1 Mfalume Daudi hayalalile ghendo, iwatumighwa wake wang'ali womghubika magholole, lekeni ng'atsumbuke baye. 2 Apfo iwatumighwa wake wamlongela, "Mkulu wetu, leka tukubamile mwali yang'ana yammanye mmale, yakale naghwe na yakulolese, yawase hamwe na ghweghwe, naghwe utsumbuke." 3 Nawo wambama mwali yanoghile muisi mwose mwa Isiraeli, wamwona mwali yumwe iyakemighwe Abishagi, iyokala mna ghumji ghwa Shunami, wamghalila mfalume. 4 Imwali ayo tsakanogha sideke, kamlela mfalume, na kamsang'anila, lekeni mfalume ng'awasile naye ka mwehe wake baye.

5 Matsuwa agho Adoniya, mwana wa Daudi iyelekighwe na Hagiti, tsaketamba ka yeye yuyo iyatsakuwa mfalume. Keka ghoya mituka yake ya ukukweghighwa na falasi, na iwadina falasi, na wanu hamsini iwotsuma wamlongolele yeye. 6 Lekeni Daudi, aba wake ng'ammanile baye hata mala lumwe, wala ng'amghutsile baye heule yang'ali yotenda apfo. Yeye tsa msongolo yana ichihanga ichinoghile ng'ani, na tsakanza koneka Absalomu kuya yeye Adoniya. 7 Adoniya tsakadeta na Yoabu, iyelekighwe na Seruya, na mtambika Abiatari, nawo watoghola ukumwapfila Adoniya. 8 Lekeni mtambika Sadoki, na Benaya, mwanaghe Yehoyada, na nabii Nasani, na Shimei, na Rei na wabetetsi wa Daudi, walema ukumwapfila Adoniya.

9 Adoniya kalapfa nambiko, kachinja ng'olo na ng'ombe na wana wa ng'ombe iwanonile, hana libambalawe lya Zoheleti, habehi na imbwibwi ya Eni Rogeli, kawakema kuna ichihungo acho ndughu tsake wose, awala iwanaghe mfalume Daudi, na iwatumighwa wa mfalume iwang'ali wokala Yuda. 10 Lekeni ng'amkemile baye nabii Nasani, wala Benaya, wala wabetetsi wa mfalume, wala Selemani indughu yake.

11 Baho Nasani kamlongela Batisheba, wenye wake Selemani, kalonga, "Pfihi ng'uhulike baye ka Adoniya, iyelekighwe na Hagiti kawa mfalume aku mkulu wetu Daudi ng'apfimanyile baye? 12 Leka nene nikulongele cha ukutenda ka kobama kwikombola na uwe mghima ghweghwe na mwanagho Selemani. 13 Ghenda kwa mfalume Daudi ukamlongele apfino, ‘Pfihi ng'unilahile nene baye mtumighwa wako, ghwe mfalume, ahala haulongile, imwanagho Selemani katsakuwa mfalume na katsokalila ichighoda changu cha ufalume, heule lelo Adoniya kawa mfalume?’ " 14 Nasani kalonga keli, "Hautsakuwa ung'ali kolonga na mfalume, nene nitsakwingila na kulonga ka ghaulongile gholongesa."

15 Apfo Batisheba kengila mng'anda kumlola mfalume mna ichiheleto chake cha ukuwasa, naye mfalume tsakalala ghendo, na Abishagi, ipinga iyolawa Shunami, yang'ali yomlela mfalume. 16 Batisheba kamwinamila mfalume, naye mfalume kamghutsa, "Chaubama choni?"

