1 Matsuwa agho Abiya mwanaghe mmale Yeroboamu yang'ali yoghula. 2 Apfo Yeroboamu kamlongela mwehe wake, "Ghenda na wiketende ka munu yungi, waleke kukutanga ka kwa mwehe wa Yeroboamu, kuya ghenda Shilo, ako kakuko nabii Ahiya iyanongele nene nitsakuwa mfalume wa iwanu awano. 3 Sola pfighate kumi na maandatsi na chibuyu china iuki, umghalile. Naye katsokulongela choni chitsomlawila imwana wetu."

4 Apfo mwehe wa Yeroboamu katenda ka pfayamlongele mmale wake na kaghenda Shilo ukaye kwa Ahiya. Matsuwa agho tsinenge tsa Ahiya ng'atsing'ali tsikwona pfinoghile baye kwaapfila tsakalala. 5 Lekeni IMNDEWA kamlongela Ahiya, "Mwehe wa Yeroboamu kakutsa kughutsa ighatsomlawila imwanaghe iyoghula, naghwe umwidike apfino na apfino. Naye hayopfika, ketenda ka munu yungi."

6 Apfo Ahiya hayahulike ichisindo cha ghamaghulu ghake hana lilango, kamlongela, "Wingile mng'anda, ghweghwe mwehe wa Yeroboamu. Lekeni heule witenda ka kwa munu yungi. Nitumighwa nikulongele mbuli ihile. 7 Ghenda kamlongele Yeroboamu, IMNDEWA, Imulungu wa Isiraeli kolonga apfino, ‘Nikusaghula ghweghwe kulawa kwa iwanu na nikwika uwe chilongotsi wa iwanu wangu wa Isiraeli. 8 Niwaboka ufalume iwatsukulu wa Daudi, na nikwing'a ghweghwe, lekeni ghweghwe ng'uwile baye ka mtumighwa wangu Daudi, iyakindile ghamalaghitso ghangu na iyaniwinzile nene kwa ghumoyo ghwake ghwose, iyatendile ighanoghile ghaliyeka hambele ha tsinenge tsangu. 9 Lekeni ghweghwe kutenda ghehile mengi kubita awala iwakulongole, kwitendela milungu ingi na kufina pfinyagho pfa chuma, kunitenda nene ngundubuke, na kunyasa kuchughu kwako. 10 Apfo nitsotenda ghehile ghalawile mna iwanu wa ikaye ya Yeroboamu, nitsomkoma chila mwana mmale mtsuwanda wa ilukolo lwa Yeroboamu mna isi yose ya Isiraeli, yawe mtumwa au si mtumwa baye. Nitsowatenda iwanu wa ikaye ya Yeroboamu wahupe ghendo ka imunu pfayobiha imipfi mbaka imale. 11 Imunu wowose iyolowa mna ilukolo lwa Yeroboamu yang'afila ukaye, wambwa watsomja na ayula iyakufila kumghunda, wapfideghe iwali mlanga watsomja. Nilonga apfo nene IMNDEWA.’ "

12 Ahiya kamlongela mwehe wa Yeroboamu, "Lelo winuke, uye ukaye yako. Naghwe haufika kuna ghumji, baho imwana katsakufa. 13 Waisiraeli wose watsomlilila na watsomtsika. Yeye yaliyeka kulawa mna ilukolo lwa Yeroboamu iyatsotsikighwa, kwaapfila mna ilukolo lwa Yeroboamu yeye kayeka iyamnoghetse IMNDEWA, Imulungu wa Isiraeli. 14 Na leloli aino IMNDEWA katsomwinula mfalume yungi mna isi ya Isiraeli, iyatsoludumula ilukolo lwa Yeroboamu. Ona leloli aino! 15 IMNDEWA katsowatowa wanu wa Isiraeli, nawo watsohighisika ka lutsani pfaluhighisika mmatsi, katsowabula Waisraeli walawe mna isi aino inoghile iyaweng'ile sekulu tsawo, naye katsowapwililisa kutali, kumwambu kwa ghumto Eufrate, kwaapfila wamtenda IMNDEWA yaghudubuke kwa kwisongolela pfinyagho pfa Ashera. 16 IMNDEWA katsowaleka iwanu wa Isiraeli kwa ghehile ghayatendile Yeroboamu, na kawahonza Waisiraeli nawo watende ghehile."

