1 Kwa miyaka midatu tsakuduhu ng'ondo mna isi ya Isiraeli na Siriya. 2 Mna ghumwaka ghwa kadatu mfalume Yehoshafati wa Yuda kahulumka kaghenda kumlola mfalume Ahabu wa Isiraeli.

3 Mfalume Ahabu kawalongela watumighwa wake, "Angu ng'ammanyile baye ka ghumji ghwa Ramoti Gileadi ghwa kwetu, na ng'atutenda chinu chochose baye kughuyitsa kulawa kwa mfalume wa Siriya?" 4 Apfo kamghutsa Yehoshafati, "Pfihi kutsoghenda hamwe na nene kwitowa na Ramoti Gileadi?" Yehoshafati kamwidika Ahabu, "Nene na ghweghe twa chinu chimwe, wanu wangu ka wanu wako, na falasi wangu ka falasi wako." 5 Lekeni Yehoshafati pfipfila kamlongela Ahabu, "Lekeni tanu umghutse IMNDEWA yolonga choni."

6 Lelo mfalume Ahabu kawakema hamwe manabii wose iwopfika miya nne, kawaghutsa, "Pfihi ng'ende kughutowa ghumji ghwa Ramoti Gileadi au ndeke kughenda?" Nawo wamwidika, "Ghenda, IMNDEWA katsokwing'a mmoko mwako."

7 Lekeni Yehoshafati kaghutsa, "Angu ahano haduhu nabii wa IMNDEWA wa kumghutsa?"

8 Naye mfalume Ahabu wa Isiraeli kamwidika Yehoshafati, "Kabaha yumwe iyakalile, ayo twodaha kumghutsa IMNDEWA kubitila yeye, taghwa lyake Mikaya mwana wa Imla, lekeni nene nomwihila kwaapfila ng'olonga chinu chochose baye chinoghile mna nene, lekeni yeye kalongagha ghehile ghaliyeka." Yehoshafati kedika, "Ng'apfinoghile baye mfalume yalonge apfo."

9 Baho Ahabu kamkema mtumighwa wake yumwe kamlongela, "Ngalileni Mikaya mwana wa Imla sambi baha."

10 Apfo mfalume wa Isiraeli na mfalume Yehoshafati wa Yuda wakala mna ipfighoda pfawo pfa ufalume hana ichibwalu cha ukubetela, hana lilango lya ghumji, lya ukwingilila Samaria, na manabii wose wang'ali wotabiri hambele hawo. 11 Naye Sedekiya mwana wa Kenaana, yumwe wa manabii, ketengenetsela membe tsa chuma, kalonga, "IMNDEWA kolonga apfino, ‘Kwa tsimembe atsino kutsowoyitsa kuchughu Wasiriya mbaka wakomighwe.’ " 12 Na awala manabii wamwenga wose wang'ali wolonga chinu chicho, walonga, "Ghenda ukaghutowe Ramoti Gileadi, na IMNDEWA katsomwika mfalume wake mna ghumoko ghwako."

13 Na imsenga ayula iyaghendile kumkema Mikaya, kamlongela, "Lola, manabii wose wolonga mfalume katsowatowa maaduwi, naghwe nokulomba utende ka wawo, utabili ighanoghile."

14 Lekeni Mikaya kamwidika, "Neleha kwa IMNDEWA iyali mgima, nitsomlongela achila chayonongela IMNDEWA."

15 Mikaya hayapfikile, mfalume kamghutsa, "Pfihi tughende tukaghutowe ghumji ghwa Ramoti Gileadi au tuleke kughenda?" Naye kamwidika, "Ghenda naghwe kutsoghutowa, IMNDEWA katsokwing'a ghumji aghwo mmoko mwako."

