1 Selemani kamalitsa ukuitsenga ing'anda yake ya chifalume kwa miyaka kumi na midatu. 2 Kaitsenga ing'anda ayo ya chifalume ikemighwe Ng'anda ya Mhulo ghwa Lebanoni, utali wake tsauna futi miya na hamsini, na ughatsi wake futi sabini na tano, na chimo chake futi alubaini na tano, na itsengighwa kwa misululo mine ya ngutso tsa mweletsi, aku mighamba ya mweletsi iwasitsighwa mchanya mwake. 3 Na ihaghalighwa na mighamba ya mibiki ya mweletsi iwasile mchanya mwa ngutso alubaini na tano, chila msululo mighamba kumi na tano. 4 Mna chila ubanda tsakuna misululo midatu ya madilisha ighang'ali ghelolesa. 5 Imilango na ghamadilisha yose tsaina membe nne, na imisululo midatu ya ghamadilisha mna chila ubanda tsaikala yelolesa. 6 Tsakatsenga chikuta cha ngutso, china utali wa futi sabini na tano, na ughatsi wake futi alubaini na tano. Kuya hambele ha ichikuta achino katsenga chibalatsa ichilawilile, na mchanya mwa tsingutso katsenga chiswili. 7 Selemani pfipfila katsenga chikuta cha chighoda cha ufalume, chayahighile ghamaghomba gha iwanu. Kachikema Chikuta cha Kuhighila. Kachitandatsa mibiki ya miyeletsi kulawa hasi mbaka mkano.

8 Na ing'anda yake ya ukukala imwenyegho ikalile kunzingo mwa ichikuta cha ukuhighila tsaitsengighwa ka pfaitsengighwe ing'anda ayo. Kuya Selemani katsenga ng'anda ingi ighalile na ichikuta acho iwe ya neghe Farao mfalume wa Misiri, iyamkwelile.

9 Tsing'anda tsose atso tsitsengighwa kwa mabwe gha bei ng'ulu kulawa hasi hana ghumsingi mbaka uchanya, na kunze pfipfila mbaka kuna ichibwalu. Na ghamabwe agho ghasongolighwa, na ghaganighwa kwa msumeno kwa kunze na kwa mghati. 10 Ghumsingi ghutsengighwa kwa mabwe makulu ighanoghile ghana utali wa futi kumi na tano, na ghangi gha futi kumi na mbili. 11 Mchanya mwake keka mabwe gha bei ng'ulu, kwa pfipimo ipfibamighwa, kuya keka mibiki ya miyeletsi. 12 Na uwa mkulu utsungulukighwa na ubanda iukalile una misululo midatu ya mabwe ighasongolighwe, na msululo ghumwe ghwa imighamba ya miyeletsi, ka pfachili ichikuta cha mghati cha ing'anda ya IMNDEWA, na ka pfachili ichikuta cha ing'anda ayo.

13 Kuya mfalume Selemani kamkema Huramu kulawa Tiro. 14 Ayo mai wake tsa chitsuka kulawa kabila lya Nafutali, na aba wake yang'ali yokala Tiro, na ing'onde ya ayo aba wake tsa ya kulubula na kufina shaba. Huramu tsakakengela sideke na tsakana mbutsi nyingi, kakubuhu mna chila ng'onde ya shaba. Katsa kwa mfalume Selemani, kamsang'anila ng'onde tsake tsose.

15 Huramu katengenetsa ngutso mbili tsa shaba, chila imwe chimo chake tsa futi ishilini na saba, na mtsunguluko ghwake futi kumi na nane. 16 Pfipfila kafina matwi meli kulawa mna ishaba ilubulighwe, kagheka mchanya mwa tsingutso atso. Chila litwi chimo chake tsa futi saba na nusu. 17 Pfipfila katawa nyapfu mbili tsa unzolingo kwa mikufu iyaifumile, katsika mchanya mwa ghamatwi agho, chila nyapfu mikufi saba. 18 Kulawa mna ishaba ilubulighwe, kafina pfinu ipfoneke ka matunda gha makomamanga ighakalile mna misululo mili itsunguluka chila nyapfu ya unzolingo iuli mchanya mwa ghamatwi agho. Katenda pfipfo kwa chila ngutso.

