1 Abiya kanza kuitawala isi ya Yuda mna ghumwaka ghwa kumi na nane ghwa ukutawala mfalume Yeroboamu mwanaghe Nebati. 2 Katawala kwa miyaka midatu ako Yerusalemu. Mai wake tsakakemighwa Maaka neghe Absalomu. 3 Katenda nzambi tsitsila tsayatendile aba wake, ghumoyo ghwake ng'aghulapfile baye kwa IMNDEWA, Imulungu wake, ka pfaghukalile ghumoyo ghwa sekulu wake Daudi. 4 Lekeni kwaajili ya Daudi, IMNDEWA, Imulungu wake kamwing'a mwana mmale yatawale hanu hake, na yawe tala ilangangatsa Yerusalemu, na yaghutende ghumji ghwa Yerusalemu ghwime ghoya. 5 IMNDEWA katenda apfo kwaapfila Daudi tsakamtendela IMNDEWA ighanoghile wala ng'alemile baye kukinda aghala ghose ghayamlaghitse mna ghamatsuwa ghose ghayakalile mgima, ila kwa lighomba alila lya Uria, Mhiti. 6 Rehoboamu na Yeroboamu tsawang'ali wetowa, na ing'ondo ayo ighendelela mbaka mna ghamatsuwa ghose gha Abiya hayakalile mgima. 7 Ghamatendo ghangi na chila chinu chayatendile Abiya mna utawala wake, pfose pfandikighwa mna ichitabu cha tsikumbukumbu cha wafalume wa Yuda. Abiya na Yeroboamu wang'ali woghendelela ukwitowa. 8 Abiya kafa na wamtsika mna ghumji ghwa Daudi. Apfo Asa imwanaghe katawala hanu hake.

9 Mna ghumwaka ghwa ishilini ghwa mfalume Yeroboamu wa Isiraeli, Asa kanza kutawala isi ya Yuda. 10 Katawala miyaka alubaini na ghumwe ako Yerusalemu. Bibi yake tsakakemighwa Maaka, neghe Abusalomu. 11 Mfalume Asa kamtendela ghanoghile IMNDEWA, ka pfayatendile Daudi, sekulu wake. 12 Kawawinga ipfiweghe na iwamale iwowasa na wamale wayao iwang'ali wokala hanu ha ukutambikila, kapfasa ipfiyagho pfose pfawatendile sekulu tsake. 13 Pfipfila kamlapfa Maaka iyakalile mai wake yaleke kuwa keli malikia, kwaapfila tsakatenda chinyagho cha Ashera. Asa kachibenabena ichinyagho acho na kachilakatsa mna ulwanda wa Kidironi. 14 Hata ka ipfidanando pfa ukutambikila milungu ingi ng'apfihinyile baye, ghumoyo ghwa Asa ghughendelela kumtoghola IMNDEWA mna ghamatsuwa ghake ghose ghayakalile mgima. 15 Kapfingitsa mna ing'anda ya IMNDEWA pfinu pfose pfayapfilapfile aba wake kwa Imulungu, hamwenga na pfinu pfake pfayapfilapfile imwenyegho kwa Imulungu, kengitsa ipfinu pfa nzahabu, pfa fetsa, na pfinu pfingi.

16 Mfalume Asa wa Yuda na mfalume Baasha wa Isiraeli wang'ali wetowagha matsuwa ghose gha ufalume wawo. 17 Mfalume Baasha wa Isiraeli kaitowa isi ya Yuda, kuya katsenga ubanda kughutsunguluka ghumji ghwa Rama, ili munu wowose yaleke kulawa wala kwingila mna isi ya Asa, mfalume wa Yuda. 18 Apfo Asa kasola ifetsa na inzahabu itsikalile mna ing'anda ya IMNDEWA na mna ing'anda yake ya chifalume na kaweng'a watumighwa wake. Mfalume Asa kawatuma waghende Damasko kwa Beni Hadadi mwanaghe Tabrimoni, mtsukulu wa Hezioni, mfalume wa Siriya, kalonga, 19 "Nobama twike laghano, nene na ghweghwe, ka apfila aba wangu na aba wako pfawekile laghano. Lola, nokughalila nzawadi ya nzahabu na fetsa, ili laghano lyawikile ghweghwe na Baasha mfalume wa Isiraeli litsighe na yeye yawalapfe asikali wake kulawa kuna isi yangu."

