1 Selemani kanza ukutsenga ing'anda ya Imulungu mna ghumwaka ghwa miya nne na semanini kulawa Waisireli hawalawile Misiri. Aghwo tsa mwaka ghwa kane kwa Selemani kutawala mna isi ya Isiraeli, mna mwetsi ghwa keli, ighukemighwe ghumwetsi ghwa Zifu. 2 Ing'anda Selemani iyamtsengele IMNDEWA tsaina utali wa futi tisini, na ughatsi wake futi salasini, na kughenda kuchanya futi alubaini na tano. 3 Na ichikuta cha ing'anda china utali wa futi salasini, ka pfauli ughatsi wa ing'anda, kuya ichikuta acho chilawa kunze hambele ha ing'anda kwa ughatsi wa futi kumi na tano. 4 Kagheka madilisha mna ing'anda ayo, kunze ghoneka masisili na mghati ghoneka maghatsi. 5 Mna ubanda wa ing'anda, katsenga pfiheleto ipfitsunguluke ubanda wose, mbaka hanu haenzeluke ng'ani. 6 Pfiheleto pfili hasi, mna apfila ipfiheleto ipfongetseke, tsapfina utali wa futi saba na nusu, na apfila ipfili uchanya tsapfina utali wa futi tisa, na apfila ipfili uchanya ng'ani tsapfina utali wa futi kumi na nusu. Unene wa ubanda wa hasi tsa mkulu kubita unene wa ubanda wa haghati, nawo tsa mkulu kubita wa ubanda wa uchanya, ili imighamba ileke kwingila mna ubanda wa ing'anda. 7 Ing'anda haing'ali yotsengighwa, kuduhu iyahulike inyundo wala chinu chochose cha chuma chodughighwa, kwaapfila tsaitsengighwa kwa ghamabwe ighasongolighwe kulawa kuko kwaghabulighwe. 8 Mlango ghwa ing'anda ya hasi ghwikighwa ubali wa kusini wa ing'anda. Mghati katsenga ngatsi ya ukudinila mna ipfiheleto pfa haghati na pfa uchanya. 9 Apfi pfipfo mfalume Selemani pfayaitsengile ing'anda ya Imulungu. Kaihaghala kwa tsiboliti na mibiki ya miyeletsi. 10 Katsenga pfiheleto apfo ipfisunguluka ing'anda yose na chila chimwe tsachina chimo cha futi saba na nusu na pfikindighwa na mibiki ya mweletsi kulawa kuna ubanda wa ing'anda. 11 IMNDEWA kamlongela Selemani, 12 "Kwa ing'anda aino yautsenga, ung'aghakinda ghamalaghiso ghangu na imiko yangu yanikulaghitsa, nitsokutendela achila chanimlongele aba wako Daudi. 13 Nitsokala na Waisiraeli, wala sitsowaleka baye iwanu wangu wa Isiraeli." 14 Apfo Selemani katsenga ing'anda ayo na kaimalitsa.

15 Kakutandatsa mghati mwa ubanda kwa mbao tsa miyeletsi kulawa hasi mbaka kuchiswili, apfo kaughubika ubanda awo kwa mibiki, na hasi katandatsa mbao tsa miboreshi. 16 Ichiheleto cha mghati ichikemighwe Hanu haenzeluke ng'ani, chigholighwa kuchughu mng'anda, na utali wake tsafuti salasini nacho kachitandatsa na mbao tsa miyeletsi kulawa hasi mbaka kuchiswili. 17 Na ichiguta ichili hambele ha hanu Haenzeluke ng'ani tsachina utali wa futi sitini. 18 Na mghati mwa ing'anda tsakuna mbao tsa miyeletsi, itsihambighwe pfibuyu na maluwa ighasanule. Chila hanu haghubikighwa na miyeletsi, kuduhu libwe ilyoneke. 19 Keka ghoya ichiheleto cha ukwikila lisanduku lya lilaghano lya IMNDEWA, ichiheleto chili mmghati ghendo. 20 Ichiheleto acho chikala na utali wa futi salasini, na ughatsi wake futi salasini, na chimo chake futi salasini, nacho chighubikighwa nzahabu inoghile. Pfipfila kaighubika imatsabau kwa mbao tsa mweletsi. 21 Selemani kaghubika mghati mwa ing'anda kwa nzahabu inoghile, kaika ilebele imikufi ya nzahabu hambele ha ichiheleto cha mghati, ichikandikighwe nzahabu.,, 22 Apfo mghati mwa ing'anda yose kaghubika nzahabu. Pfipfila kaighubika nzahabu imatsabahu ili hanu haenzeluke ng'ani.

23 Mna ichiheleto chili mghati kahongola kwa mibiki ya mitseituni pfiumbe pfibili wane mabawa iwokemighwa makelubi, chila yumwe tsakana chimo cha futi kumi na tano. 24 Chila bawa tsalina utali wa futi saba na nusu, apfo tsakuna futi kumi na tano kulawa utsighilo wa bawa limwe mbaka wa libawa lingi. 25 Ikelubi wa keli pfipfila tsakana utali wa futi kumi na tano, kwaapfila wose awo weli tsaweghala, na tsawana umbo limwe. 26 Utali wawo kughenda kuchanya tsa futi kumi na tano. 27 Kaweka makelubi awo mna ichiheto chili hanu haenzeluke ng'ani cha ing'anda ya Imulungu, akuno ghamabawa ghawo ghapamanuka. Na bawa lya kelubi yumwe ligusa ubanda umwe, na libawa lya kelubi yungi ligusa ubanda ungi, akuno ghamabawa ghao ghangi ghegusa haghatighati ha ichiheto. 28 Kawakandika nzahabu makelubi awo. 29 Ubanda wose utsunguluke ing'anda, mna ichiguta hanu haenzeluke ng'ani kachola makerubi, na mitende na maluwa ighasanule. 30 Kapfikandika nzahabu hasi ha ipfiheleto pfa mghati na pfa kunze. 31 Haukwingilila mna ichiheleto cha mghati, kahongola milango ya mibiki ya mitseituni, na pfitsingiti na miimo ikala ya umbo lya membe tano. 32 Na mna imilango ayo mili ya mitseituni kasongola makelubi, na mitende, na maluwa ghasanule, na imicholo ayo kaikandika nzahabu. 33 Pfipfila kasongola lilango lya mbiki ghwa mtsetuni lya membe nne lya ukwingilila hachikuta. 34 Tsakuna milango mili ya kupfeduka ya mbiki ghwa mboreshi, chila ghumwe tsaghuna bawaba itsitenda ghupfeduke. 35 Mna imilango ayo, kasongola makelubi, na mitende, na maluwa ighosanula, na kaikandika nzahabu. 36 Katsenga uwa wa mghati hambele ha ing'anda ya Imulungu, na ubanda wake utsungulutsighwa wa ghamabwe ugholeka mala ndatu, na mchanya mwa ghamabwe agho keka mibiki ya miyeletsi. 37 Ghumsingi ghwa ing'anda ya IMNDEWA ghutsengighwa mna ghumwetsi ghwa keli, ighukemighwe ghumwetsi ghwa Zifu, mna ghumwaka ghwa kane ghwa utawala wa Selemani. 38 Mna ghumwetsi ghwa nane, ighukemighwa ghumwetsi ghwa Buli, mna ghumwaka ghwa kumi na moja, ing'anda tsaimalitsika kutsengighwa, ka apfila mfalume Selemani pfayabamile ukutsenga. Selemani kaitsenga ing'anda ayo kwa miyaka saba.