1 Selemani keleghana na Farao mfalume wa Misiri yamkwele imwanaghe. Kamghala neghe Farao yakale kuna ghumji ghwa Daudi mbaka hayamalitse kutsenga ing'anda yake ya chifalume, na Ing'anda ya IMNDEWA, na ubanda utsunguluka Yerusalemu. 2 Mna ghamatsuwa agho iwanu wang'ali wotambika kuna ipfidanando pfa ukutsengighwa kwaapfila ing'anda ya IMNDEWA tsaing'ali ukutsengighwa. 3 Selemani tsakamkunda IMNDEWA, kakinda malaghitso ghose gha aba wake Daudi, lekeni tsayang'ali yolapfa nambiko na kudusula ubani mna ipfidanando pfa ukutsengighwa.

4 Mfalume kaghenda kutambika ako Gibeoni, kwaapfila hanu aho tsahana hanu ha ukutambikila hatsengighwe ihamanyike ng'ani kwa ukutambika. Ako Selemani kalapfa nambiko tsa ukulakatsighwa elufu imwe mchanya mwa imatsabahu ayo.

5 Kuko Gibeoni, IMNDEWA kamlawila Selemani mndoto nechilo, na Imulungu kalonga, "Unombe chochose achila chaubama nene nikwing'e."

6 Selemani kamwidika, "Ghweghwe kumtenda uluso mkulu mtumighwa wako, aba wangu Daudi, kwaapfila yeye tsakatogholighwa kuna ghweghwe, tsakanogha kwa Imulungu, na ghumoyo ghwake ghwose tsaghunogha. Naghwe kughendelela kumtendela uluso kwaapfila kumwing'a imwana iyokala mna ichighoda chake cha ufalume ka pfaili leloli aino. 7 Lelo, ghwe IMNDEWA, Imulungu wangu, kunyika nene mtumighwa wako niwe mfalume hanu ha aba wangu Daudi, lekeni nene na mwana mdodo na simanyile baye ing'onde ya ukulongotsa pfaili. 8 Sambi naahano haghati ghati ha iwanu yuwasaghule wawe wanu wako ghendo, nawo wa wengi sideke, ng'awodahika baye kupetighwa kwa apfila pfawali wengi. 9 Apfo nokulomba ungaye ghumoyo ghwa ukutegheletsa, nidahe kuwalongotsa iwanu wako ghoya na nimanye ighanoghile na ighehile. Kwaapfila nani ghendo iyodaha ukuwalongotsa iwanu wako awano iwali wengi?"

10 Chayalombile Selemani tsachimnoghela IMNDEWA. 11 Apfo Imulungu kamlongela, "Kwaapfila kulomba chinu achino, na ng'ulombile baye ukale matsuwa mengi wala uwe na mali nyingi, wala ng'ulombile baye awala iwokwihila wafe, lekeni ghweghwe kulomba umanye ukulongotsa na ukuhigha pfinoghile. 12 Nitsotenda achila chaulombile, nitsokwing'a ghumoyo ghuna ihekima na ighumanya, na kuduhu wala ng'atsolawila munu wowose baye iyakengele ka ghweghwe. 13 Pfipfila nitsokwing'a aghala ghang'aulombile baye, kutsakuwa na mali na kutsotegheletsighwa, mna ghamatsuwa ghako ghose ghaukala mgima kutsakuwa kuduhu mfalume iyali ka ghweghwe. 14 Na ung'awinza nzila tsangu, na kukinda ghamalaghitso ghangu na imiko yangu ka pfayatendile aba wako Daudi, nene nitsokwika ukale matsuwa mengi."

15 Kuya Selemani kalamka, baho katanga yang'ali yolota. Kuya koya Yerusalemu, kema habehi na lisanduku lya lilaghano lya IMNDEWA, baho katambika kwa kulapfa nambiko tsa ukulakatsa na tsa ukukala tseghamba. Kuya kawatendela chihungo watumighwa wake wose.

16 Lelo wapinga weli pfiweghe wamghendela mfalume Selemani. 17 Pinga yumwe kalonga, "Mkulu wangu nene na miyangu ayuno twokala ng'anda imwe. Nene nyeleka mwana mmale aku twawose. 18 Ikacha haipfikile naye keleka mwana. Tsatwaweli tuliyeka mng'anda, tsakuduhu munu yungi. 19 Nechilo imwanaghe kafa, kwaapfila tsakamuwasila. 20 Apfo mna ichilo chikulu, kamsola imwanangu, aku nene mtumighwa wako niwasa fofofo, kamuwasitsa hana ghamatombo ghake. Kuya kamsola imwanaghe iyafile kamuwasitsa hana ghamatombo ghangu. 21 Handamke nemitondo, nibama nimwong'etse imwanangu, baho nitanga kafa. Lekeni nemitondo hakulangale, tsanimlolesa pfinoghile imwana, baho nitanga imwana si wangu yanimweleke baye."

22 Lekeni ipinga ayula yungi kalonga, "Baye imwana mgima yuyo wakwangu, iyafile wakwako." Ipinga ayula wa kwanza kalonga keli, "Baye, iyafile yuyo wakwako, iyali mgima wakwangu." Apfo wesonga aho hambele ha mfalume.

23 Mfalume kalonga, "Ayuno kolonga, ‘Imwanangu mgima na iyafile wakwako,’ yungi kolonga, ‘Baye, imwanagho kafa na imgima wakwangu.’ "

24 Kuya mfalume kalonga, "Ngalileni limaghe." Apfo wamghalila limaghe mfalume. 25 Kuya kalaghitsa, "Mbatsuleni imwana ayuno iyali mgima, chipande chimwe mmwing'e ayuno na chingi mmwing'e miyaghe."

26 Ipinga ayula yana imwana imgima kamwonela libatsi imwanaghe, apfo kamlongela mfalume, "Dedede mfalume, umwing'e yeye imwana ayo iyali mgima, uleke kumkoma!" Lekeni ipinga yungi kalonga, "Baye, imwana yaleke kuwa wake wala wangu. Mganeni pfihande pfili."

27 Baho mfalume Selemani kalonga, "Mleke kumkoma imwana, mwing'eni ipinga wa mwanduso, yeye yuyo mai wake."

28 Iwanu wose wa Isiraeli hawahulike mfalume pfayalamle lighomba alyo, wampfuka, watanga ghendo ka Imulungu yuyo iyamwing'ile tsimbutsi tsa kuhigha ghoya ghamaghomba.