1 Ghamatsuwa gha Daudi gha ukufa haghapfikile habehi, kamkema Selemani, imwanaghe, kamlongela apfino, 2 "Matsuwa ghangu gha ukuhupa muisi ghapfika, ka pfawakufa iwanu wose, apfo ugangamale uwe mmale. 3 Tenda aghala ghayokulaghitsa IMNDEWA, Imulungu wako, winza tsinzila tsake, ghakinde ghamalaghitso ghake na imiko yake na malamtsi ghake ka pfaghandikighwe mna ichitabu cha ghamalaghitso cha Musa. Naghwe kutsobweda mna chila chinu chautenda na kokose akula kwaughenda kutsobweda. 4 Ung'atenda apfo, IMNDEWA katsotenda achila chayelaghane na nene, ahala hayalongile, ‘Ka iwatsukulu wako watsokala apfila pfaibaimighwa, na wang'akinda malaghitso ghangu kwa ghumoyo ghwawo ghose, ghweghwe ng'utsokala baye bila kuwa na munu iyatsokalila ichighoda cha ufalume cha Isiraeli.’

5 "Pfipfila ghweghwe komanya ghendo achila chayanitendele Yoabu mwanaghe Seruya, apfila pfayawatendele iwakulu wa ing'ondo weli wa Isiraeli, Abineri mwanaghe Neri, na miyaghe Amasa mwanaghe Yeteli. Kawakoma ka apfila tsakuna ng'ondo. Kawakoma iwanu iwalihela matotso, na kaibakatsa idamu aila mna ghumsipi ighuli mchuno mwake, na mna imikwabatsa iili mna ghamaghulu ghake. 6 Ghweghwe komanya ichinu cha ukumtendela, uleke kumleka yalale na yafe pfipfino hela. 7 Lekeni uwe mluso kwa iwana wa Barizilai, Mgileadi na uwaleke waje hamwe naghwe hana imetsa yako, kwaapfila wawo tsawanendela ighanoghile ahala hanimtsumile ndughu yako Abusalomu. 8 Na ukumbuke ka kuna Shimei mwanaghe Gera, Mbenjamini kulawa Bahurimu, iyandighite kwa malighito makulu ahala hang'endile Mahanaimu. Lekeni hayahulumke yatse yambokele hana ghumto ghwa Yoridani, nene nilaha kwa IMNDEWA, nonga, ‘Sitsokukoma na limaghe baye!’ 9 Apfo uleke kumleka pfipfino hela, kwaapfila ghweghwe kukengela, na komanya cha ukumtendela, lidumle litwi lyake lina tsimvi, lilaghale hasi."

10 Kuya Daudi kafa, katsikighwa kuna ghumji ghwake, ighukemighwe Mji ghwa Daudi. 11 Daudi kawa mfalume mna isi ya Isiraeli kwa miyaka alubaini, miyaka saba mna ghumji ghwa Heburoni, na miyaka salasini na midatu mna ghumji ghwa Yerusalemu. 12 Selemani kawa mfalume, kachikalila ichighoda cha ufalume cha Daudi aba wake na ufalume wake tsauwa na ngupfu ghendo. 13 Lelo Adoniya, imwanaghe Hagiti, kaghenda kwa Batisheba, mai wake Selemani. Naye Batisheba kamghutsa, "Angu ukutsa kwako akuno kutsa ghoya?" Adoniya kamwidika, "Ona, nitsa ghoya." 14 Kuya Adoniya kalonga, "Nina mbuli nobama nikulongele." Batisheba kamwidika, "Longa nokutegheletsa."

15 Adoniya kamlongela, "Ka pfaumanya, nene ning'awile mfalume, na Waisiraeli wose tsawabama nene niwe mfalume wao. Lekeni ng'aiwile apfo baye, na sambi mdodo wangu kawa mfalume, kwaapfila IMNDEWA mwenyegho yuyo iyabamile yeye yawe mfalume. 16 Lekeni nina chinu chimwe cha ukukulomba, uleke kundemela." Batisheba kamghutsa, "Chinu chachi?"

17 Adoniya kamwidika, "Umlombe mfalume Selemani yangaye Abishagi iyolawa Shunami nimkwele yawe mwehe wangu, kwaapfila yeye ng'atsokulemela baye."

18 Batisheba kamwidika, "Pfinogha nitsokulongelela kwa mfalume."

19 Apfo Batisheba kaghenda kwa mfalume Selemani kumlongela Adoniya chayolomba. Mfalume kenuka yambokele mai wake, kamwinamila, naye kakala mna ichighoda chake cha ufalume. Kuya kalaghitsa chighalighwe chighoda chingi yakale mai wake, naye kakala ubali wake wa kujilo. 20 Kalonga, "Nina chinu chimwe chidodo cha ukukulomba, uleke kundemela." Selemani kaghutsa, "Chinu chachi mai? Longa sitsokulemela baye."

21 Apfo mai wake kalonga, "Umleke mkulu wako Adoniya yamkwele Abishagi, Mshunami."

22 Mfalume Selemani kamghutsa mai wake, "Heule kolomba Abishagi yakwelighwe na Adoniya, pfipfila kutsolomba yeng'ighwe na ufalume, na umanye ghendo ka yeye mkulu wangu, na yeye na mtambika Abiatari, na Yoabu mwanaghe Seruya, wose wadatu lyao limwe." 23 Baho mfalume Selemani kelighita kwa taghwa lya IMNDEWA, kalonga, "Imulungu yandiye ka Adoniya ng'akufa baye kwa ichinu achino chayalombile. 24 Apfo lelo, ka IMNDEWA iyali mgima, yeye iyanyikile nyime ghoya na ng'ale mna ichighoda cha aba wangu Daudi, iyatendile chayelaghane na nene chilawile kwa kungaya nene ufalume, na kwa watsukulu wangu, leloli aino nelaha ghendo Adoniya katsakufa."

