1 Longa lya IMNDEWA limtsila nabii Yehu mwanaghe Hanani, limlonga Baasha apfino, 2 "Nene nikwinula kulawa mtimbwisi na nikutenda uwe chilongotsi wa iwanu wangu Isiraeli. Ghweghwe kumwigha Yeroboamu na kuwahonza wanu wangu wa Isiraeli watende nzambi, na kunenda nene nighudubuke kwa nzambi tsawo tsawanendele. 3 Apfo nitsommalitsa Baasha na iwanu wa ikaye yake, na nitsowatendela iwanu wa ikaye yake ka pfaniwatendele iwanu wa ikaye ya Yeroboamu mwana wa Nebati. 4 Munu wowose wa Baasha iyakufila ukaye wambwa watsomja, na ayula iyakufila kumghunda wapfideghe wali mlanga watsomja."

5 Ghangi ghayatendile Baasha mna ukutalawa kwake, na chila chinu chayatendile, ghose ghandikighwa mna ichitabu cha kumbukumbu cha wafalume wa Isiraeli. 6 Baasha kafa na katsikighwa Tiriza na mwanaghe Ela kawa mfalume hanu hake.

7 Lilonga alila lya IMNDEWA limtsila nabii Yehu mwanaghe Hanani, kumlonga Baasha na wanu wake tsalitsa kwapfila tsakatenda ghehile hambele ha IMNDEWA. Kamtenda yaghudubuke kwa aghala ghayatendile kwa ghamoko ghake, katenda ghaghala ghayatendile Yeroboamu na iwanu wake. IMNDEWA pfipfila kaghudubuka kwaapfila Baasha tsakawakoma iwanu wa ikaye ya Yeroboamu.

8 Mna ghumwaka ghwa ishilini na sita ghwa mfalume Asa wa Yuda, Ela mwanaghe Baasha kawa mfalume, naye katawala ako Tiriza kwa miyaka mili.

9 Lekeni Zimri, imtumighwa wake, iyemilile inusu ya imituka yake ya ukukweghighwa, tsakabama yamkome. Matsuwa agho, Ela yang'ali yakunwa imbwali mna ing'anda ya Arisa, iyakalile mkulu wa ing'anda ya chifalume ya Tiriza. 10 Apfo Zimri kengila mng'anda kamtowa mbaka kamkoma. Kuya Zimri kawa mfalume, kakinda hanu hake. Alino lilawila Asa hayawile mfalume wa Yuda kwa miyaka ishirini na saba.

11 Baho Zimri hayanzile kutawala, na kukalila chighoda chake cha ufalume, kawakoma wanu wose wa ikaye ya Baasha, ng'amlekile baye hata mmale yumwe, yawe ndughu au sale yake. 12 Apfo Zimri kawakoma iwanu wa ikaye ya Baasha ka apfila IMNDEWA pfayamlongile Baasha kubitila nabii Yehu. 13 Agho ghalawila kwaajili ya tsinzambi tsose tsawatendile Baasha na imwanaghe Ela, itsiwahonzile Waisiraeli nawo watende nzambi, apfo wamtenda IMNDEWA, Imulungu wa Isiraeli yaghudubuke kwa pfinyagho pfa imilungu yawo. 14 Ghangi ghayatendile Ela mna ukutalawa kwake, na chila chinu chayatendile, ghose ghandikighwa mna ichitabu cha kumbukumbu cha wafalume wa Isiraeli.

15 Mna ghumwaka ghwa ishilini na saba ghwa mfalume Asa wa Yuda, Zimri tsakatawala kwa matsuwa saba ako Tiriza. Lelo wanu wa Isiraeli weka indalo yawo habehi na ghumji ghwa Gibetoni, ghwa Wafilisti. 16 Na iwanu wa Isiraeli hawahulike ka Zimri katenda tsengwe kamkoma mfalume, baho wamsaghula Omri, mkulu wa ng'ondo, yawe mfalume wa Isiraeli mna litsuwa lilyo. 17 Apfo Omri akuno kelongotsa na Waisiraeli walawa Gibetoni, waghenda kughutowa ghumji ghwa Tiriza. 18 Na Zimri hayonile ghumji ghusolighwa, kaghenda kuna lihandaki ilili mna ing'anda ya mfalume, kailakatsa ing'anda ayo, naye kafila mumo. 19 Ilawila apfo kwa tsinzambi tsayatendile, tsakatenda ghehile hambele ha IMNDEWA, katenda ghaghala ghayatendile Yeroboamu na ghayawahonzile Waisiraeli watende. 20 Ghangi ghayatendile Zimri mna ukutalawa kwake, na litsengwe lyayatendile, ghose ghandikighwa mna chitabu cha kumbukumbu cha wafalume wa Isiraeli.

