1 Mfalume Daudi hayakalile mna ing'anda yake ya ufalume, IMNDEWA kamtenda yakale tseghamba na maaduwi wake wose. 2 Kuya mfalume Daudi kamlongela nabii Nasani, "Lola nene nokala mna ing'anda itsengighwe na mibiki ya mikataluba, lekeni lisanduku lya Imulungu lya mna lihema!" 3 Nasani kamwidika, "Utende chochose chubama, kwaapfila IMNDEWA kahamwe naghwe." 4 Lekeni ichilo chicho IMNDEWA kamlongela Nasani, 5 "Ghenda ukamlongele mtumighwa wangu Daudi, IMNDEWA kolonga apfino, ‘Angu ghweghwe kutsonitsengela nene ing'anda ya ukukala? 6 Tangiya litsuwa alila haniwakombole iwanu wa Isiraeli kulawa Misiri mbaka leloli, sikalile baye mng'anda. Nyanga chila hanu na ning'ali nikala mna lihema. 7 Hanu hohose hanighendile na iwanu wa Isiraeli, angu tsanimlongela mkulu wowose iyanimtumile yawalongotse Waisiraeli, heule ng'unitsengele baye ng'anda itsengighwe na mibiki ya mikataluba?’ 8 Lelo umlongele mtumighwa wangu Daudi: Nene IMNDEWA nina ingupfu ng'ani nolonga apfino, ‘Tsanikulapfa kumghina haung'ali udima wang'olo, nikusaghula uwe mkulu wa iwanu wangu Waisiraeli. 9 Tangiya matsuwa aghala tsanikala hamwe naghwe kokose kwaughendile, na niwakoma awala wose iwokuhila hambele hako. Na nene nitsolitenda taghwa lyako limanyike ka pfaghali mataghwa gha pfilongotsi wangi wakulu iwali muisi. 10 Nene nitsowasaghulila iwanu wangu wa Isiraeli hanu ha ukukala, watsokala hanu hao wenyegho, kuduhu keli imunu yatsowatsupfa. Nawo maaduwi wana tsingupfu ng'awatsowadununza keli ka ghumwande, tangiya haniwasaghule walamtsi wawalongotse iwanu wangu Waisiraeli. 11 Nene nitsokukinga na maaduwi tsako wose. Kubita agho ghose, IMNDEWA kokulongela ka katsokutsengela ng'anda. 12 Hautsakufa na ukwilunga na iwabala wako, nitsomtenda yumwe wa iwanagho yawe mfalume, na nitsoutenda ufalume wake uwe na ngupfu. 13 Yeye yuyo iyatsonitsengela nene ing'anda, na ufalume wake utsoghendelela matsuwa ghose. 14 Nene nitsakuwa aba wake, naye katsakuwa mwanangu. Yang'atenda ghehile, nitsomfapula ka iwanu pfawowafapula iwana wawo kwa mbalati. 15 Lekeni sitsoleka baye kumwonela libatsi ka pfandekile kumwonela libatsi Sauli yanimlapfile hambele hako. 16 Ikaya yako na ufalume wako pfitsokala matsuwa ghose. Chighoda chako cha ufalume chitsokala matsuwa ghose.’ "

17 Nasani kamlongela Daudi aghala ghose ghayalangusighwe na Imulungu mna ghamaono agho.

18 Kuya mfalume Daudi kengila mng'anda, kakala hambele ha IMNDEWA, naye kalomba, "Angu nene nili nani, ghwe IMNDEWA Imulungu wangu, na kaye yangu choni mbaka kunyinula ahano hanili leloli? 19 Ghwe IMNDEWA Imulungu, alino lyoneka dodo ghendo hambele hako, lekeni kughendelela kulonga ka kutsowatendela makulu iwanu wa ikaye yangu mna imiyaka mingi ikutsa. Kumbe apfino pfipfo pfauwatendela iwanu, ghwe IMNDEWA Imulungu! 20 Lelo nikulongele choni, nene Daudi mtumighwa wako? Mana ghweghwe IMNDEWA Imulungu wangu, kwonimanya nene mtumighwa wako. 21 Ka pfaulongile na ka pfaubamile mwenyegho, ghweghwe kutenda makulu agho ghose ili unangulitse nene mtumighwa wako. 22 Kwa aghala ghatuhulike, ghweghwe IMNDEWA kwa mkulu, kuduhu iyali ka ghweghwe, na kuduhu Imulungu ka ghweghwe. 23 Kuduhu wanu muisi iwodaha kwighala na iwanu wako Waisiraeli. Ghweghwe tsakughenda kuwakombola kulawa Misiri ili wawe wanu wako. Kulitenda taghwa lyako limanyike na kuwatendela mbuli ng'ulu na tsa ukukangawatsa. Tsakuwawinga iwanu wa isi tsingi na milungu yawo ahala iwanu wako hawang'ali wosoghela hambele na kuwaleka iwanu wako yauwakombole Misiri wabite. 24 Kuweng'a ngupfu iwanu wako wa Isiraeli matsuwa ghose, naghwe IMNDEWA kuwa Imulungu wawo.

25 "Lelo, Ghwe IMNDEWA, ughatende aghala ghaunongele nene mtumighwa wako na iwanu wangu ka pfaulongile. 26 Na taghwa lyako litunyighwe matsuwa ghose, nawo iwanu watsolonga, ‘IMNDEWA yane ngupfu ng'ani yuyo Imulungu wa Isiraeli!’ Na ikaye ya Daudi mtumighwa wako itsakuwa na ngupfu hambele hako. 27 Mana ghweghwe Imulungu yuna ngupfu ng'ani, Imulungu wa Isiraeli, kunighubulila nene mtumighwa wako, kulonga, ‘Nitsokutsengela ng'anda,’ apfo nolomba bila ukupfuka hambele hako.

28 "Lelo ghweghwe IMNDEWA Imulungu, ghweghwe yuyo Imulungu, na malonga ghako gholongesa, na ghweghwe mwenyegho kulonga kutsonitendela nene mtumighwa wako imbuli aino inoghile. 29 Apfo nokulomba uwabaliki iwanu wangu nene mtumighwa wako wakale matsuwa ghose hambele hako, kwaapfila ghweghwe tsakulonga apfo, na kwa tsibalaka tsako iwanu wangu watsobalikighwa matsuwa ghose."