1 IMNDEWA kawaghudubukila keli Waisiraeli, apfo kamsongetsa Daudi yawatende waghaye. Kamlongela yawapete Waisiraeli na iwanu wa Yuda. 2 Apfo Mfalume kamlongela Yoabu na pfilongotsi wa maasikali iwakalile hamwe naye, "Ghendeni kuna ghamakabila ghose gha Isiraeli kulawa Dani ili Kasikazini mbaka Beeri Sheba ili Kusini mkawapete iwanu ili nimanye ka wali wangapi."

3 Lekeni Yoabu kamlongela mfalume, "IMNDEWA, Imulungu wako yawongetse Waisiraeli mala miya kubita pfawali sambi, naghwe mkulu wangu mfalume kutsowona apfila pfawakongetseka kwa nenge tsako mwenyegho. Lekeni hebali ghweghwe IMNDEWA wangu mfalume kobama kutenda ichinu achino?"

4 Lekeni chayalongile mfalume tsa china ngupfu ng'ani kuna iwakulu wa maasikali. Lelo Yoabu na iwakulu wa maasikali wamleka mfalume waghenda kuwapeta Waisiraeli.

5 Waloka ghumto Yoridani wandusa kuwapeta iwanu tangiya Aroeri, ghumji ighuli haghati ha ulwanda, mna isi ya Gadi. Kulawa baho waghenda mbaka Yazeri. 6 Pfipfila waghenda isi ya Gileadi na Kadeshi mna isi ya Wahiti. Kuya wapfika Dani, na hawalawile Dani watsunguluka waghenda Sidoni.

7 Kuya waghenda kuna ingome ya ghumji ghwa Tiro, wengila mna imiji yose ya Wahivi na ya Wakanaani. Kuya walawa waghenda isi ya Kusini ya Yuda ako Beeri Sheba. 8 Hawamalitse ukwanga mna isi yose, woya Yerusalemu ahala haimalile miyetsi tisa na matsuwa ishilini.

9 Kuya Yoabu kamghalila mfalume iwamale iwodaha ukwitowa ng'ondo iyawapetile. Mna isi ya Isiraeli tsakuna wamale laki nane, na mna isi Yuda tsakuna wamale laki tano.

10 Lekeni Daudi hayamalitse ukuwapeta iwanu ghumoyo ghwake ghumtama sideke. Apfo kamlongela IMNDEWA, "Nitenda nzambi ng'ulu kwa achila chanitendile. Lekeni sambi nokulomba ghwe IMNDEWA unileghusile nzambi nene mtumighwa wako, kwaapfila chinu chanitendile cha ubotsi ghendo."

11 Ilupfi yake nemitondo Daudi hayalamke, IMNDEWA kamlongela Gadi nabii wa Daudi kalonga, 12 "Ghenda ukamlongele Daudi apfino IMNDEWA kalonga apfino, ‘Nokwing'a pfinu pfidatu naghwe usaghule chimwe nani nitsokutendela.’" 13 Apfo Gadi kamghendela Daudi kalonga, "Pfihi kobama nzala ya miyaka midatu ingile mna isi yako? Au uwingighwe na aduwi tsako kwa miyetsi midatu? Au kuwe na matamu kwa matsuwa madatu? Lelo usaghule chimwe kuya unongele ng'amlongele yanitumile."

14 Daudi kamwidika Gadi, "Nina maghoyo makulu! Ng'apfu nitowighwe na IMNDEWA kwaapfila yeye kana libatsi kubita ukughoghighwa na iwanu." 15 Apfo IMNDEWA kawaghalila matamu Waisiraeli, tangiya nemitondo mbaka chipindi chiyekile, na wanu elufu sabini wafa kulawa Dani mbaka Beeri Sheba. 16 Lekeni malaika hayagholose ghumoko ghwake ili yaghuhinye ghumji ghwa Yerusalemu, IMNDEWA kaleka ukutenda aghala ghayabamile ukutenda. Kamlongela imalaika ayo, "Leka! Uleke kutenda agho ghaubama ukutenda" Litsuwa alyo imalaika tsakema habehi na ichibwalu cha ukubetela ingano cha Arauna wa likabila lya Wayebusi.

17 Daudi hayamwonile imalaika ayo iyang'ali yowakoma iwanu, kamlongela IMNDEWA, "Nene yuyo yanina inzambi na ghamatotso! Iwanu awano wahole, ng'awatendile ghehile baye. Nokulomba unitowe nene na iwanu wa ikaye ya aba wangu."

18 Litsuwa lilyo Gadi kamghendela Daudi kamlongela "Ugheluke kuchanya mna ichibwalu cha ukubetela ingano cha Arauna Muyebusi ukamtsengele IMNDEWA matsabahu."

19 Apfo Daudi kagheluka kuchanya ka pfayalongelighwe na Gadi, na ka IMNDEWA pfayamlaghitse. 20 Arauna hayalolile lwehisi kamwona mfalume hamwe na watumighwa wake womtsila, naye kalawa kaghenda kamwinamila mbaka ichihanga chake chidonza hasi. 21 Kuya Arauna kamghutsa mfalume, "Hebali mkulu wangu mfalume kanitsila nene mtumighwa wake?" Daudi kamwidika, "Nitsa kughula ichibwalu chako cha kubetela ili nimtsengele IMNDEWA matsabahu, na utamu uhupe ghendo."

22 Naye Arauna kamlongela Daudi, "Mkulu wangu mfalume usole chochose chaukona chinogha umlapfile nambiko IMNDEWA. Nene nowalapfa wang'ombe awano wawe nambiko ya ukulakatsighwa, na ipfinu apfino pfa ukubetela na tsinila tsa wang'ombe tsiwe tsingodi." 23 Apfo pfose nokwing'a ghweghwe mfalume. Nololela IMNDEWA, Imulungu wako katsoitoghola inambiko yako.

24 Lekeni mfalume kamlongela Arauna, "Baye! Ghweghwe uleke kungaya hela chochose. Nene nitsoghula kuna ghweghwe kwa bei yake. Sidaha baye ukumlapfila IMNDEWA wangu nambiko ya ukulakatsighwa bila kuliha chinu." Apfo mfalume kaghula ichibwalu acho cha ukubetela na wang'ombe kwa pfihande pfa fetsa hamsini.

25 Kuya Daudi kamtsengela IMNDEWA matsabahu hanu aho na kamlapfila nambiko ya ukulakatsighwa na nambiko ya ukukala tseghamba. Apfo IMNDEWA katoghola aghala ghayamlombile na utamu aula uhupa ghendo mna isi ya Isiraeli.