1 Apfo mfalume Selemani kawakema wanzehe wose wa Isiraeli na pfilongotsi wose wa ghamakabila, na iwakulu wa tsikolo waghende Yerusalemu kwayokala yeye, wakalisole lisanduku lya lilaghano lya IMNDEWA kulawa Sayuni, Ghumji ghwa Daudi. 2 Iwanu wose wa Isiraeli wetingana kwa mfalume Selemani mna ghumsimu ghwa ichihungo, mna ghumwetsi ghwa Saba, ighumanyika ghumwetsi ghwa Etanimu. 3 Iwanzehe wose wa Isiraeli hawapfikile, iwatambika wetwika lisanduku, 4 walighala kuna ing'anda ya Imulungu. Walawi na iwatambika pfipfila walighala lihema lya ukwitinganila na ipfinu pfose ipfenzeluke. 5 Mfalume Selemani na iwanu wose iwetingane naye hambele ha lisanduku, nawo watambika kwa kuchinja ng'olo na ng'ombe wengi ing'awodahika kupeteka baye. 6 Kuya watambika walingitsa lisanduku alila hanu hake, mna ichiheleto cha mghati mwa ng'anda ya Imulungu, Hanu haenzeluke ng'ani, hasi ha ghamabawa gha ipfinyagho pfa ghamakerubi. 7 Makerubi tsawagholosa mabawa ghao hanu halikalile lisanduku na walighubika lisanduku alyo na mibiki yake ya ukulidutila tsa ya hasi ha ghamabawa. 8 Imibiki ayo tsamitali ng'ani, na tsayoneka kulawa hanu ahala haenzeluke, na si kulawa hanu hohose baye, na mibiki ayo yabaho mbaka leloli aino. 9 Tsakuduhu chinu mna lisanduku alila ila tsakuna ghamabamba meli gha ghamabwe ghayekile Musa akula Horebu, ahala IMNDEWA hayekile lilaghano na Waisiraeli hawalawile Misiri. 10 Iwatambika hawang'ali wakuka kulawa hanu haenzeluke, baho ing'anda ya IMNDEWA imema bingu. 11 Libingu alyo liwatenda iwatambika waleke kusang'ana ng'onde yawo, kwaapfila utunitso wa IMNDEWA tsaumema mna ing'anda yake. 12 Baho Selemani kalonga, "IMNDEWA tsakalonga katsokala mna chisi chikulu. 13 Nikutsengela ng'anda ng'ulu na inoghile ghendo iwe hanu hako ha ukukala matsuwa ghose."

14 Iwanu wose wa Isiraeli hawemile baho, mfalume Selemani kahunduka, kawabaliki. 15 Kuya kalonga, "Yatunyighwe IMNDEWA Imulungu wa Isiraeli, kwaapfila kwa ngupfu yake kachitenda chilawile achila chayalongile kwa mlomo ghwake na aba wangu Daudi, ahala hayalongile 16 ‘Kulawa matsuwa aghala ghaniwalapfile Misiri iwanu wangu wa Israeli sina nisaghule mji ghoghose baye mna isi yose ya Isiraeli itsengighwe ing'anda ya Imulungu, iwanu wangu wanitambikileghe mumo, lekeni nimsaghula Daudi yawalongotse iwanu wangu wa Isiraeli.’ "

17 "Aba wangu Daudi tsakabama ghendo mmoyo mwake kumtsengela ing'anda ya ukumtambikila IMNDEWA, Imulungu wa Isiraeli. 18 Lekeni IMNDEWA kamlongela aba wangu Daudi, ‘Kwaapfila ichinu cha ukunitsengela nene ing'anda tsa cha mmoyo mwako, pfinogha kwa kubama ukutenda apfo. 19 Lekeni si ghweghwe baye yutsoitsenga, iyatsoitsenga ing'anda ayo imwanagho, imwana yutsomweleka ghumwenyegho.’

