1 Selemani hayamalitse ukutsenga ing'anda ya IMNDEWA, na ing'anda yake ya chifalume na chila chinu chayabamile ukutenda, 2 IMNDEWA kamlawila lwa keli ka pfayamlawile akula Gibeoni. 3 IMNDEWA kamlongela, "Nihulika ghose ghaunilombile na ghaubama, niitenda ing'anda aino yaunitsengele ienzeluke, kwa kulika taghwa lyangu likale amwo matsuwa ghose. Nenge tsangu na ghumoyo ghwangu pfitsakuwa baho hana ing'anda aino matsuwa ghose. 4 Naghwe ung'awinza nzila tsangu kwa ghumoyo ghwako ghwose na kunitoghola nene ka aba wako Daudi pfayatendile, na kukinda malaghitso ghangu na imiko yangu yose na ghamalamtsi ghangu, 5 nene nitsochitenda ichighoda chako cha ufalume chime ghendo mna Isiraeli yose ka pfatwilaghane na aba wako Daudi ahala hanongile, ‘Ng'utsokala hela baye bila kuwa na mtsukulu yumwe iyatsokalila ichighoda cha ufalume cha Isiraeli.’ 6 Lekeni ghweghwe au wanagho wang'aleka kuniwinza na kukinda malaghitso ghangu ghanikwing'ile, na mng'aghenda kuisang'anila milungu ingi, 7 nitsowawinga Waisiraeli woke mna isi yaniweng'ile na nitsoilema ing'anda aino yaniitendile yenzeluke likale taghwa lyangu. Baho iwanu wa Isiraeli watsakuwa chinu cha kubetsighwa na kusekighwa na iwanu wose wa isi tsingi. 8 Hata ka ing'anda aino inogha apfino, lekeni chila munu iyobita ahano katsakwiduka na katsoibetsa na kulonga, ‘Heule IMNDEWA kaitenda apfino isi aino na ing'anda aino?’ 9 Nawo wanu watsakwidika, wolonga, ‘Kwaapfila wamleka IMNDEWA, Imulungu wawo, iyawalapfile wahenga wawo Misiri, welapfa kwa milungu ingi, waitambikila na waisang'anila, apfo IMNDEWA kawaghalila ghamaghayo aghano ghose.’"

10 Haimalile miyaka ishilini, imiyaka ya Selemani ukutsenga ing'anda ya IMNDEWA, na ing'anda yake ya chifalume, 11 mfalume Selemani kamwing'a Hiramu mfalume wa Tiro miji ishilini mna isi ya Galilaya, kwaapfila Hiramu tsakamwing'a mibiki ya miyeletsi na miberoshi na inzahabu iyabamile. 12 Naye Hiramu kaghenda kuilola imiji ayo Selemani iyamwing'ile, lekeni ng'aimnoghele baye. 13 Apfo Hiramu kamghutsa Selemani, "Miyangu, angu aino miji yachi yungayile?" Apfi pfipfo imiji ayo pfaikemighwa isi ya Kabuli mbaka leloli aino, kwaapfila tsa si chinu ghendo baye. 14 Hiramu kamghalila Selemani nzahabu kilo ka elufu nne.

15 Na apfino pfipfo mfalume Selemani pfayekile tsing'onde tsa ukunanahitsa mna ukutsenga ing'anda ya IMNDEWA, na ng'anda yake ya chifalume, na kusindilila ingema ya Milo, na ukutsenga ubanda iutsunguluka ghumji ghwa Yerusalemu, na imiji ya Hazori, na Megido, na Gezeri. 16 Ghumji ghwa Gezeri tsaghubokighwa na mfalume Farao wa Misiri, na kaghulakatsa na moto, kawakoma Wakanani iwakalile mna ghumji agho, kuya kamghweka neghe wake, iyakwelighwe na Selemani. 17 Selemani kaghutsenga keli ghumji agho. Pfipfila kaitsenga Beti Horoni ili kuhisi, 18 na Baalati, na Tamari, ghumji ighuli mnyika mwa isi ya Yuda. 19 Katsenga imiji ya ukwikila ipfinu pfake, na ya ukwikila imituka yake, na imiji ya ukukala wafalasi na iwadina falasi. Pfipfila katsenga chila chinu chayabamile yatsenge, ako Yerusalemu, au ako Lebanoni, au mna isi yose iyailongotse. 20 Iwanu wose iwalekighwe wagima mna Waamori na Wahiti na Waperizi na Wahivi, na Wayebusi, iwali si Waisiraeli baye, 21 hamwe na iwana wawo ing'awakomighwe na Waisiraeli, awo Selemani kawananahitsa wasang'ane ngonde ng'omu mbaka leloli aino. 22 Selemani ng'amtendile baye Muisiraeli wowose yawe mtumwa, lekeni wawo tsawawa wanu wake wa ing'ondo, wawa pfilongotsi wake na wakulu wake wa ing'ondo na wa imituka yake na iwadina falasi wake. 23 Awano tsa wawo pfilongotsi mna tsisang'ano tsa ukunanahitsa iwemilile sang'ano tsa Selemani tsa ukutsenga, wakulu miya tano na hamsini wang'ali wowemilila iwanu iwang'ali iwosang'ana.

24 Neghe Farao hayokile kulawa mna ghumji ghwa Daudi na kughenda kukala mna ing'anda ya chifalume iyamtsengele Selemani, baho Selemani kaisindilila ingema ya Milo. 25 Mala ndatu chila mwaka Selemani yang'ali yolapfa nambiko tsa ukulakatsighwa, na nambiko tsa ukukala tseghamba mchanya mwa imatsabahu iyamtsengele IMNDEWA, aku kodusula mafumba hamwe na nambiko atso. Apfo pfipfo pfayaimalitse ing'anda.

26 Pfipfila mfalume Selemani tsakatsenga tsimelikebu ako Esioni Gebeli, uli habehi na Eloti mmbalimbali mwa Bahari ya Shamu ili muisi mwa Edomu. 27 Naye mfalume Hiramu katuma wanu wake iwamanyile tsisang'ano tsa ibahari wasang'ane hamwe na iwanu wake Selemani. 28 Nawo waghenda mna isi ya Ofiri, kulawa kuko wasola nzahabu kilo elufu kumi na nne wamghalila mfalume Selemani.