16 Mfalume kamlongela, "Nikutenda wilahe mala ngapi ili haulonga na nene kwa taghwa lya IMNDEWA ulonge igholongesa?"

17 Kuya Mikaya kamwidika, "Niwona Waisraeli wapwililika mpfidunda ka wang'olo iwalihela mdimi, na IMNDEWA kalonga, ‘Iwanu awano wahela munu wa ukuwalongotsa, mleke chila munu yoke tseghamba ukaye yake.’ "

18 Baho Ahabu kamlongela Yehoshafati, "Kwakona? Nene sikulongele baye ka yeye ng'alongagha ghanoghile baye kuna nene ila ighehile ghaliyeka?"

19 Kuya Mikaya kalonga, "Lelo tegheletsa chayolonga IMNDEWA, nimwona IMNDEWA kakala hana ichighoda chake cha ufalume akuno malaika wema wamtsunguluka kujilo kwake na kumoso kwake. 20 Naye IMNDEWA kaghutsa, ‘Nani yatsombugha Ahabu yaghende yakakomighwe ako Ramoti Gileadi?’ Apfo ayuno kolonga apfino na yungi kolonga apfino. 21 Baho, muhe yumwe kema hambele ha IMNDEWA, kalonga, ‘Nene nitsombugha.’ 22 IMNDEWA kamghutsa ‘Kwa nzila yachi?’ Naye kedika, ‘Nitsoghenda na kwitenda muhe wa ughutsu na kuwatenda manabii wake wose walonge ughutsu’ Imulungu kamlongela, ‘Ghweghwe kutsodaha ukumbugha, ghenda ukatende apfo.’"

23 "Apfo IMNDEWA kawatenda manabii wako wose walonge ughutsu. IMNDEWA kalonga ghehile ghakupate."

24 Sedekiya mwana wa Kenaana, kamsoghelela Mikaya, kamtowa mwikanza kuya kamghutsa, "Kulawa tsuwachi muhe wa IMNDEWA yandekile nene, na yatse kulonga na ghweghwe?"

25 Mikaya kamwidika, "Litsuwa haukwingila mna ichiheleto chili mghati kwipfisa, baho kutsomanya."

26 Ahabu kalaghitsa, "Msoleni Mikaya mmuyitse kwa Amoni, mkulu wa ghumji, na kwa Yoashi, mwana wa mfalume. 27 Kuya walongeleni wamwike mchifungo, na wamwing'e chighate chidogho, na ghamatsi mbaka nene hanikuya mgima."

28 Mikaya kalonga, "Ka kwakuya mgima, IMNDEWA ng'alongile na nene baye." Kuya kaghendelela kulonga, "Mwemwe wanu wose mghakumbuke aghano!"

29 Apfo mfalume Ahabu wa Isiraeli na mfalume Yehoshafati wa Yuda wawaghala iwakulu wawo wa ing'ondo kuna ghumji ghwa Ramoti Gileadi. 30 Mfalume Ahabu kamlongela Yehoshafati, "Hanighenda ukwitowa nene nitsopfala magwanda ghangu ghangi, lekeni ghweghwe pfala magwanda ghako gha chifalume."

31 Apfo mfalume wa Siriya kawalaghitsa iwakulu wa ing'ondo selasini na weli wa imituka ya ukukweghighwa na falasi, kawalongela, "Mleke ukwitowa na munu wowose ayula, yawe mdodo au mkulu, mwemwe mumtowe mfalume wa Isiraeli yaliyeka." 32 Iwakulu wa ing'ondo hawamwonile Yehoshafati walonga, "Ayuno ka mfalume wa Isiraeli ghendo." Apfo wahunduka waghenda wakamtowe, lekeni Yehoshafati hayakemelele, 33 iwakulu wa ing'ondo watanga ka yeye si mfalume wa Isiraeli baye, apfo waleka ukumuwinzilitsa. 34 Lekeni munu yumwe kasa minde kamuhoma mfalume wa Isiraeli bila kumanya. Ahabu kamlongela iyakwendesa ghumtuka ghwake ghwa ukukweghighwa, "Yuitsa ghumtuka ghwako ghwa ukukweghighwa kuchughu, unilapfe akuno kuna ing'ondo, miyagho wandagha."