20 "Na sambi chayalongile IMNDEWA chilawila, nene niwa mfalume hanu ha aba wangu Daudi, na sambi nokalila ichighoda cha ufalume cha Isiraeli, ka IMNDEWA pfayalongile, na nene nimtsengela ing'anda ya ukumtambikila IMNDEWA, Imulungu wa Isiraeli. 21 Kuya nibaghula hanu ha ukukala lisanduku lya lilaghano, mghati mwake mna lilaghano lyayekile IMNDEWA na iwahenga wetu ahala hayawalapfile mna isi ya Misiri."

22 Kuya Selemani kema habehi na imatsabahu ya IMNDEWA akuno Waisiraeli wose womlolesa, kagholosa ghamoko ghake kulanga, 23 kalonga, "Ghwe IMNDEWA Mulungu wa Isiraeli, kuduhu Mulungu ka ghweghwe kuchanya kulanga wala hasi muisi, ghweghwe yautenda laghano lyaukwika lilawile, na yauwatendela ighanoghile iwatumighwa wako iwokala wokutegheletsa ghweghwe kwa mimoyo yawo yose. 24 Kumtendela imtumighwa wako Daudi, aba wangu achila chamwilaghane, ona, kwa ghumlomo ghwako kulonga, na kwa ghumoko ghwako ghuna ingupfu chila chinu chaulongile chilawila leloli. 25 Lelo, ghwe IMNDEWA, Imulungu wa Isiraeli, nokulomba pfipfila ughatende ghalawile aghala ghamwilaghane na aba wangu Daudi ahala haumlongele, ‘Ng'utsokala baye aku kwahela mtsukulu yumwe iyatsokalila ichighoda cha ufalume cha Isiraeli, ka iwatsukulu wako wang'alangitsa mna chila chawotenda, ka ghweghwe pfautendile.’ 26 Lelo, ghwe Imulungu wa Israeli, nokulomba ughatende ghalawile ghose aghala ghamwilaghane na imtumighwa wako Daudi, aba wangu.

27 "Lekeni ghwe Imulungu, angu kutsokala ghendo muisi? Lola, kulanga kwenyegho, na hata kulanga kuli kuchanya ng'ani ng'akukwenela baye, lelo utsokalatse mna ing'anda aino ndodo yanitsengile? 28 Lekeni ghwe IMNDEWA, Imulungu wangu, tegheletsa chanikulomba na chanikudedetsa, nene imtumighwa wako nokulomba. Utegheletse chanikulilila na chanikulomba mtumighwa wako leloli aino. 29 Nenge tsako tsiilolese ing'anda aino chilo na misi, hanu ahano ghweghwe haulongile, ‘Taghwa lyangu litsokala hanu ahano, iwanu wanitambikile,’ unitegheletse hanilomba aku nololesa hanu ahano. 30 Tegheletsa ghanikulomba nene imtumighwa wako, na gha iwanu wako wa Isiraeli hawolomba aku wololesa hanu ahano. Tegheletsa ghatukulomba kulawa kuko kulanga, kwaukala, naghwe ung'ahulika utuleghesile matotso ghetu.

31 "Munu yang'amtendela miyaghe ighehile, naye yang'aghalighwa yelahe hambele ha imatsabahu yako ili mng'anda amno, 32 chonde, tegheletsa kulawa ako kulanga, uwahighe watumighwa wako. Ayula yumwona katotsa, umuhighe kwa ukulola achila chayatotsile, na ayula iyalihela totso umlekelele, na umghweke kwa ukulola ukutogholighwa kwake.

33 "Ka iwanu wako Waisiraeli watowighwa na aduwi tsawo, kwaapfila wakutendela nzambi, na wang'akuyila keli ghweghwe na kulitunya taghwa lyako, akuno wokulomba na wokudedetsa mna ing'anda aino, 34 ghweghwe uwategheletse kulawa ako kulanga, ughalekelele ghose aghala ighehile ghawatendile iwanu wako Isiraeli, na uwoyitse mna isi yuweng'ile iwahenga wawo.

