1 Naye mfalume Hiramu wa Tiro, iyawile sale yake Daudi, hayahulike ka Selemani kabakighwa mapfuta yawe mfalume, kasola hanu ha aba wake, kawatuma watumighwa wake waghende kwa Selemani. 2 Naye Selemani katuma wanu woye kwa Hiramu kumlongela, 3 "Ghweghwe komanya ghendo ka aba wangu Daudi ng'amtsengele baye IMNDEWA, Imulungu wake ing'anda ya ukutambikila, kwaapfila yeye yang'ali yetowa na iwanu wa isi tsingi tsimtsunguluke chila ubali mbaka IMNDEWA hayamwapfile kuwatowa maadui tsake. 4 Lekeni sambi IMNDEWA kanyapfila, nikala tulu ghendo chila ubali na nahela adui wala maghayo. 5 Lelo nobama nimtsengele ing'anda IMNDEWA, Imulungu wangu, ka IMNDEWA pfayamlongele aba wangu Daudi, ahala hayalongile, ‘Imwanagho yanimwika yakalile ichighoda chako cha ufalume, yeye katsonitsengela ing'anda ya ukutambikila.’ 6 Apfo walaghitse iwanu wako waniganile imibiki ya miyeletsi ya Lebanoni, wanu wangu watsosang'ana hamwe na iwanu wako mna ing'onde ayo, na nene nitsowaliha wanu wako chochose chaubama. Naghwe kwomanya ghendo ka kududu munu mna twetwe iyadahile kugana ghoya imibiki ka Wasidoni."

7 Hiramu hayahulike chayalongile Selemani tsakadeng'elela sideke, kalonga, "IMNDEWA yatunyighwe, kwaapfila kamwing'a Daudi imwana yakengele yawatawale iwanu awano wengi." 8 Apfo Hiramu katuma wanu kwa Selemani, kalonga, "Nene nihulika achila chaulongile, na nitsotenda ghose ghaubama, nitsoweng'a pfipilighwa pfa miyeletsi na miberoshi. 9 Iwanu wangu watsopfiduta na kupfihulumsa kulawa Lebanoni mbaka kuna ibahari na nitsopfoha makinzamakinza pfiyeluke mna ghamatsi mbaka pfipfike hanu haubama. Kuko wanu wangu watsopfidohola, naghwe kutsopfibokela, lekeni ghweghwe kutsongaya ichijo kwa iwanu wa ukaye yangu."

10 Apfo Hiramu kamwing'a pfipilighwa pfose pfa miyeletsi na pfa miberoshi pfayabamile. 11 Naye Selemani kamwing'a Hiramu ingano madebe laki mbili na elufu alubaini, na mapfuta gha mitseituni ghanoghile madebe miya mbili. Selemani tsakamtendela apfo Hiramu chila mwaka.

12 IMNDEWA naye kamwing'a Selemani ihekima ka pfayamlongele. Selemani na Hiramu wakala bila ukwisonga, apfo wose weli weka laghano.

13 Mfalume Selemani kawasaghula wanu elufu salasini kulawa chila hanu mna isi ya Isiraeli, wasang'ane ng'onde ng'omu tsa kunanahitsighwa, 14 naye kamwika Adoniramu yawemilile. Kawaghola mna makingili madatu, gha wanu elufu kumikumi, nawo wakala mwetsi ghumwe mna isi ya Lebanoni na miyetsi mili wakala ukaye. 15 Selemani tsakana waduta mitsigho elufu sabini, na wasongola mabwe elufu semanini iwali kupfidunda. 16 Na kaweka wanu elufu ndatu na miya ndatu wawemilile iwanu awo. 17 Kwa laghitso lya mfalume wabula mabwe makulu gha bei ng'ulu waghasongole, wakatsengele ilukwalambatsa lwa ing'anda ya Imulungu. 18 Apfi pfipfo iwanu wa Selemani na Hiramu pfawekile ghoya ghamabwe na imibiki ya ukutsengela ing'anda ya Imulungu.