17 Kuya imwehe wake Yeroboamu kenuka koka, kaghenda Tiriza, na hayakanyaghe ichitsingiti cha lilango, baho imwana kafa. 18 Waisiraeli wose wamtsika na wamdomboketsela, ka IMNDEWA pfayamlongele mtumighwa wake nabii Ahiya.

19 Chila chinu chayatendile Yeroboamu, apfila pfayetowile kwing'ondo, na apfila pfayatawale, pfose pfandikighwa mna chitabu cha matsuwa cha iwafalume wa Isiraeli. 20 Yeroboamu tsakatawala kwa miyaka ishilini na mili, kuya kafa. Na imwanaghe iyakemighwe Nadabu kawa mfalume, kakinda hanu hake.

21 Naye Rehoboamu imwanaghe Selemani kanza kuitawala isi ya Yuda aku kana miyaka alubaini na ghumwe, na katawala miyaka kumi na saba kuna ghumji ghwa Yerusalemu, ghumji iyaghusaghule IMNDEWA kulawa ghamakabila ghose gha Isiraeli, ghuwe hanu ha ukumtambikila yeye. Na mai wake kakemighwa Naama, munu wa Amoni.

22 Wanu wa Yuda wamtendela ghehile IMNDEWA, wamtenda yaghudubuke kwa ghehile ghao ghawatendile, tsamengi kubita aghala ghose ghawatendile sekulu tsawo. 23 Pfipfila watsenga hanu ha ukutambikila mna ipfidanando, na weka tsingutso tsa ghamabwe, na pfinyagho pfa Ashera chila hana ichidunda, na chila hana ichimbeho cha mbiki mkulu. 24 Chinu chihile kubita pfose, tsakuna mapinga pfiweghe, na wamale iwowasa na wamale wayawo, iwang'ali wokalagha baho mna ipfidanando pfawo pfa ukutambikila pfili mna isi. Wanu wa Yuda watenda pfinu pfa kudesa ipfitendighwe na iwanu wa isi tsingi iyawawingile IMNDEWA hambele ha Waisiraeli. 25 Mna ghumwaka ghwa tano ghwa ukutawala mfalume Rehoboamu, mfalume Shishaki wa Misiri kagheluka katsa kughutowa ghumji ghwa Yerusalemu. 26 Kasola pfinu pfose pfili mna ing'anda ya Imulungu, na pfose pfili mna ing'anda ya mfalume, kasola ghendo chila chinu. Pfipfila kasola tsingawo tsose tsa nzahabu tsayatengenetse Selemani. 27 Apfo mfalume Rehoboamu katengenetsa ngawo tsingi tsa shaba hanu ha atsila tsa nzahabu itsisolighwe, kuya kaweng'a iwakalitsi wakulu watsibetetse, awala iwang'ali wokalitsagha lilango lya ing'anda ya mfalume. 28 Chila mala mfalume hayaghendile kuna ing'anda ya Imulungu, iwakalitsi watsikinda tsingawo atso, na hambele watsuyitsa kuna ichiheleto cha iwakalitsi. 29 Ghamatendo ghangi na chila chinu chayatendile Rehoboamu mna utawala wake, pfose pfandikighwa mna ichitabu cha kumbukumbu cha wafalume wa Yuda. 30 Rehoboamu na Yeroboamu wang'ali wetowagha matsuwa ghawo ghose. 31 Rehoboamu kafa na katsikighwa ahala hawatsikighwe sekulu tsake kuna ghumji ghwa Daudi. Na mai wake kakemighwa Naama, kulawa Amoni. Na Abiya, imwanaghe katawala hanu hake.