21 Hayafile Zimri, iwanu wa Isiraeli wagholeka mna makingili meli, wamwenga wambama Tibini mwana wa Ginati yawe mfalume wawo, na wanu wamwenga wambama Omri. 22 Lekeni iwanu iwambamile Omri tsawana ngupfu kubita iwanu iwambamile Tibini mwana wa Ginathi, apfo Tibini kafa na Omri kawa mfalume. 23 Mna ghumwaka ghwa salasini na ghumwe ghwa mfalume Asa wa Yuda, Omri kanza kutawala Isiraeli, katawala kwa miyaka kumi na mili, miyaka sita ako Tiriza. 24 Kaghula ichidunda cha Samaria, kwa kilo sabini tsa fetsa kulawa kwa munu iyakemighwe Shemeri, katsenga ghumji mchanya mwa ichidunda acho, na kaghukema ghumji agho Samaria, iwanu wamkumbukeghe Shemeri, imunu iyana ichidunda acho ghumwande.

25 Omri katenda ghehile hambele ha IMNDEWA, katenda ghehile kubita wafalume wose iwamlongolele, 26 kwaapfila katenda ghaghala ghayatendile Yeroboamu, mwana wa Nebati, na kwa tsinzambi tsake kawahonza Waisiraeli. Apfo wamtenda IMNDEWA, Imulungu wa Isiraeli yaghudubuke kwa kutambikila pfinyagho pfa milungu. 27 Ghangi ghayatendile Omri mna ukutalawa kwake, na ghose ighanoghile, na chila chinu chayatendile, ghose ghandikighwa mna ichitabu cha kumbukumbu cha wafalume wa Isiraeli. 28 Omri kafa na katsikighwa ako Samaria, na mwanaghe Ahabu kawa mfalume hanu hake.

29 Mna umwaka wa salasini na nane wa ukutawala Asa mfalume wa Yuda, Ahabu mwana wa Omri kawa mfalume wa Isiraeli, na kaitawala Isiraeli aku kakala Samaria kwa miyaka ishilini na mili. 30 Naye Ahabu kamtendela IMNDEWA ghehile kubita wafalume wose iwamlongolele. 31 Ng'onile baye ka pfiha ukutenda aghala ighehile ghayatendile Yeroboamu mwana wa Nebati, lekeni pfipfila kamkwela Yezebeli neghe Etibaali, mfalume wa Sidoni, na kanza kumsang'anila na kumtambikila Baali. 32 Kamtsengela Baali matsabahu mghati mwa ing'anda ya ukutambikila iyamtsengele Baali ako Samaria. 33 Pfipfila Ahabu katenda chinyagho cha Ashela mulungu pinga. Ahabu kamtenda IMNDEWA, Imulungu wa Isiraeli yaghudubuke kubita wafalume wose iwamlongolele yeye. 34 Mna ghamatsuwa ghake Ahabu gha ufalume, Hieli iyolawa Beteli, kaghutsenga keli ghumji ghwa Yeriko. Ka apfila IMNDEWA pfayalongile kubitila Yoshua mwana wa Nuni, Hieli kafilighwa na imwanaghe mmale chaudele Abiramu hayang'ali yakwika ghumsingi ghwa Yeriko, na pfipfila kafilighwa na imwanaghe mmale mtsuwanda, iyakemighwe Segubu, hayang'ali yakwika ghamalango gha Yeriko. Ilawila ka pfipfila pfayalongile IMNDEWA kubitila mtumighwa wake Yoshua mwana wa Nuni.