1 Rehoboamu kaghenda Shekemu, ako Waisraeli wose tsawetingana kumhimika yeye yawe mfalume. 2 Naye Yeroboamu, mwanaghe Nebati iyatsumile Misiri kwa ukumpfuka Selemani, hayahulike apfino, koya kulawa Misiri. 3 Apfo Waisiraeli watuma wanu waghende wakamkeme Yeroboamu. Kuya yeye na mtingano ghwose ghwa Waisiraeli waghenda kwa Rehoboamu wamlongela, 4 "Aba wako katutwika mtsigho mtsito, utuhungutsile ghumtsigho aghwo, na twetwe tutsokutumikila."

5 Rehoboamu kawedika, "Mke na mmbuyile ahano haimala ikacha." Apfo iwanu woka. 6 Rehoboamu kawaghutsa iwanzehe ka wakonatse, awala iwamsang'anile aba wake mna matsuwa ghake ghayakalile mgima. Kawaghutsa, "Mwemwe mwonongela niwedike choni iwanu awano?" 7 Nawo wamwidika, "Ung'atoghola uwe mtumighwa wa iwanu awano leloli na ung'awatumikila, na ung'alonga nawo lughalugha hauwedika, na wao watsakuwa watumighwa wako matsuwa ghose."

8 Lekeni Rehoboamu kabetsa achila chawamlongele iwanzehe, kaghenda kuwaghutsa iwasongolo iwakulile naye na iwang'ali womsang'anila. 9 Kawaghutsa, "Mwemwe mkonatse? Tutsowedikatse iwanu awano iwanongele niwahungutsile mtsigho ghwawatwikile aba wangu?"

10 Iwasongolo awala iwakulile hamwe naye wamwidika, "Walongele iwanu awo iwalongile, ‘Aba wako katutwika mtsigho mtsito, utuhungutsile ghumtsigho aghwo’, naghwe walongele apfino, ‘Ichidole changu chidoghodogho chinene kubita ichuno cha aba wangu. 11 Aba wangu kawatwika mwemwe mtsigho mtsito, lekeni nene nitsakongetsa ghuwe mtsito ng'ani. Aba wangu kawafapulani kwa mbalati, lekeni nene nitsowafapulani kwa mijeleledi ya mihonga.’" 12 Ikacha yake Yeroboamu na iwanu wose woya kwa Rehoboamu, ka pfayawalongele mfalume, "Muye ahano ikacha." 13 Mfalume kawedika iwanu kwa kuwamanila, kaleka achila chawamlongele iwanzehe, 14 kategheletsa achila chawamlongele iwasongolo hawalongile, "Aba wangu kawatwika msigho mtsito, nene nowongetsa ghwakuwa mtsito ng'ani. Aba wangu kawafapulani na mbalati, na nene nitsowafapulani kwa mijeledi ina mihonga." 15 Apfo mfalume ng'awategheletse baye iwanu, kwaapfila chinu achino chilawa kwa IMNDEWA, ili imbuli yake ilawile, iyamlongele Yeroboamu mwanaghe Nebati kubitila Ahiya iyawile Shiloni.

16 Waisiraeli wose hawonile mfalume kalema kuwategheletsa wamwidika pfino: "Tuna choni kwa mfalume Daudi, tuna hanu hachi kwa mwana wa Yese? Lelo mke kuna lihema lyenu, mwemwe Waisiraeli, ilolese ng'anda yako mwenyegho, ghwe Daudi." Apfo Waisiraeli woka kuna ghamahema ghawo. 17 Lekeni kwa Waisiraeli iwang'ali wokala mna imiji ya Yuda, Rehoboamu yang'ali iyowatawala. 18 Kuya mfalume Rehoboamu kamtuma Adoramu, iyakalile mkulu wa ng'onde tsa kunanahitsighwa, lekeni Waisiraeli wose wamkoma kwa kumtowa na mabwe. Mfalume Rehoboamu kadina mtuka ghwake ghwa ukukweghighwa na falasi, katsumila Yerusalemu. 19 Apfo Waisiraeli woluhila lukolo lwa Daudi mbaka leloli aino. 20 Waisiraeli wose hawahulike Yeroboamu koya, wamkema hana mtingano ghwa iwanu na baho wamsaghula yawe mfalume wa Isiraeli yose. Tsakuduhu munu yalukololetse lukolo lwa Daudi, ila lukolo lwa Yuda luliyeka.

21 Rehoboamu hayapfikile Yerusalemu, kawakema hamwe maasikali laki imwe na elufu semanini kulawa mna likabila lya Yuda na lya Benjamini, iwadahile ukwitowa pfinoghile, waketowe na wanu wa Isiraeli, ili woyitse keli ufalume kwa Rehoboamu mwanaghe Selemani. 22 Lekeni imbuli ya Imulungu imtsila Shemeya, imunu wa Imulungu, 23 "Mlongele Rehoboamu mwana wa Selemani na iwanu wose wa likabila lya Yuda na lya Benjamini na iwanu wose, 24 nene IMNDEWA nolonga apfino, ‘Mleke kughenda na ukwitowa na ndughu tsenu Waisiraeli. Chila munu yoke ukaye yake kwaapfila chinu achino chilawa kuna nene.’" Apfo wategheletsa chayalongile IMNDEWA, na woya ukaye ka pfayalaghitse IMNDEWA.

25 Kuya Yeroboamu kaghutsenga keli ghumji ghwa Shekemu ighuli mna chidunda cha Eufraimu na kakala kuko. Kuya koka kaghenda kughutsenga ghumji ghwa Penueli. 26 Baho Yeroboamu kanza kwilongela mwenyegho, "Lelo ng'ambe ufalume wakuya keli kwa lukolo lwa Daudi. 27 Ka iwanu awano watsoghendelela kughenda kutambika kuna ing'anda ya Imulungu ako Yerusalemu, kuko imomoyo yawo itsomhundukila mkulu wawo Rehoboamu mfalume wa Yuda. Nawo watsong'oma na wakuya kwa mfalume wawo Rehoboamu." 28 Hayawaghutsile iwanu choni cha ukutenda, baho kafina pfinyagho pfili pfa ng'ombe wa nzahabu, kawalongela, "Mwemwe mwipfa ghendo kughenda Yerusalemu ukutambika. Lelo mwemwe Waisiraeli aino milungu yenu iwalapfile Misiri." 29 Keka chinyagho chimwe cha ing'ombe mna ghumji ghwa Beteli na chinyagho chingi mna ghumji ghwa Dani. 30 Chinu achino chiwa nzambi kwaapfila iwanu tsawaghenda hata Dani ili kutali ghendo kuchitambikila. 31 Kuya Yeroboamu katsenga matsabahu hanu ha ukutambikila, kawasaghula iwanu wawe watambika, iwanu iwali si wa lukolo lwa Lawi baye.

32 Yeroboamu katenda chihungo mna ghumwetsi ghwa nane ghwa tsuwa lya kumi na tano, chiwe ka chihungo ichitendekagha mna isi ya Yuda, na kalapfa nambiko hana imatsabahu. Katenda pfipfo ako Beteli kwa ukutambika hana ichinyagho cha ing'ombe iyamfinile. Na kuko Beteli kaweka iwatambika hanu ha ukutambikila hayatsengile. 33 Mna litsuwa lya kumi na tano lya ghumwetsi ghwa nane, iyaghusaghule yeye mwenyegho, kalapfa nambiko hana imatsabahu iyaitsengile ako Beteli. Apfo katenda chihungo acho chiwe cha wanu wa Isiraeli na kagheluka kune matsabahu kudusula ubani.