1 Malikia wa Sheba hayahulike mbuli tsa Selemani na usale wake na IMNDEWA, kamghendela Selemani yakamghutse mbuli ng'omu. 2 Naye kapfika Yerusalemu aku kelongotsa na wanu wengi, ngamia iwadutile mapfuta ighonung'ila ghoya, nzahabu nyingi, na mabwe gha bei ng'ulu. Na hayapfikile kwa Selemani, kalonga naye ghose ighali mmoyo mwake. 3 Naye Selemani kamwidika ghose ghayamghutsile, tsakuduhu mbuli ng'omu iyalekile kuyidika ghoya. 4 Malikia wa Sheba hayonile ihekima ya Selemani na ing'anda ya chifalume iyaitsengile, 5 na ichijo ichikighwe mmetsa mwake, na iwakulu wake pfawakalile, na iwatumighwa wake pfawapfalile, na iwanu iwakwambika ichijo, na tsinambiko tsa ukulakatsighwa tsayalapfile hana ing'anda ya IMNDEWA, kakangawala ghendo. 6 Baho kamlongela mfalume Selemani, "Ghose ghanihulike mna isi yangu, aghala ghautendile ghweghwe na ihekima yako ghalongesa. 7 Lekeni nene sighatoghole baye mbaka hanitsile na kona kwa nenge tsangu mwenyegho. Kumbe sighahulike baye hata inusi yake, ihekima yako na tsimali tsako tsitsidi kubita aghala ghanihulike. 8 Wabweda iwanu wako! Wabweda iwatumighwa wako awano iwokusang'anila matsuwa ghose na kutegheletsa ihekima yako. 9 IMNDEWA, Imulungu wako yatunyighwe, iyanoghelighwe naghwe na iyakwikile mna ichighoda cha ufalume cha Isiraeli. Kwaapfila IMNDEWA kowakunda Waisiraeli matsuwa ghose, apfo kakusaghula ghweghwe uwe mfalume ili ulamle ghoya na utende aghala ighomnoghela."

10 Kuya kamwing'a mfalume Selemani kilo tsa nzahabu ka elufu nne, na mapfuta mengi sideke ighonung'ila ghoya, na mabwe gha bei ng'ulu. Na ghamapfuta agho pfaghali mengi sideke malikia wa Sheba ghayamwing'ile Selemani ng'ana ghaghalighwe keli baye.

11 Meli tsa Hiramu tsighala nzahabu kulawa Ofiri, na kulawa kuko Ofiri tsighala mibiki mingi ya misandali na mabwe gha bei ng'ulu.

12 Mfalume katsengela imibiki ayo, kaika iwe ya ukukinda hawodina tsingatsi tsa ing'anda ya IMNDEWA, na ing'anda ya chifalume, na katengenetsela ipfinubi, na pfing'weng'we pfa iwanu iwakwimba. Kulawa litsuwa alyo, mna isi ng'ana ighalighwe keli baye mibiki mingi ka ayo.

13 Naye mfalume Selemani kamwing'a malikia wa Sheba chila chinu chayalombile, kubita apfila mfalume Selemani pfayamwing'ile kwa uluso wake wa chifalume. Apfo malikia ayo koka kuna isi yake hamwe na watumighwa wake.

14 Chila mwaka Selemani yang'ali yobokela nzahabu kilo elufu ishilini na tatu. 15 Atso si hamwe baye na tsinzahabu tsayabokele kulawa kwa wachuutsi na wautsa pfinu, na wafalume wa isi tsingi, na iwakulu wa isi ya Isiraeli.

16 Mfalume Selemani kasongola ngao ng'ulu miya mbili tsa nzahabu ihondighwe, na chila ngao ingila kilo saba tsa nzahabu. 17 Pfipfila katengenetsa ngao miya ndatu ndodondodo, chila imwe kaikandika nzahabu ka kilo mbili. Mfalume katsika mna ing'anda ikemighwe ng'anda ya Muhulo ghwa Lebanoni.

18 Kuya mfalume katengenetsa chighoda chikulu cha chifalume kwa membe tsa tembo, kachikandika nzahabu inoghile ng'ani. 19 Ichighoda acho tsachina ngatsi sita na ubali wake wa kuchanya tsa cha mtsunguluko, na ubali wa kumoso na kujilo chikighwa hanu ha ukwikila ghamoko, na pfinyagho pfa simba weli tsapfima habehi na hanu ha ukwikila ghamoko. 20 Pfipfila tsahana pfinyagho pfa simba kumi na weli ipfimile hana tsingatsi atso sita, chila chinyagho chimwe chima kwaitsighile ingatsi kumoso na kujilo. Ichighoda ka acho ng'ana chitengenetsighwe baye mna ufalume wowose.

21 Ipfinu pfose pfa mfalume pfa ukunwela pfose tsa pfa nzahabu, na ipfinu pfose ipfikalile mna ing'anda ya Ghumuhulo ghwa Lebanoni tsa pfa nzahabu inoghile. Tsakuduhu chinu cha fetsa, kwaapfila fetsa tsayoneka si chinu baye mna ghamatsuwa gha Selemani.

22 Kwaapfila mfalume tsakana meli tsa Tarishishi itsing'ali tsikwanga hamwe na tsimeli tsa Hiramu. Chila mwaka ghwa kadatu tsimeli atso tsing'ali tsimghalilagha mfalume nzahabu, fetsa, membe tsa nembo, mahoko na tausi.

23 Apfo mfalume Selemani tsakawabita wafalume wose wa isi tsose kwa tsimali na kwa ihekima. 24 Iwanu wa isi tsose tsawabama kumghendela Selemani, wakategheletse ihekima yake Imulungu iyamwing'ile. 25 Chila munu iyamghendele, kamghalila nzawadi, na tsinzawadi atso tsitso atsino, pfinu pfa fetsa, pfinu pfa nzahabu, magwanda, silaha, mapfuta ighonung'ila ghoya, falasi na punda falasi. Tsinzawadi atsino tsakatsibokela chila mwaka. 26 Selemani tsakaika hamwe imituka ya falasi. Tsakana mituka ya falasi elufu imwe na miya nne, na wadina falasi elufu kumi na mbili, iyawekile mna imiji ya imituka ya falasi, na ako Yerusalemu kwayakalile yeye. 27 Ako Yerusalemu mfalume Selemani tsakatenda fetsa tsiwe ka mabwe, na imibiki ya miyeletsi tsakaitenda iwa ka mikuyu ili Shefela, pfaili mingi. 28 Wafalasi wa Selemani tsawasolighwa kulawa Misiri na Kilikia, iwachuutsi wake kwawautsighwe na iwanu wa Kilikia. 29 Mtuka ghumwe ghwa ukukweghighwa na falasi waghughula kulawa Misiri kwa kilo saba tsa fetsa, na falasi yumwe tsakaghulighwa kwa kilo mbili tsa fetsa. Pfipfila nawo wawautsila imituka ayo iwafalume wose wa Wahiti na wa Wasiria.