35 "Ka kulanga kudiwighwa na imvula ng'aitowa baye kwaapfila iwanu wako wakutendela ighehile, na hawolomba akuno wololesa hanu ahano, na kulitunya taghwa lyako, na wotoghola kuleka tsinzambi tsawo, kwaapfila tsakuwadununza, 36 uwahulike kulawa ako kulanga, utsilekelele tsinzambi tsawakutendele watumighwa wako, iwanu wako Waisiraeli, na uwafunde ukutenda ighanoghile na uwaghalile imvula itowe mna isi yuweng'ile iwanu wako iwe yawo.

37 "Ka kuna nzala muisi, au tauni, au chiyangayanga, au ng'ungu, au ipfijo pfohinyighwa na nzighe, au lung'wawa, au ka iwanu wako wengilighwa na aduwi mna ghumji ghwawo ghwoghwose, au maghayo, au utamu haulawila, 38 nokudedetsa wategheletse chawokulomba iwanu wako Waisiraeli. Chila munu yang'atsa na maghayo ghake ighali mmoyo, yang'akulomba akuno kogholosa ghamoko ghake ghalole kuna ing'anda aino, 39 mtegheletse kulawa ako kulanga, kwaukala. Walekelele na uwapfile, mtendele chila munu kwa ukulola achila chayatendile, kwaapfila ghweghwe kwayeka yumanya chili mmoyo mwa iwanu wose, 40 ili wakupfuke ghweghwe matsuwa ghose ghawokala mna isi yuweng'ile iwahenga wetu.

41 "Pfipfila kwa imgheni iyali si Muisiraeli baye, iyatsile kulawa isi ya kutali kwaapfila kahulika litaghwa lyako, 42 naye yang'abama kukutambikila na kukulomba aku kololesa kuna ing'anda aino, kwaapfila iwanu watsohulika taghwa lyako na pfinu pfikulu pfautendile kwa iwanu wako, 43 chonde chonde, mtegheletse chayokulomba kulawa kuko kulanga kwaukala, na mtendele chochose chayokulomba imgheni ayo, ili iwanu wose iwali muisi mwose walimanye taghwa lyako na wakupfuke ghweghwe, ka pfawotenda iwanu wako Waisiraeli. Kuya watsomanya ghendo ka ing'anda aino yanitsengile, itsengighwa ikemighwe kwa taghwa lyako.

44 "Iwanu wako wang'aghenda kung'ondo ukwitowa na maadui tsawo, hohose ahala hautsowaghala, na hawatsokulomba ghweghwe IMNDEWA, akuno woghulolesa ghumji aghuno ghwaughusaghule, na ing'anda aino yanikutsengele, 45 wahulike kulawa kuko kulanga chawokulomba na chawobama, naghwe uwapfile wahume.

46 "Ka watsokutendela nzambi, kwaapfila kuduhu munu ing'ayotenda nzambi, naghwe ung'aghudubuka na kuwaleka watowighwe na aduwi tsawo, nawo wowasola na wowaghala mna isi ya kutali au ya habehi, 47 nawo mmoyo mwao wang'atanga ka watotsa mna isi ayo ya aduwi tsawo kwawaghalighwe, na wang'atoghola na kukulomba mna isi ya awala iwawaghoghile, wang'alonga ‘Tutenda nzambi, tutotsa, na tukutendela ghehile,’ 48 nawo wang'akuyila kwa mimoyo yawo yose mna isi ya aduwi tsawo iwawaghoghile, na wang'alomba akuno wololesa kuna isi yao, yuweng'ile sekulu tsawo, na kuna ghumji ghwaghusaghule, na kuna ing'anda yanikutsengele, 49 wahulike kulawa kuko kulanga kwaukala, chawokulomba na ghawobama, na uwonele libatsi. 50 Walelekele iwanu wako iwakutendele ighehile, uwaleghusile tsinzambi tsawakutendele, na uwatende iwanu iwawaghoghile wawonele libatsi, 51 kwaapfila wawo wawanu wako, wa kwako ghendo, yuwalapfile Misiri, mna litanuli lya ukulubulila ichuma.

