso ya Absalomu."

19 Kuya Ahimaasi mwana wa Sadoki kamlongela Yoabu, "Leka nitsume kwa mfalume nikamlongele ka IMNDEWA kamkombola kulawa kwa maadui tsake."

20 Naye Yoabu kamlongela, "Leloli ng'ughenda baye kumlongela imbuli ayo. Kodaha kumlongela imbuli ayo tsuwa lingi, lekeni si leloli baye, kwaapfila imwana wa mfalume kakomighwa."

21 Apfo Yoabu kamlongela munu yungi Mkushi, "Ghweghwe ghenda ukamlongele mfalume aghala ghowonile." Mkushi kamwinamila Yoabu kuya katsuma koka.

22 Kuya Ahimaasi mwana wa Sadoki kamlongela keli Yoabu, "Leka lyolyose lilawile, nokulomba undeke nimtsumile Mkushi ayula!" Yoabu kamlongela, "Mwanangu, hebali ubama utsume? Ghweghwe ng'utsopata chinu chochose baye kwa imbuli ayo yaubama kughala!"

23 Ahimaasi kamwidika, "Ghweghwe leka lyolyose lilawile, nene notsuma." Apfo Yoabu kamlongela, "Tsuma uke!" Baho Ahimaasi katsuma kang'ila inzila ya kunyika kambita Mkushi ayula.

24 Daudi tsakakala haghatighati ha ghamalango gha ghumji, lya mghati na lya kunze. Na imkalitsi wa lilango tsakadina mchanya mwa ubanda. Hayenule tsinenge tsake yalole, kona imunu kayeka kotsuma. 25 Imkalitsi ayo kamlongela mfalume imbuli ayo kwa kukemelela. Naye mfalume kedika kalonga, "Ka kayeka kana mbuli inoghile ya kutulongela." Imunu ayula kaghendelela kusoghela habehi.

26 Imkalitsi kamwona keli munu yungi kotsuma, kamkemelela mkalitsi wa lilango kamlongela, "Lola munu yungi kotsuma yaliyeka!" Baho mfalume kalonga, "Naye pfipfila koghala mbuli inoghile ya kutulongela." 27 Mkalitsi ayula kalonga keli, "Nakona ayula iyamlongolele miyaghe kotsuma ka Ahimaasi imwana wa Sadoki." Mfalume kalonga "Imunu ayo kanogha, kotughalila mbuli inoghile."

28 Ahimaasi kamdalamkila mfalume, kalonga, "Chila chinu chinogha." Kenama hambele ha mfalume mbaka uhanga wake udonza hasi, kalonga, "Yenulighwe IMNDEWA, Imulungu wako, iyakukombole kulawa kwa iwanu awala iwenule ghamoko ghawo wakutowe ghweghwe, mkulu wangu mfalume." 29 Mfalume kamghutsa, "Pfihi imsongolo Absalomu kamgima?" Ahimaasi kedika, "Yoabu hayanitumile nene mtumighwa wako tsambona tsogho kulu lekeni tsasimanyile baye kulawile choni."

30 Mfalume kamlongela, "Wime aho hambalimbali." Apfo Ahimaasi kasoghela hambalimbali, kema baho.

31 Kuya Mkushi ayula kapfika naye kalonga, "Mkulu wangu mfalume, tegheletsa mbuli inoghile kulawa kuna nene. Leloli IMNDEWA kakukombola kulawa kwa awala wose iwenuke wakutowe."

32 Mfalume kamghutsa, "Pfihi imsongolo Absalomu kamgima?" Mkushi kalonga, "Maadui tsako, ghwe mkulu wangu mfalume, na wose iwakwinuka wakutendele ghehile, nabama nene chiwalawile achila ichimlawile imsongolo Absalomu."

33 Babo mfalume kona usungu sideke, kadina kuna ichiheleto ichikalile mchanya mwa lilango lya kujilo. Hayang'ali yodina yang'ali yolila na kulonga, "Wenye ghwe! Mwanangu Absalomu! Ghwe mwanangu! Mwanangu Absalomu! Ng'apfu ning'afile nene, ghweghwe ukale! Wenye ghwe, Absalomu mwanangu! Mwanangu ghwe!"