19 Ghamatwi agho ighali mchanya mwa tsingutso hambele ha ichikuta, tsaghana umbo lya maluwa ighakota mmatsi, ighokemighwa mayungiyungi, ghana chimo cha futi sita. 20 Mchanya mwa ghamatwi gha tsingutso atso mbili, hanu ihatutumke ka bakuli, habehi na tsinyapfu atsila, tsahana makomamanga aghala miya mbili ighatsunguluke mna misululo mili.

21 Huramu katsisimika tsingutso atso tsa shaba hambele ha hanu haukwingilila kuna ing'anda ya Imulungu. Ingutso isimikighwe ghumoko ghwa kujilo kaikema Yakini, na aila isimikighwe ghumoko ghwa kumoso kaikema Boazi. 22 Ghamatwi gha tsingutso atso tsaghana umbo lya maluwa ighakota mmatsi ighokemighwa mayungiyungi. Apfo ing'onde ya ukutengenetsa tsingutso imala.

23 Huramu kalubula shaba kafina bigha kulu ghendo ilikemighwe Bahari. Utali wake kughenda hasi libigha alyo tsa futi saba na nusu, na utali wake mwambu na mwambu tsa futi kumi na tano, na mtsunguluko ghwake futi alubaini na tano. 24 Hasi ha ukingo wa libigha tsakuna pfibuyu ipfifinighwe kulawa ishaba ilubulighwe, tsa pfifinighwa mna misululo mili mtsunguluko, chila futi imwe tsahana pfibuyu saba. Ipfibuyu apfo pfifinighwa hamwe na libigha alyo. 25 Libigha alyo likighwa mchanya mwa pfinyagho pfa ng'ombe wamale kumi na weli wa shaba, wadatu walola kasikazini, wadatu walola kusini, wadatu walola mashariki na wadatu walola maghalibi, aku ipfighudi pfao pfilibapa libigha alyo. 26 Unene wake tsa nchi ndatu, na mna ukingo wake libigha lighala na chikombe, ka luwa lya yungiyungi, na ling'ali likwingila lita ka elufu alubaini tsa matsi.

27 Pfipfila kafina matololi kumi gha shaba, chila tololi limwe tsa lina utali wa futi sita, na ughatsi wake futi sita, na chimo chake futi nne na nusu. 28 Na matololi agho tsaghatengenetsighwa apfino, tsakuna mabamba gha mmbali ighakindighwe na ngutso. 29 Mna ghamabamba agho tsakuna pfinyagho pfa simba, ng'ombe na makerubi, na uchanya kwao, na hasi hao weka unzolingo utawighwe pfinoghile. 30 Chila tololi tsalina mataili mane gha shaba, na machuma gha shaba ighotsungulusa ghamataili agho, na ngutso tsake nne itsihulumka, ngutso imwe kulawa chila ubali wa litololi kukindilisa ghamachuma agho. 31 Mlomo ghwa chila tololi kulawa mghati mbaka uchanya tsa futi imwe na nusu. Ghumlomo agho tsaghuna mtsunguluko ghwa futi mbili na lobo. Kuya mchanya mwa ghumlomo tsamna mabamba gha mlaba, nagho tsaghakala si gha mtsunguluko baye. 32 Na mataili agho mane tsaghakala hasi ha ghamabamba agho, na ghamachuma aghala ghakutsungulusila ghamataili ghalumbitsighwa na litololi. Ichimo cha chila taili tsa futi mbili na lobo. 33 Ghamataili ghake tsagheghala na mataili gha imituka ya ng'ondo ya ukukweghighwa na falasi. Machuma ghake, rimu tsake, habu tsake, na spoku tsake, pfose tsa pfa shaba. 34 Tsakuna maghulu mane mna tsimembe tsa chila tololi, ghamaghulu agho tsa gha chinu chimwe na litololi alyo. 35 Mchanya mwa chila tololi tsakuna ringi kulu lya shaba lya mtsunguluko, chimo chake nchi tisa. Ghamaghulu na ghamabamba ghalumbighwa mchanya mwa litololi. 36 Keka makerubi, simba na mibiki ya mitende mna ghamaghulu na ghamabamba, na chila hanu ihoneke hamwatsi, na keka unzolingo chila ubali. 37 Apfi pfipo pfayaghatengenetse ghamatololi agho kumi, na ghamatololi ghose tsagheghala ghendo kwa chila chinu.

