1 Apfo mfalume Selemani kawa mfalume wa Isiraeli yose, 2 na awano wawo pfilongotsi wake wakulu iyawekile, Azaria mwanaghe Sadoki, imtambika, 3 Elihorefu na Ahiya, wanaghe Shausha, waandishi; Yehoshafati mwanaghe Ahiludi yang'ali yakwandika tsikumbukumbu; 4 Benaya mwanaghe Yehoyada, yeye tsa mkulu wa maasikali, Sadoki na Abiatari, wawo tsawatambika. 5 Azaria mwanaghe Natani, yeye tsa mkulu tsa mkulu wa pfilongotsi wose wa tsiisi. Mtambika Zabudi mwanaghe Natani, yeye tsakakala sale wa mfalume. 6 Ahishari yeye tsa mkulu wa ing'anda ya mfalume, na Adoniramu mwana wa Abda yeye yang'ali yakwimila tsisang'ano tsa ukunanahitsighwa.

7 Selemani tsakana pfilongotsi kumi na weli mna Isiraeli yose. Wawo wang'ali womghalila ipfijo mfalume na iwanu iwali hakaye yake, chila yumwe tsakaghala chijo cha mwetsi ghumwe mna chila mwaka. 8 Na aghano ghagho mataghwa ghawo, Beni huri tsachilongotsi mna ipfidunda pfa Efuraimu. 9 Beni Dekeri, tsachilongotsi wa isi tsa Makai, na Shaalbimu, na Bethshemeshi na Elonbetihanani. 10 Beni Hesedi, tsachilongotsi mna ghumji ghwa Aruboti; hamwe na isi ya Soko na isi yose ya Heferi. 11 Beni Abinadabu, mmale wake Tafati, neghe Selemani, tsakalongotsa isi yose ya Nafati Doli. 12 Na Baana mwanaghe Ahiludi, tsakalongotsa isi ya Taanaki, na Megido, na isi yose ya Beti Sheani ili habehi na ghumji ghwa Zaleti, kusini kwa Yezireeli, kwanzila Beti Shani mbaka Abeli Mehola, mbaka kuna ghumji ghwa Yokimeamu. 13 Naye Beni Geberi, tsakalongotsa isi ya Ramoti Gileadi hamwe na imiji ya Gileadi tsaikalile ya Yairi mwanaghe Manase, pfipfila tsakalongotsa isi ya Arigobu ili Bashani, na miji yake ipfikile sitini itsungulusighwe ubanda na ikalile na makomeo gha shaba mna ghamalango. 14 Ahinadabu mwanaghe Ido tsakalongotsa mna ghumji ghwa Mahanaimu na pfijiji pfake. 15 Ahimaasi tsakalongotsa isi ya Nafutali, yeye tsakamkwela Basemati, neghe Selemani. 16 Baana mwanaghe Hushai tsakalongotsa isi ya Asheri na Beloti. 17 Yehoshafati mwanaghe Parua, yeye tsakalongotsa mna isi ya Isakari. 18 Shimei mwanaghe Ela tsakalangotsa isi ya Benjamini. 19 Geberi mwanaghe Uri tsakalongotsa isi ya Gieladi, ghumwande tsailaongotsighwa na Sihoni mfalume wa Waamori, na Ogi mfalume wa Bashani. Pfipfila Giberi tsakawa mkulu wa isi ayo yose.

20 Iwanu wa Yuda na Isiraeli tsawawengi ka msanga ghwa kumwani, na wang'ali wakuja na kunwa na kudeng'a. 21 Naye Selemani katawala falume tsose kwanzila mto Eufurati, mbaka kuna isi ya Wafilisti, mbaka kuna ghumbaka ghwa isi ya Misiri. Isi tsose atsino tsiliha kodi kwa Selemani na tsimsang'anila yeye matsuwa ghake ghose ghayakalile mgima. 22 Ipfijo pfa Selemani kwa chila tsuwa tsa madebe miya ndatu na sitini gha utimbo utighinike ghendo, na madebe miya saba na ishililini gha utimbo. 23 Ng'ombe kumi wa ukufughighwa ukaye na ng'ombe ishilini wa ukudimighwa kubagho, na ng'olo miya imwe, hamwe na ayala, na kulungu, na ng'uku iwanonile.

24 Naye tsakatawala isi yose ili maghalibi mwa ghumto Eufulati kwanzila Tifsa mbaka Gaza, na kakala tseghamba chila ubali. 25 Matsuwa ghose ghayatawale Selemani, iwanu wa Yuda na iwanu wa Isiraeli kwanzila Dani mbaka Beeri Sheba tsawakala tseghamba, chila munu kakala hasi ha mitsabibu yake, na hasi ha mibiki yake ya mitini.

26 Selemani tsakana pfibanda elufu alubaini pfa ukwika wafalasi iwokwegha imituka yake, na tsakana iwadina falasi elufu kumi na mbili. 27 Iwakulu awala kumi na weli, chila yumwe mna ghumwetsi ghwake kamghalila ichijo mfalume na iwanu wose iwokala ukaye yake. 28 Pfipfila tsawaghala ishairi, hamwe na imitsani ya ukuja wafalasi iwokwegha imituka, na wafalasi wangi iwosang'ana ng'onde tsingi, waighala hanu hawali wafalasi.

29 Imulungu tsakamwing'a Selemani hekima na tsimbutsi nyingi, na kamanya pfinu pfingi ka msanga ighuli kumwani. 30 Selemani tsakana hekima kubita iwanu wose iwokala mashariki na kubita iwanu wose wa Misiri. 31 Tsakana hekima kubita munu wowose ayula, kambita mbaka Etani, ayula mwezirahi. Pfipfila kawabita Hemani, Kalikoli na Darida iwanaghe Maholi. Ukumanyika kwake tsakwenela mna isi tsose tsimtsunguluke. 32 Kandika ng'ungo elufu ndatu, na tsiwila tsibitile elufu imwe. 33 Kalonga mbuli tsa mibiki yose, kwanzila mbiki ghwa mweletsi ighuli Lebanoni, mbaka hisopo ighukota mna ubanda. Pfipfila tsakawamanya wanyama wose, wapfideghe wose, na awala wose iwotambala, na wasomba. 34 Iwanu kulawa isi tsose wamghendela Selemani kutegheletsa hekima yake, nawo tsawatumighwa na wafalume wa isi tsawo iwahulike ihekima yake.