1 Daudi kamwimbila IMNDEWA wila auno mna litsuwa alila ahala IMNDEWA hayakombole kulawa mna maadui tsake na kulawa mna Ghamoko gha Sauli.

2 Tsakemba, IMNDEWA ka bambalawe lyangu,

ngome yangu na mkombola wangu.

3 Imulungu wangu ka bambalawe lyangu,

kuna yeye nene notsumila,

ngawo yangu, membe ya ukombotsi wangu.

Kuna yeye nene nepfisa,

kuna yeye nene notsumila,

yeye mkombotsi wangu

konikombola kulawa kwa iwanu waghobo.

4 Nokukemelela ghweghwe IMNDEWA,

ghweghwe yutunyighwa.

Unikombole kulawa kwa maandui tsangu.

5 Mana ghamawimbi gha ichifo tsaghanitsunguluka,

ghamafuriko ighehile ghanitenda nipfuke.

6 Mitsabi ya kutsimu tsa initsunguluka,

imitegho ya ichifo tsainitsila.

7 Mna ukughanzika kwangu nimkemelela IMNDEWA,

tsanimkemelela Imulungu wangu.

Kulawa kuna ing'anda yake kahulika litsi lyangu,

maghutwi ghake ghahulika ghendo ichililo changu.

8 Baho isi yose ighudema, ihighisika,

imikwalambatsa ya kulanga nayo ihighisika, ighudema

kwaapfila Imulungu kaghudubuka.

9 Liyosi lidusuka kulawa mna tsimula tsake,

lilambi ililakatsa lilawa mna ghumlomo ghwake

ghamakala gha ghumoto ghatananuka kulawa kuna ghumlomo ghwake.

10 Kadegha lilanga,

kahulumka hasi,

na libingu titu likala hasi ha ghamaghulu ghake.

11 Kakwila mna ichiumbe iyakemighwe kelubi, kaghuluka,

na koneka mna libeho ka kana mabawa.

12 Chisi chikulu chimghubika,

ghamabingu matsito ghana ghamatsi pfaghoghubika kulanga.

13 Lumwesa lulawila hambele hake,

na lilambi lilawila mna ghamakala gha ghumoto.

14 IMNDEWA kaduma kulanga,

litsi lya ayula iyali kuchanya ng'ani lihulikika.

15 Kawasila imishale,

kawapwililisa,

na ilumwesa lwake nalwo luwatenda watsume.

16 IMNDEWA hayawakembele, kwa muhe ghwa tsimula tsake,

kuhisihisi ghendo kwa ibahali kughubulighwa,

na imikwalambatsa ya isi yoneka.

17 Yeye Imulungu kahulumka hasi kulawa kulanga,

kanikinda kwa ghumoko ghwake,

kanipfabula kulawa mna ghamatsi ighaghendese.

18 Kanikombola kulawa kuna adui yangu yana ingupfu,

na kulawa kwa awala iwanihile,

kwaapfila wawo tsawana ngupfu kubita nene.

19 Haning'ali nighaya wawo wanipfingilila,

lekeni yeye IMNDEWA yuyo iyanikingile.

20 Kanisola kanyika hanu hana ugima,

kanikombola kwaapfila yeye konoghelwa na nene.

21 IMNDEWA kanighweka kwa kulola aghala ighanoghile ghanitendile,

na kangaya kwa kulola apfila ghamoko ghangu pfaghelile.

22 Kwaapfila tsaniwinza malaghitso gha IMNDEWA,

wala sitendile ghehile baye kwa ukumleka Imulungu.

23 Tsang'inda malaghitso ghake ghose, wala silekile baye kukinda imiko yake.

24 Tsanikala nahela totso hambele hake,

tsanikinga nimwenyegho ndeke kutenda ghehile.

25 IMNDEWA kanighweka kwa kulola aghala ighanoghile ghanitendile,

kwaapfila tsakambona nene nyela hambele ha tsinenge tsake.

