1 Naboti munu wa Yezireeli tsakana mghunda ghwake ghwa mitsabibu ako Yezireeli, habehi na ing'anda ya mfalume Ahabu wa Samaria. 2 Ahabu kamlongela Naboti, "Ungaye mghunda ghwako ghwa minzabibu ndime tsimbogha, kwaapfila ghwa habehi na ing'anda yangu. Nene nitsokwing'a mghunda ghungi ghunoghile ghwa minzabibu, au nitsokuliha chochose chubama."

3 Lekeni Naboti kamwidika, "IMNDEWA yayase kutali imbuli ayo ya ukukwing'a ghweghwe ghumghunda ghwawandekele iwahenga wangu."

4 Apfo Ahabu koka ukaye, akuno kaghudubuka na kamema usungu, kwa achila chayalongile Naboti iyolawila Yezireeli ahala hayamlongele, "Sikwing'a baye ghumghunda ghwawandekele wahenga wangu." Kawasa mlunanda mwake, chihanga chake chihundukila kungi, kalema ukuja. 5 Pinga wake iyakemighwe Yezebeli kamghendela kamghutsa, "Heule ukwona usungu mbaka kwefeya ukuja?"

6 Naye Ahabu kamwidika, "Kwaapfila nimlongela Naboti apfino, ‘Uniutsile mghunda ghwako ghwa minzabibu, ung'abama, nitsokuyitsila mghunda ghungi ghwa mitsabibu.’ Lekeni yeye kanongela, ‘Sikwing'a baye mghunda ghwangu.’ "

7 Baho Yezebeli kamlongela, "Angu iyotawala Isiraeli nani? Angu si ghweghwe baye? Winuke uje, na usangalale, nene mwenyegho nitsokwing'a ghumghunda ghwa minzabibu ghwa Naboti, Myezireeli!"

8 Apfo Yezebeli kandika baluwa kwa taghwa lya mfalume Ahabu, keka muhuli ghwa mfalume. Kuya katsituma kwa iwanzehe na iwanu iwomanyika iwokala na Naboti ako kuna ghumji ghwake. 9 Mna tsibaluwa atso kandika apfino, "Mkemelele iwanu wafunge, kuya mmwike Naboti yakale hana ichighoda cha iwakulu hambele ha iwanu. 10 Kuya wabameni wanu weli waghutsu ghendo, wakale akuno welolesa naye, nawo wambangitsile ghamaghomba walonge, ‘Ghweghwe kumlighita Imulungu na mfalume. Kuya mlapfeni kunze, mumtowe na mabwe mbaka yafe.’ "

11 Apfo iwanzehe na iwanu iwomanyika iwokala mna ghumji ghwa Naboti watenda ka Yezebeli pfayawalongele mna tsibaluwa tsayawatumile. 12 Wakemelela litsuwa lya ukufunga, na wamwika Naboti yakale hanu ha ukulu haghati ha iwanu. 13 Waghutsu weli wakala akuno welolesa naye na wamlapfila maghomba Naboti hambele ha iwanu walonga, "Naboti kamlighita Imulungu na mfalume." Apfo wamsola wamghala kunze kwa ghumji, wamtowa na mabwe mbaka kafa. 14 Kuya watuma nume kwa Yezebeli walonga, "Naboti katowighwa na mabwe mbaka kafa."

15 Yezebeli hayahulike ka Naboti kafa kwa ukutowighwa na ghamabwe, kamlongela Ahabu, "Winuke, ughende ukasole ghumghunda ghwa minzabibu ghwa Naboti, Myezireeli ghwayalemile ukukuutsila. Si mgima keli baye, yeye kafa." 16 Ahabu hayahulike ka Naboti kafa, kenuka kaghenda kughusola ghumghunda ghwa minzabibu ghwa Naboti.

17 Kuya longa lya IMNDEWA limtsila Eliya wa Tishibe, 18 "Uhulumke ughende uketingane na mfalume Ahabu wa Isiraeli. Sambi kamna ghumghunda ghwa minzabibu ghwa Naboti, kobama yaghusole ghuwe ghwake. 19 Mlongele apfino, apfi pfipfo pfayolonga IMNDEWA, ‘Angu ghweghwe ng'umkomile imunu baye, kuya kusola ghumghunda ghwake?’ Kuya mlongele apfino, ‘Apfi pfipfo pfayolonga IMNDEWA, hanu ahala wambwa hawalambite idamu ya Naboti, baho wambwa watsolambita idamu yako, ona, idamu yako ghendo!’ "

20 Ahabu kamlongela Eliya, "Pfihi kunighogha, ghweghwe yunyihila?" Eliya Kamwidika, "Ona, nikughogha, kwaapfila ghweghwe kwilapfa ghendo mna ukutenda ighehile hambele ha IMNDEWA. 21 ‘Nitsokughalila ighehile kuna ghweghwe, na nitsokukoma ghendo na kumkoma chila munu mmale wa ikaye yako, yawe mtumwa au si mtumwa baye. 22 Kuya nitsowatenda iwanu wa ikaye yako wawe ka iwanu wa ikaye ya Yeroboamu mwana wa Nebati, na wawe ka iwanu wa ikaye ya Baasha mwana wa Ahiya, kwaapfila kunitenda nene nighudubuke, na kuwahonza Wasiraeli watende nzambi.’ 23 Pfipfila IMNDEWA kanongela ka imwehe wako Yezebeli wambwa watsoluja ilukuli lwake mumno mghati mwa imibanda ako Yezireeli. 24 Imunu wowose wa ikaye yako iyakufila mna ghumji, wambwa watsomja na ayula iyakufila kumghunda, wapfideghe wa mlanga watsomja."

25 Tsakuduhu munu ka Ahabu iyelapfile mwenyegho ukutenda ighehile hambele ha IMNDEWA, aku mwehe wake Yezebeli komsongetsa. 26 Katenda pfinu pfa ukudesa ghendo kwa ukutambikila pfinyagho pfa imilungu ingi ka pfawatendile Waamori, IMNDEWA iyawawingile hambele ha iwanu wa Isiraeli. 27 Ahabu hayahulike apfo, kadegha maghwanda ghake, kapfala maghunila, kalema ukuja, na kawasa mna ghamaghunila, na kanga akuno na ako kwa usungu mkulu. 28 Kuya Imbuli ya Imulungu imtsila Eliya, munu wa Tishibi. 29 "Angu kwakona, Ahabu pfayetendile mdodo hambele hangu? Kwaapfila yeye ketenda mdodo, sitsomghalila maghayo baye mna ghamatsuwa ghake, lekeni mna ghamatsuwa gha imwanaghe nitsoghaghala mna ing'anda yake."