1 Mfalume Ahabu kampetela Yezebeli, imwehe wake, ghose ghayatendile Eliya na pfayawakomile manabii wa mulungu Baali kwa lipanga. 2 Baho Yezebeli katuma munu yaghende kwa Eliya, kalonga, "Ayo imilungu initowe pfipfo, na inikome ghendo, ka ilupfi chipindi ka achino nene sitsokutendela ghweghwe aghala ghauwatendile manabii awo." 3 Apfo Eliya kapfuka, kenuka katsuma yaleke ukukomighwa. Kaghenda Beerisheba, ghumji ighuli muisi mwa Yuda, kamleka baho mtumighwa wake, 4 lekeni yeye mwenyegho kanga misi yose mna inyika. Kapfika hana ghumbiki ghwa mretemu kakala mchimbeho, kalomba yaleke ukufa, kalonga, "Nyipfa, ghwe IMNDEWA, sola ugima wangu, nene sinoghile baye kubita sekulu tsangu."

5 Apfo Eliya kawasa hasi hana ghumbiki aghwo, baho tsinongo tsimtsa. Kuya malaika wa Imulungu kamkinda, kamlongela, "Winuke uje chijo." 6 Eliya hayalolile, kona chighate chokighwa mna ghamakala gha ghumoto, na chibuyu cha ghamatsi habehi na litwi lyake. Kaja, kanwa, kuya kawasa keli. 7 Malaika wa Imulungu kamlawila lwakeli, kamkinda kamlongela, "Winuke uje, kwaapfila kwaughenda kutali." 8 Naye kenuka, kaja na kanwa. Kuya kanga chilo na misi kwa matsuwa alubaini kwa ngupfu ya ichijo acho mbaka kapfika Horebu, ichidunda cha Imulungu. 9 Kuko kapfikila hana imango, na ichilo acho kawasa baho. Kuya Longa lya IMNDEWA, limtsila na limlongela, "Eliya, utenda choni ahano?"

10 Kamwidika, "Nene nilapfa kuna ghweghwe, na nikutumikila kwa ngupfu tsangu tsose, ghwe IMNDEWA, Imulungu yuna ingupfu, lekeni iwanu wa Isiraeli walilema lilaghano lyako, watsihinya tsimatsabahu tsako, na wawakoma manabii wako na limaghe. Nene niliyeka yanisighale mgima, nawo wobama wanikome."

11 IMNDEWA kamlongela, "Ghenda ukeme kuchidunda hambele hangu nene IMNDEWA, kwaapfila nene nofosa." Apfo kulawila beho kulu, lina ingupfu lighwisa ipfidunda na litulatula ghamabambalawe, lekeni IMNDEWA ng'akalile mumo baye mna libeho. Libeho halimalile, kulawila mhighisiko ghwa isi, lekeni IMNDEWA ng'akalile mumo baye mna ghumhighisiko. 12 Na mhighisiko ghwa isi haghumalile, kulawila moto. Lekeni IMNDEWA ng'akalile mumo baye mna ghumoto aghwo, na ghumoto haghumalile, baho kulawila litsi ilinong'ona lughalugha. 13 Eliya hayahulike apfo, keghubika ichihanga chake kwa gholole lyake, kalawa na kema haukwingilila hana imango. Kuya kulawila litsi limlongela, "Eliya, utenda choni ahano?"

14 Kamwidika, "Nene nilapfa kuna ghweghwe, na nikutumikila kwa ngupfu tsangu tsose, ghwe IMNDEWA, Imulungu yuna ingupfu, lekeni iwanu wa Isiraeli walilema lilaghano lyako, watsihinya tsimatsabahu tsako, na wawakoma manabii wako na limaghe. Nene niliyeka yanisighale mgima, nawo wobama wanikome."

15 Kuya IMNDEWA kamlongela Eliya, "Uye kuchughu, wang'ile inzila ya inyika ya Damasko, haupfika ako umbake mapfuta Hazaeli yawe mfalume wa Siriya. 16 Pfipfila umbake ghamapfuta Yehu imwanaghe Nimshi, yawe mfalume wa Isiraeli, na umbake ghamapfuta Elisha imwanaghe Shafati wa Abeli Mehola, yawe nabii yakinde hanu hako. 17 Munu wowose iyatsotsuma yaleke kukomighwa na Hazaeli, Yehu katsomkoma, na ayula iyatsotsuma yaleke kukomighwa na Yehu, Elisha katsomkoma. 18 Lekeni kuna wanu elufu saba iwali wagima mna isi ya Isiraeli, awala ng'ana wamtowele magoti baye mulungu Baali, wala milomo yawo ng'ana imnonele baye."

19 Apfo Eliya koka kampfika Elisha mwana Shafati, kolima. Tsakuna ng'ombe ishirini na nne, iwolima weliweli, naye Elisha yang'ali yowemilila wang'ombe awala weli iwali kuchughu. Eliya kafosa habehi naye, kamwasila ligholole lyake. 20 Baho Elisha kawaleka wang'ombe wake, kamtsumila Eliya na kamlongela, "Undeke mbuke nikawawaghe aba wangu na mame wangu, kuya nitsokuwinza." Kuya Eliya kamlongela, "Ghenda, Angu nene nikughoma?"

21 Elisha kamleka Eliya, koya. Kawasola wang'ombe wake weli na kawachinja na kambika inyama kwa imibiki aila yawolimila wang'ombe, kaweng'a iwanu, waja. Kuya koka kamuwinza Eliya, na kamtumikila Eliya.