38 Huramu katengenetsa matangi kumi gha shaba, tangi limwe kwa chila tololi. Chila limwe lisola lita ka miya nane na semanini, na utali wake tsa futi sita. 39 Keka matololi matano ubali wa kujilo, na matano ghangi kagheka ubali wa kumoso wa ing'anda ya Imulungu. Na libigha alila ilikemighwe Bahari kalika ubali wa kujilo, kuna imembe ya kusini mashariki ya ing'anda ya Imulungu.

40 Pfipfila katengenetsa mabigha, makoleo, na mabakuli gha kughidila. Apfi pfipfo Huramu pfayamalitse tsing'onde tsotse tsa ing'anda ya Imulungu tsayeng'ighwe na mfalume Selemani yatende: 41 tsingutso atsila mbili, ghamatwi meli ighali ka bakuli mchanya mwa tsingutso, na tsinyapfu mbili tsa ukuhamba ghamatwi agho meli ighali mchanya mwa tsingutso, 42 ipfinu ipfoneke ka makomamanga miya nne mna imisululo mili mna chila inyapfu imwe, ikighwe mchanya mwa ghamatwi ighali mchanya mwa tsingutso atso. 43 Pfipfila katengenetsa matololi kumi, na matangi ghake kumi, 44 na libigha alila likulu lya shaba ilikemighwe Bahari, limile mchanya mwa ipfighudi pfa ipfinyagho pfa ng'ombe wamale kumi na weli, iwalibapile libigha alyo. 45 Kuya kafina mabigha, makoleo na mabakuli. Ipfinu pfose apfino ipfili mna ing'anda ya IMNDEWA, Huramu pfayamtengenetsele Selemani, tsa pfa shaba ikuwighwe. 46 Mfalume kalaghitsa ipfinu apfo pfifinighwe kuna lidongo lya widi mna ichiwala cha Yoridani, haghati ha Sukoti na Saretani. 47 Selemani ng'apfilingile baye utito wake ipfinu pfose apfino kwaapfila tsa pfingi ng'ani, apfo utito wa ishaba ng'aumanyike baye. 48 Pfipfila Selemani kafina pfinu pfa nzahabu pfiwe pfa ing'anda ya IMNDEWA, kafina matsabahu ya nzahabu, imetsa ya nzahabu ya ukwikila ipfighate ipfienzeluke, 49 pfigutso pfa nzahabu inoghile pfa ukwikila ipfitasa, kapfika pfitano ubali wa kumoso, na pfitano pfingi kapfika ubali wa kujilo hambele ha hanu haenzeluke ng'ani, maluwa, tsitala, na mikasi, apfo pfose tsa pfa nzahabu. 50 Pfipfila kafina pfikombe, mikasi ya ukudumlila utambi wa tsitala, mabakuli makulu, mabakuli madodo, masiniya gha ukudusulila upfumba, pfihali pfa ukuhalila ghumoto, apfo pfose pfitengenetsighwa kwa nzahabu, bawaba tsa imilango, tsa ghumlango ghwa hanu haenzeluke ng'ani, na bawaba tsa ghumlango ghwa ichikuta cha ing'anda ya Imulungu, apfo pfose tsa pfa nzahabu.

51 Mfalume Selemani hayamalitse tsing'onde tsose tsa ukuitsenga ing'anda ya IMNDEWA, kapfighala ipfinu apfila aba wake Daudi pfayapfilapfile kwa IMNDEWA. Ipfinu apfo tsa fetsa, nzahabu, na pfinu pfingi, na kapfika hana ichiheleto cha ukwila ipfinu mna ing'anda ya IMNDEWA.