1 Apfo Eliya iyolawa Tishibi ili muisi ya Gileadi, kamlongela mfalume Ahabu, "Nelaha ghendo kwa IMNDEWA, Imulungu wa Isiraeli iyali mgima yanimtumikila nene, ng'akutsakuwa na tungwe baye wala mvula mna imiyaka aino ikutsa mbaka nene hanitsolonga itowe."

2 Kuya longa lya IMNDEWA limtsila Eliya, lilonga, 3 "Uke ahano ughenda mashariki, ghenda wikepfitse hana ichikolongo cha Keriti, ichili kumwambu mwa Yoridani. 4 Ako kutsakunwa ghamatsi mna ichikolongo acho, na kuko niwalaghitsa wabondwa wakwing'e ichijo."

5 Apfo katenda achila IMNDEWA chayamlongele, kaghenda kukala hana ichikolongo cha Keriti chili kumwambu mwa Yoridani. 6 Wabondwa wamghalila chighate na nyama nemitondo, na wamghalila chighate na nyama nemihe, na kanwa ghamatsi gha ichikolongo acho. 7 Lekeni matsuwa haghabitile, hambele ichikolongo acho chinyala, kwaapfila imvula ng'aitowile baye muisi.

8 Baho Longa lya IMNDEWA limtsila Eliya, 9 "Ghenda Sarefati, isi ili Sidoni, na ukale kuko, kwaapfila nimlaghitsa pinga chitsuka iyokala kuko yakakwing'e ichijo." 10 Apfo kaghenda Sarefathi. Hayapfikile hana lilango lya isi, kampfika pinga yumwe chitsuka kodondola ngodi. Eliya kamkema ipinga ayo na kamlongela, "Ndetele ghamatsi chidogho nuwe." 11 Na hayang'ali yoghenda kuleta ghamatsi, Eliya kamkema kamlongela, "Pfipfila ungalile chihande chidodo cha ichighate."

12 Lekeni ipinga ayo kamwidika, "Nelaha ghendo kwa IMNDEWA, Imulungu wako iyali mgima, nene nahela chighate, chanilinacho usaghe chidogho uli mchiya na mapfuta chidogho ighali msupa. Sambi nodondola tsingodi nikeyambikile ukaye ichijo nene na mwanangu tuje, kuya inzala itukome."

13 Eliya kamlongela, "Uleke kupfuka. Ghenda na tenda ka pfaulongile. Lekeni tanu unyambikile nene chighate chidodo kwa usaghe uli nawo, na ungalile, kuya wambike chighate chako na cha imwanagho. 14 Kwaapfila IMNDEWA, Imulungu wa Isiraeli kolonga apfino, ‘Utimbo uli mchiya mwako ng'autsohunguka baye, wala ghamapfuta ghali msupa mwako ng'aghatsomala baye mbaka IMNDEWA hayatsoghala imvula muisi.’ "

15 Apfo ipinga ayula kaghenda na katenda ka Eliya pfayamlongele. Apfo Eliya na ipinga ayula chitsuka na iwanu wa ikaye yake wawa na ichijo ichiwenele matsuwa mengi. 16 Utimbo uli mchiya ng'auhunguke baye, na ghamapfuta ighali msupa ng'aghamalile baye, ka pfipfila lilonga lya IMNDEWA lyayamlongele Eliya yalonge.

17 Hambele chidogho imwana wa ipinga ayo chitsuka yana ing'anda kaghula, na utamu awo uwa mkulu mbaka umkoma. 18 Kuya ipinga ayo kamlongela Eliya, "Ghwe munu wa Imulungu, una choni na nene? Angu kutsa kukumbusa inzambi yangu na kunikomela imwanangu?"

19 Lekeni Eliya kamlongela, "Ungaye imwanagho." Eliya kamsola imwana ayo mmambagha mwa mai wake, kamghala kuna ichiheleto ichili kuchanya chayang'ali yokala kuya kamuwatsisa mlutsatsi mwake. 20 Baho kamlilila IMNDEWA apfino, "Ghwe IMNDEWA, Imulungu wangu, angu kumghalila ghehile aghano ipinga ayuno chitsuka yanikala naye, na kumkomela imwanaghe?" 21 Kuya Eliya kamuwasila mchanya imwana ayo mala ndatu na kamlomba IMNDEWA apfino, "Umtende imwana ayuno yahumule keli." 22 IMNDEWA kahulika chayalombile Eliya, na imwana baho katsilihuka, kanza ukuhumla keli. 23 Eliya kamsola imwana, kamhulumsa kulawa kuchanya mbaka hasi kwayakalile mai wake, kamlongela, "Lola! Imwanagho mgima." 24 Apfo ipinga ayo kalonga, "Sambi nomanya ghendo ka ghweghwe kwa munu wa Imulungu, na malonga ghayakwingi'ile IMNDEWA ughalonge gholengesa ghendo."