52 "Tsinenge tsako tsiloleseghe achila chayolomba imtumighwa wako, na chawolomba iwanu wako wa Isiraeli, naghwe uwategheletse chila hawokulilila. 53 Kwaapfila ghweghwe tsakuwabaghula kulawa mna iwanu wa tsiisi tsingi, wawe wanu wako ghendo, ka pfauwalongele kubitila imtumighwa wako Musa, ahala ghwe IMNDEWA hauwalapfile wahenga wetu mna isi ya Misiri."

54 Selemani hayamalitse ukulomba kwa IMNDEWA, kenuka hana imatsabahu ya IMNDEWA, hanu hayatowile magoti, akuno ghamoko ghake kagholosa kulanga. 55 Kema, kawabaliki Waisireli wose iwetingane aho, kuya kalonga kwa ukukemelela, 56 "Yatunyighwe IMNDEWA, iyawatendile iwanu wake wa Isiraeli wabwihile, ka pfayalongile. Kuduhu hata chinu chimwe chayalekile ukutenda mna ghose ghanoghile ghayamlongele imtumighwa wake Musa. 57 IMNDEWA, Imulungu wetu, yakale na twetwe, ka pfayakalile na iwahenga wetu, yaleke kutuleka wala kutwasa. 58 Yeye yaitende imimoyo yetu imloleghe yeye, twang'e mna tsinzila tsake aku twokinda ghamalaghitso na imiko yake na ghamalamtsi ghake ghayaweng'ile iwahenga wetu. 59 Na ghamalonga ghangu ghanilombile hambele ha IMNDEWA, ghakale habehi na IMNDEWA, Imulungu wetu, chilo na misi, naye yanyapfile nene imtumighwa wake na iwanu wake Waisraeli kwa kuweng'a aghala ghawobama chila tsuwa. 60 Apfo iwanu wose iwali muisi watsomanya ka IMNDEWA yuyo Imulungu, wala kuduhu yungi keli. 61 Namwe imimoyo yenu imloleghe yeye IMNDEWA, Imulungu wetu, mkale kwa kughakinda ghamalaghitso ghake na imiko yake, ka pfamtenda leloli aino."

62 Kuya mfalume Selemani na Waisiraeli wose iwakalile aho wamlapfila nambiko IMNDEWA. 63 Naye Selemani kamlapfila IMNDEWA Imulungu nambiko tsa ukukala tseghamba, ng'ombe elufu ishilini na mbili na ng'olo laki imwe na ishilini. Apfi pfipfo imfalume na Waisiraeli wose pfawaikile ing'anda iwe ya IMNDEWA Imulungu.

64 Tsuwa lilyo mfalume kachitenda chele ichibwalu ichili hambele ha ing'anda ya Imulungu, na baho yeye kalapfa nambiko tsa ukulakatsighwa, na tsa pfijo, na tsa ukukala tseghamba. Katenda apfo kwaapfila imatsabahu ya shaba ikalile hambele ha IMNDEWA tsandodo, ukwenela tsinambiko tsose atso.

65 Apfo Selemani katenda chihungo, na kukala mtingano mkulu ghwa Waisiraeli wose na yeye, iwanu tsawalawa Lebo Hamati mbaka hana ilukolongo lwa Misiri. Wadeng'elela ichihungo acho hambele ha IMNDEWA kwa matsuwa saba, na matsuwa saba ghangi, apfo watenda ichihungo acho kwa majuma meli. 66 Ilupfi yake Selemani kawalekelela iwanu woke. Nawo wamlombela tsibalaka mfalume, na woka mmakaye mwao akuno wodeng'elela na kusangalamka mna imimoyo yawo kwa ghose ighanoghile IMNDEWA ghayamtendele imtumighwa wake Daudi na iwanu wake Waisiraeli.