1 Kuya iwanu wa makabila ghose gha Isiraeli wamghendela Daudi ako Hebroni wamlongela, "Lola, twetwe twa ndughu tsako ghendo. 2 Ghumwande, Sauli hayang'ali mfalume wetu, ghweghwe yuyo yuwalongotse Waisiraeli mng'ondo, na IMNDEWA tsakakulongela, ‘Kutsakuwa mdimi wa iwanu wangu Isiraeli na kutsakuwa mkulu wawo.’ " 3 Apfo, ipfilongotsi wose wa Isiraeli wamghendela mfalume Daudi ako Hebroni, naye keka nawo laghano hambele ha IMNDEWA, kuya wambaka mapfuta Daudi kawa mfalume wa Isiraeli. 4 Daudi tsakana miyaka selasini hayawile mfalume, naye katawala kwa miyaka alubaini. 5 Ako Hebroni Daudi katawala isi ya Yuda kwa miyaka saba na miyetsi sita, na ako Yerusalemu kawatawala iwanu wa Isiraeli hamwe na iwanu wa Yuda kwa miyaka selasini na midatu.

6 Tsuwa limwe mfalume Daudi na iwanu wake waghenda Yerusalemu kuwatowa Wayebusi, wenyekaye iwakalile mumo. Wayebusi wamlongela, "Ng'autsakwingila baye mna ghumji aghuno, kwaapfila hata pfifita na pfimbete watsokuwinga." Wamlongela apfo kwaapfila tsawaghamba Daudi tsang'odaha baye ukwingila amwo. 7 Lekeni mfalume Daudi kaiboka ingome lya Siyoni, mana yake mji ghwa Daudi.

8 Litsuwa alila, Daudi kawalongela iwanu wake, "Munu wowose iyatsowatowa Wayebusi kobamighwa yang'e mna ichikolongo achino cha ghamatsi yawatowe ‘pfimbete na pfifita,’ awo muhe wangu kowahila." Achi chicho ichiwatenda iwanu walonge, "Pfifita na pfimbete ng'awatsakwingila mng'anda baye."

9 Daudi tsakakala mna ingome ayo, naye kaghukema ghumji aghwo "Mji ghwa Daudi." Daudi kaghutsenga ghumji agho kwa kughutsunguluka, kandusila Milo mbaka mng'anda. 10 Naye Daudi tsakongotseka ng'ani kuwa na tsingupfu, kwaapfila IMNDEWA, Imulungu yana ingupfu tsakahamwe naye.

11 Kuya, mfalume Hiramu wa Tiro kawatuma wasenga waghende kwa Daudi. Pfipfila kamghalila imibiki ya mieletsi, iwanu iwosongola mibiki na iwanu iwotsenga, awo wamtsengela Daudi ing'anda ya chifalume. 12 Apfo Daudi kamanya ka IMNDEWA kamtenda yawe mfalume wa Isiraeli, na kautenda ufalume wake ukule kwa iwanu wake wa Isiraeli.

13 Daudi hayalawile Hebroni na kupfika Yerusalemu, kuko kongetsa kukwela wehe wengi na kongetsa kusola pfimada wengi. Nawo wamwelekela Daudi wana wengi wamale na wapinga. 14 Aghano ghagho ghamataghwa gha iwana wamale wa Daudi iwelekighwe Yerusalemu: Shamua, Shobabu, Natani, Selemani, 15 Ibihari, Elishua, Nefegi, Yafia, 16 Elishama, Eliada na Elifeleti.

17 Wafilisti hawahulike Daudi kabakighwa mapfuta yawe mfalume wa Isiraeli, maasikali wose waghenda kumbama, lekeni Daudi tsakahulika ka wombama, kahulumka kaghenda kwipfisa kuna ingome. 18 Wafilisti tsawapfika na wenela mna lwanda lwose lwa Refaimu. 19 Apfo Daudi kamghutsa IMNDEWA, "Apfi ng'ende kuwatowa Wafilisti? Pfihi kutsonyapfila niwahume?"

Naye IMNDEWA kamwidika Daudi, "Ghenda ukawatowe kwaapfila nitsokutenda uwahume ghendo."

20 Apfo Daudi kapfika Baali Perasimu kawatowa Wafilisti, kuya kalonga, "IMNDEWA kapfosa haghatighati ha maaduwi tsangu ka ghumto ighumemile ighuduma." Apfo hanu aho hakemighwa Baali Perasimu. 21 Wafilisti tsawapfileka pfinyagho pfao pfa imilungu yawo hanu hao, naye Daudi na iwanu wake wapfisola ipfinyagho apfo.

22 Wafilisti tsawoya keli na wenela mna ulwanda lwa Refaimu. 23 Daudi kamlomba IMNDEWA, naye kamlongela, "Uleke kuwatowa kulawa ahano, ila ughende kuchughu kwao na uwatowe hambele ha imibiki ya mififi. 24 Hautsohulika pfisindo pfa iwanu iwogunda mchanya mwa imififi ayo, ughende himahima kwaapfila acho chitsakuwa chitango ka nolongola kuwatowa maasikali wa Wafilisti."

25 Daudi katenda ka pfayalaghitsighwe na IMNDEWA, naye kawatowa Wafilisti kulawa Geba mbaka Gezeri.