35 Na ing'ondo tsayongetseka tsuwa alyo, akuno mfalume kaghamila ghumtuka ghwake ghwa ukukweghighwa, kelolesa na iwanu wa Siriya, na haipfikile nemihe kafa. Na idamu ilawile mna ipfilonda pfake yenela mghati mwa ghumtuka ghose. 36 Na litsuwa haling'ali litsama, maasikali wose walila, walonga, "Chila munu yoke ukaye yake, chila munu yoke mna isi yake."

37 Apfo mfalume Ahabu kafa na kasolighwa mbaka Samaria na wamtsika kuko. 38 Ghumtuka ghwake ghwa ukukweghighwa na falasi waghuhofugha mna litsimbu lya Samaria, na wambwa walambita idamu yake, nawo wapinga pfiweghe tsawogha mumo, ka longa lya IMNDEWA pfalilongile.

39 Ghangi ghayatendile Ahabu, na chila chinu chayatendile, na pfayatsengile ing'anda kwa membe tsa nembo, na imiji yose ina ubanda iyaitsengile, ghose ghandikighwa mna ichitabu cha kumbukumbu cha wafalume wa Isiraeli. 40 Ahabu kafa na mwanaghe Ahazia kawa mfalume hanu hake.

41 Yehoshafati mwana wa Asa kanza kutawala mna isi ya Yuda mna ghumwaka ghwa kane ghwa utawala wa Ahabu mfalume wa Isiraeli. 42 Yehoshafati tsakana miyaka selasini na tano hayawile mfalume, na katawala Yerusalemu kwa miyaka ishilini na tano, na mai wake tsakakemighwa Azuba neghe Shilihi. 43 Katenda ghaghala ghayatendile aba wake Asa, na ng'aghalekile baye, katenda ighanoghile hambele ha IMNDEWA. Ila ipfidanando pfa ukutambikila ng'apfihinyighwe baye, iwanu waghendelela kutambika na kudusula mapfumba mpfidanando apfo. 44 Yehoshafati pfipfila keleghana na mfalume wa Isiraeli wakale bila ukwitowa. 45 Ghangi ghayatendile Yehoshafati, ukulu wa ngupfu tsake, na apfila pfayadahile ukwitowa, ghose ghandikighwa mna ichitabu cha kumbukumbu cha wafalume wa Yuda. 46 Kawawinga iwamale wose iwowasa na wamale wayao mna ipfidanando pfa ukutambikila, iwasighale muisi mna ghamatsuwa gha aba wake Asa. 47 Tsa kukala kuduhu mfalume mna isi ya Edomu, ila isi tsaitawalighwa na munu iyekighwe na mfalume wa Yuda yamwapfile. 48 Yehoshafati katengenetsa meli ng'ulu itsikemighwe Tarishishi, tsighende Ofiri kusola nzahabu, lekeni ng'atsipfikile ako baye kwaapfila tsatsihinyika ako Esioni Geberi. 49 Matsuwa ghagho Ahazia mwana Ahabu tsakamlongela Yehoshafati, "Waleke watumighwa wangu waghende na watumighwa wako mna tsimeli," lekeni Yehoshafati kalemesa.

50 Naye Yehoshafati kafa na katsikighwa kuna ghumji ghwa Daudi. Na Yehoramu imwanaghe kawa mfalume hanu hake.

51 Ahazia imwanaghe Ahabu kawa mfalume wa Isiraeli ako Samaria mna ghumwaka ghwa kumi na saba ghwa ukutawala mfalume Yehoshafati wa Yuda, na katawala kwa miyaka mili ako Samaria. 52 Katenda ghehile hambele ha IMNDEWA, kwa ukutenda ghaghala ghawatendile aba wake Ahabu na mai wake Yezebeli, na ghaghala ghayatendile Yeroboamu mwanaghe Nebati, iyawahonzile Waisireli nawo watende nzambi. 53 Kamsang'anila mlungu Baali, na kamtambikila, na kamtenda IMNDEWA, Imulungu wa Isiraeli, yaghudubuke, ka pfayatendile aba wake.