17 Naye kamwidika, "Mkulu wangu, ghweghwe mwenyegho tsakunilahila ghendo kwa IMNDEWA Imulungu wako, nene imtumighwa wako, ahala haulongile, ‘Selemani imwanagho katsakuwa mfalume na katsokalila ichighoda changu cha ufalume.’ 18 Lelo ulole sambi Adoniya kawa mfalume, na ghweghwe mfalume, mkulu wangu ng'umanyile baye. 19 Kalapfa nambiko kwa kuchinja wang'ombe wengi, wana wa ng'ombe wengi iwanonile, na wang'olo wengi, na kawakema iwana wose wamale wa mfalume, na mtambika Abiatari, na Yoabu imkulu wa ing'ondo. Lekeni Selemani imtumighwa wako ng'amkemile baye. 20 Ghwe mfalume, mkulu wangu, tsinenge tsose tsa wanu wa Isiraeli tsokulolela ghweghwe, wobama uwalongele nani iyatsokalila ichighoda chako cha ufalume, yasole hanu hako. 21 Ka ng'utenda apfo baye, nene na imwanangu Selemani tutsakoneka tutotsa ahala ghweghwe hautsakufa."

22 Batisheba hayang'ali yolonga na mfalume, nabii Nasani kapfika. 23 Iwanu wamlongela mfalume apfino, "Nabii Nasani katsa, kabaha." Naye Nasani hayampfikile mfalume kamwinamila mbaka uhanga wake udonza hasi. 24 Naye Nasani kalonga, "Mkulu wangu mfalume, angu tsakulonga ka Adoniya katsakuwa mfalume ahala ghweghwe haumalitsa ufalume wako, na kokalila ichighoda chako cha ufalume? 25 Leloli kahulumka, kaghenda kutambika, kachinja wang'ombe wengi, wana wa ng'ombe wengi iwanonile, na wang'olo wengi, kawakema wana wose wa mfalume, na iwakulu wa ing'ondo, na mtambika Abiatali, na ulole lelo wakuja na kunwa na wolonga, ‘Imulungu yakwike ukale matsuwa mengi mfalume Adoniya.’ 26 Lekeni ng'anikemile nene baye imtumighwa wako, wala mtambika Sadoki, wala Benaya imwanaghe Yehoyada, wala mtumighwa wako Selemani. 27 Pfihi alino kulitenda ghweghwe mkulu wangu, bila kutulongela twetwe watumighwa wako nani iyatsokalila ichighoda chako cha ufalume, yasole hanu hako?"

28 Naye mfalume Daudi kalonga, "Nikemeleni Batisheba." Batisheba kamghendela mfalume kema hambele hake. 29 Mfalume kelaha kalonga, "Nelaha ghendo kwa IMNDEWA wangu iyali mgima, iyanikombole mna maghayo ghangu ghose, 30 ka pfanilahile hambele ha IMNDEWA, Imulungu wa Isiraeli, hanilongile, ‘Mwanagho Selemani kakuwa mfalume, katsosola hanu hangu, na katsokalila ichighoda changu cha ufalume.’ Apfi pfipfo pfanitsotenda leloli."

31 Baho Batisheba kamwinamila mfalume, uhanga wake udonza hasi, kalonga, "Mkulu wangu, mfalume Daudi IMNDEWA yamwike yakale matsuwa mengi!"

32 Naye mfalume Daudi kalonga, "Nikemeleni mtambika Sadoki, nabii Nasani, na Benaya mwanaghe Yehoyada." Nawo wamghendela mfalume. 33 Mfalume kawalongela, "Msoleni mwanangu Selemani hamwe na watumighwa wangu, mumdinitse Selemani mna punda falasi wangu, mhulumke mumghale kuna imbwibwi ya Gihoni. 34 Kuko mtambika Sadoki na nabii Nasani wakambakatse mapfuta, na wamwike yawe mfalume wa Isiraeli. Kuya mtowe malati na mkemelele mlonge, ‘Imulungu yamwike yakale matsuwa mengi mfalume Selemani!’ 35 Kuya mgheluke mmuwinze, naye katsakutsa yakalile ichighoda changu cha ufalume, yasole hanu hangu, kwaapfila yeye yuyo yanimsaghule yawe mtawala wa Isiraeli na Yuda."