26 Ghweghwe kotogholighwa kwa awala iwotogholighwa,

kunogha kwa awala iwanoghile.

27 Ghweghwe kwenzeluka kwa awala iwenzeluke,

lekeni iwanu iwehile ng'uwonela libatsi baye.

28 Ghweghwe kowakombola iwanu ing'aweghoda,

lekeni nenge tsako tsowalolesa iwanu iweghoda uwahulumse hasi.

29 Ghweghwe, IMNDEWA kwa tala yangu,

komwemwesa hana ichisi changu.

30 Kwa ingupfu yaungaya, nene nowatowa maadui tsangu,

kwa ingupfu ya Imulungu wangu, nene nodaluka ubanda.

31 Chochose chautenda ghweghwe Imulungu chinogha,

ghaulonga ghose gholongesa,

ghweghwe kwa ngawo kwa awala wose iwokutsumilila.

32 Lelo nani iyali Imulungu ka si yeye IMNDEWA baye?

Nani iyali bambalawe lya ugima ka si yeye Imulungu wetu?

33 Imulungu yuyo ngome yangu ina ingupfu,

naye koitenda inzila yangu iwe na ugima.

34 Koitenda imighulu yangu iwe na ngupfu ka mighulu ya dondolo,

na konitenda nime ghendo mna ipfidunda.

35 Konifunda ukwitowa ing'ondo,

na ghamoko ghangu ghadaha ukukwegha iminde ya shaba.

36 Kungaya ingawo yako ya ukombotsi,

kunitenda nene niwe mkulu kwa apfila pfaunyapfile.

37 Kuitenda inzila yangu iwe ghatsi, wala ghamaghulu ghangu ng'aghateletse baye.

38 Niiwainzilitsa maadui tsangu na kuwakoma,

sibwelile baye kuchughu mbaka hanimalitse ukuwakoma wose.

39 Niwadugha ghendo, na waghwa hasi ha ghamaghulu ghangu.

Na ng'awadahile baye ukwinuka keli.

40 Kungaya ingupfu ya ukwitowa ing'ondo,

na kuwatenda maadui tsangu wanyinamile.

41 Kuwatenda maadui tsangu watsume,

niwakoma awala wose iwanyihile.

42 Tsawambama imunu wa kuwapfila lekeni tsakuduhu imunu wa kuwakombola,

wamkemelela IMNDEWA lekeni ng'awedike baye.

43 Niwahonda honda wawa ka timbwisi,

na niwabayugha ka kododo lili mnzila.

44 Kunikombola kulawa kwa iwanu wangu iwanilemile,

kunisaghula niwalongotse iwanu wa isi tsingi,

iwanu yang'asiwamanyile sambi wonisang'anila.

45 Iwagheni hawahulike tsimbuli tsangu watsa kwinama hambele hangu,

nawo wanitegheletsa.

46 Wose tsawatenyuka ghendo,

walawa kuna tsingome tsawo, watsa kuna nene aku woghudema.

47 IMNDEWA ka mghima! Yatunyighwe bambalawe lyangu!

Yenulighwe Imulungu wangu,

bambalawe linikombole.

48 Yeye yuyo iyowoyitsila ghehile iwanu awala iwanitendele ghehile,

yeye yuyo iyoweka iwanu wa isi tsingi wawe hasi hangu.

49 Kanikombola kulawa kwa maadui tsangu,

kunyinula mchanya mwa awala iwonyihila,

na kunikombola kulawa kwa iwanu iwaghobo.

50 Apfo ghweghwe, ghwe IMNDEWA,

nitsokutunya kuna iwanu wa isi tsingi,

nitsakwimba nilitunye litaghwa lyako.

51 Yeye komwaapfila mfalume wake yahume,

yeye komtendelela uluso mbakighwa mapfuta wake.

Ona, komtendela uluso Daudi na ilukolo lwake lwose matsuwa ghose.