20 Beni Hadadi kamtogholela mfalume Asa, kawatuma wakulu wake wa ing'ondo wakaitowe imiji ya Isiraeli. Waghusola ghumji ghwa Iyoni, na ghwa Dani, na ghwa Abeli Beti Maaka, na ghwa Kineroti, na isi yose ya Nafutali. 21 Naye mfalume Baasha hayahulike apfo, kaleka kutsenga ubanda utsunguluka Rama, kaghenda kukala Tirza. 22 Kuya mfalume Asa kawalaghitsa iwanu wose wa Yuda, yaleke kulekighwa munu wowose ayula, wakadute ghamabwe na imibiki kulawa Rama, iyang'ali yotsengela Baasha. Kuya mfalume Asa kasola ghamabwe agho na imibiki ayo katsengela ubanda wa ghumji ghwa Geba ighuli mna isi ya Benyamini, na ubanda wa ghumji ghwa Mizipa. 23 Ghamatendo ghangi gha Asa, na tsingupfu tsake pfitsili, na imiji yose iyaitsengile, ghose ghandikighwa mna ichitabu cha kumbukumbu cha wafalume wa Yuda. Lekeni hayawile mnzehe yang'ali yoghula ghamaghulu. 24 Asa kafa na katsikighwa mna ghamakabuli gha sekulu tsake mna ghumji ghwa Daudi. Imwanaghe Yehoshafati kawa mfalume hanu hake.

25 Nadabu mwanaghe Yeroboamu kanza kuwa mfalume wa Isiraeli mna ghumwaka ghwa keli ghwa mfalume Asa wa Yuda, katawala Isiraeli kwa miyaka mili. 26 Nadabu katenda ghehile hambele ha IMNDEWA, kawinza nzila tsa aba wake, inzambi iyatendile iwahonza Waisiraeli nawo waitenda.

27 Baasha mwanaghe Ahiya, iyolawa mna likabila lya Isakali, kamtendela tsengwe Nadabu, na kamkoma ahala Nadabu na Waisiraeli wose hawang'ali woghutsingila ghumji ghwa Gibetoni, mji ghwa Wafilisiti. 28 Baasha kamkoma Nadabu mna ghumwaka ghwa kadatu ghwa mfalume Asa. Naye kawa mfalume hanu hake. 29 Baho hayanzile ukutawala, Baasha kawakoma iwanu wose wa ilukolo lwa Yeroboamu. Ng'amlekile baye munu wowose wa Yeroboamu yahumule, yeye kawakoma wose, apfo lilawila alila IMNDEWA lyayalongile kubitila imtumighwa wake nabii Ahiya wa Shilo. 30 Aghano ghamlawila kwa ajili ya inzambi iyatendile Yeroboamu, na apfila pfayawahonzile Wasiraeli watende ghehile, na kamtenda IMNDEWA, Imulungu wa Isiraeli yaghudubuke.

31 Aghala ghose gha Nadabu ighakalile na ghose ghayatendile, ng'ambe ghandikighwa mna ichitabu cha kumbukumbu cha wafalume wa Isiraeli. 32 Asa na mfalume Baasha wa Isiraeli wang'ali wetowagha matsuwa ghose gha ukutawala kwawo.

33 Na mna ghumwaka ghwa kadatu ghwa mfalume Asa wa Yuda, Baasha mwana wa Ahiya kanza kuwa mfalume wa Isiraeli kulawa Tiriza. Katawala kwa miyaka ishilini na mine. 34 Baasha kamtendela ghehile IMNDEWA, na kamwigha Yeroboamu. Naye katenda nzambi iila imtendile yawahonze iwanu wa Isiraeli waitende.