36 Benaya, imwana wa Yehohada kamwidika mfalume, "Pfipfo! Tutsotenda pfipfo, IMNDEWA, Imulungu wa mkulu wangu mfalume, naye yalonge pfipfo. 37 Ka IMNDEWA pfayakalile hamwe na mkulu wangu mfalume, pfipfila yakale hamwe na Selemani ili ufalume wake uwe mkulu kubita aula wa mkulu wangu mfalume Daudi."

38 Baho wahulumka, mtambika Sadoki, nabii Nasani, Benaya imwana wa Yehoyada, Wakereti, na Wapeleti, wamdinitsa Selemani mchanya mwa punda falasi wa mfalume Daudi, wamghala mbaka Gihoni. 39 Sadoki kasola imembe ina ghamapfuta iyaisolile kuna lihema lienzeluke, kambakatsa ghamapfuta Selemani. Kuya watowa malati, iwanu wose wakemelela walonga, "Imulungu yamwike yakale matsuwa mengi mfalume Selemani!" 40 Baho iwanu wose wamuwinza, aku wotowa filimbi, wopfina na kudeng'elela, mbaka isi yose ihighisika kwa kukemelela kwao.

41 Lelo Adoniya na iwagheni wake hawang'ali womalitsa ichihungo, wahulika tsimalati tsotowighwa. Naye Yoabu kaghutsa, "Angu ukukemelela ako kuna ghumji kuna choni?" 42 Hata ng'ana yamalitse ukulonga, Yonasani, mwanaghe imtambika Abiatari kapfika. Naye Adoniya kamlongela, "Wingile mng'anda, ghweghwe kwa munu yunoghile, koghala mbuli tsinoghile."

43 Yonasani kamwidika, "Baye! Mkulu wetu mfalume Daudi kamwika Selemani yawe mfalume. 44 Mfalume Daudi kawatuma mtambika Sadoki, na nabii Nasani, na Benaya mwanaghe Yehoyada, na Wakereti, na Wapeleti waghende na Selemani. Nawo wamdinitsa mna punda falasi wa mfalume, 45 wahulumka waghenda Gihoni, kuko mtambika Sadoki na nabii Nasani wambaka ghamapfuta yawe mfalume. Sambi wakuya aku wodeng'elela, na ukukemelela kwao kuko kwauhulika, kwenela mna ghumji ghose. 46 Sambi Selemani kakalila ichighoda cha ufalume. 47 Kuya iwatumighwa wa mfalume nawo watsa kumwing'a hongela mfalume wetu Daudi walonga, ‘Imulungu wako yalitende taghwa lya Selemani limanyike kubita lyako, na ufalume wake uwe mkulu kubita wako.’ Naye mfalume kenama mlusatsi, 48 kalonga, ‘Yatunyighwe IMNDEWA, Imulungu wa Isiraeli, iyamsaghule munu wa ukukalila ichighoda changu cha ufalume, na iyanyikile nighone aghano.’ "

49 Apfo wagheni wa Adoniya tsaweduka ghendo, wapwililika, woka chila munu na nzila yake. 50 Lekeni Adoniya kwa kumpfuka Selemani katsumila kuna imatsabahu, na kaghenda kukinda tsimembe tsa imatsabahu yahone. 51 Na Selemani kahulika ka Adoniya yang'ali yompfuka yeye, na yang'ali yokinda tsimembe tsa imatsabahu aku kolonga, "Tanu nobama mfalume Selemani yanilahile ka ng'atsong'oma baye nene mtumighwa wake."

52 Selemani kedika kalonga, "Ka ning'amwona kahela totso, hata mvili yake imwe sitsoilaghatsa hasi baye, lekeni ning'amwona kana totso, ayo kakufa ghendo." 53 Apfo mfalume Selemani katuma wanu wakamkeme Adononiya kulawa kuna imatsabahu yamghendele. Naye Adoniya kaghenda kwa mfalume Selemani, kamwinamila. Selemani kamlongela, "Uka ukaye yako."