25 Apfo mfalume Selemani kamlaghitsa Benaya, mwanaghe Yehoyada, kaghenda kamtowa Adoniya mbaka kafa.

26 Kuya mfalume kamlongela mtambika Abiatari, "Uke kuna mghunda ghwako ighuli Anatoti. Ghweghwe kobamighwa ufe, lekeni sambi sitsokukoma baye, kwaapfila tsakuduta lisanduku lya laghano lya IMNDEWA Imulungu hambele ha aba wangu Daudi, na mwihangila wose na aba wangu mna ukudununzika." 27 Naye mfalume Selemani kamuwinga Abiatari yaleke kuwa mtambika keli wa IMNDEWA, apfo chilawila achila chayalongile IMNDEWA akula Shilo kwa Eli na ilukolo lwake. 28 Yoabu hayahulike agho, katsumila kuna iluwa lwa lihema lya IMNDEWA, kakindilisa tsimembe tsa imatsabahu yahone, kwaapfila yeye kamuwinza Adoniya, lekeni tsang'amuwinzile Abusalomu baye. 29 Naye mfalume Selemani tsakahulika ka Yoabu katsumila kuna iluwa lwa lihema lya IMNDEWA, kema hana imatsabahu. Kuya Selemani kamlaghitsa Benaya, mwanaghe Yehoyada, "Ghenda kamkome!"

30 Apfo Benaya kengila mna iluwa lwa lihema lya IMNDEWA, kamlongela Yoabu, Mfalume kolonga apfino, "Ulawe kunze!" Lekeni yeye kamwidika, "Baye nitsakufila baha." Benaya koya kumlongela mfalume, "Apfi pfipfo Yoabu pfayanyidike nene."

31 Kuya mfalume kamlaghitsa Benaya, "Tenda ka pfayolonga, umkome na umtsike. Apfo nene na lukolo lwose lwa Daudi ng'atutotsa baye kwa achila chayatendile Yoabu kwa kuwakoma iwanu iwalihela matotso. 32 IMNDEWA katsomliha Yoabu kwa kuwakoma iwanu awo weli iwanoghile kubita yeye. Kwaapfila aba wangu Daudi ng'amanyile chinu chochose baye kwa ukukomighwa Abineri mwanaghe Neli, mkulu wa lijeshi wa Isiraeli na Amasa mwanaghe Yeteri, mkulu wa lijeshi wa Yuda. 33 Apfo idamu yawo itsokala mwitwi mwa Yoabu na lukolo lwake matsuwa ghawo ghose. Lekeni kwa Daudi na ilukolo lwake na ing'anda yake, na ichighoda chake cha ufalume, IMNDEWA katsoweng'a tindiwalo matsuwa ghose."

34 Apfo Benaya mwanaghe Yehoyada, kaghenda kuna iluwa lwa lihema kamkoma Yoabu, naye katsikighwa mna ghumghunda ghwake ighuli kunyika. 35 Kuya mfalume kamwika Benaya mwanaghe Yehoyada yawe mkulu wa ng'ondo, kasola hanu ha Yoabu, na Sadoki kawa mtambika, kasola hanu ha Abiatari.

36 Kuya mfalume kalaghitsa Shemei yakemighwe, naye hayatsile kamlongela, "Witsengele ng'anda mumno Yerusalemu, ukale mumo wala uleke kughenda kokose. 37 Litsuwa alila haukuka na kuloka chikolongo cha Kidironi, nokulongela ghendo kutsakufa, naghwe kutsakuwa kwihonza ghumwenyegho." 38 Shimei kamwidika, "Kulonga ghoya mfalume, nitsotenda ka pfaulongile." Apfo kakala Yerusalemu kwa matsuwa mengi. 39 Miyaka midatu haipfosile, watumwa weli wa Shimei watsumila kwa Akishi, mwanaghe Maaka, mfalume wa Gati. Shimei hayahulike ka waghenda Gati, 40 kadina chihongwe wake, kaghenda Gati kwa mfalume Akishi kuwabama, ako kawona na kawoyitsa ukaye. 41 Selemani hayahulike ka Shimei kalawa Yerusalemu kaghenda Gati na koya, 42 kamkema kamlongela, "Pfihi nene sikulongele baye wilahe hambele ha IMNDEWA, na sikukanyile baye hanongile, ‘Litsuwa alila hautsolawa kunze ya Yerusalemu kutsakufa ghendo?’ Naghwe kunyidika, ‘Chaulonga chinogha. Nitsotenda.’ 43 Heule lelo ng'utendile baye achila chawilahile kwa IMNDEWA na ng'ukindile baye achila chanikulaghitse?" 44 Mfalume kamlongela keli Shimei, "Ghweghwe komanya ghendo ghose ghehile ghaumtendele aba wangu Daudi. Na Sambi IMNDEWA katsokuyitsila aghala ghehile ghautendile. 45 Lekeni Imulungu katsonibaliki nene, na ufalume wa Daudi utsakwima ghoya matsuwa ghose hambele ha IMNDEWA."

46 Kuya mfalume kamlaghitsa Benaya mwanaghe Yehoyada, naye kalawa kaghenda kamtowa Shimei na kamkoma. Apfo ufalume wa Selemani wima ghoya.