1 Yeroboamu hayang'ali kema hana imatsabahu yapfukitse ufumba, baho imunu we Imulungu yatumighwe na IMNDEWA kulawa Yuda kapfika aho Beteli. 2 Kailonga imatsabahu ayo ka IMNDEWA pfayamlongele, kakemelela, "Ghwe matsabahu, matsabahu, IMNDEWA kolonga apfino, ‘Imwana iyokemighwa Yosia katsakoneka mna lukolo lwa Daudi. Yeye katsowadumula iwanu iwotambika mpfidando, iwolapfa nambiko ahano na imipate ya iwanu awo katsoilakatsa mchanya mwako.’" 3 Tsuwa lilyo imunu wa Imulungu keka chitango, kalonga, "Achi chicho ichitango chayalongile IMNDEWA, ‘Imatsabahu itsomegheka, na lipfu ilili mchanya mwake litsomwaghika.’"

4 Naye mfalume Yeroboamu hayahulike apfila imunu wa Imulungu pfayailongile imatsabahu ako Beteli, kagholosa ghumoko kulawa hana imatsabahu kuya kalonga, "Mghogheni." Lekeni ghumoko ghwagholose kuna imunu ayo ghuholola, apfo ng'audahile baye kukunjika keli. 5 Pfipfila imatsabahu nayo imegheka, ka chitango chayalongile imunu wa Imulungu iyeng'ighwe longa lye IMNDEWA. 6 Apfo mfalume Yeroboamu kamlongela imunu wa Imulungu, "Nokulomba unilombele kwa IMNDEWA, Imulungu wako, ghumoko ghwangu ghugholoke." Apfo Imunu wa Imulungu kamlomba IMNDEWA, na ghumoko ghwa mfalume ghuya keli na ghuwa ka aho mwanduso. 7 Mfalume kamlongela imunu ayula we Imulungu, "Utse ukaye yangu ukaje ichijo na nene, kuko nitsokugweka."

8 Lekeni imunu we Imulungu kamwidika, "Hata ka ung'angaya inusu ya pfose pfaunapfo, nene sitsoghenda naghwe baye, wala sitsakuja baye wala kunwa ghamatsi hanu ahano. 9 Kwaapfila Imulungu kandaghitsa ndeke ukuja, wala ukunwa ghamatsi, wala kuya ukaye kwa nzila ihila yanitsilile nayo." 10 Apfo koya kwa kwang'a nzila ingi, na ng'ohile baye kwa nzila ihila iyatsile nayo.

11 Kuko Beteli tsakuna nabii yumwe mnzehe, wanaghe wamghendela na wamlongela ghose ghayatendile imunu wa Imulungu aho Beteli tsuwa lilyo. Pfipfila wamlongela aba wawo achila chayamlongele mfalume. 12 Naye aba wawo kawaghutsa, "Yang'ile nzila yachi?" Na iwanaghe wamlangusa inzila iyabitile imunu wa Imulungu iyalawile Yuda. 13 Apfo Kawalongela iwanaghe, "Mtandike chilagho mchanya mwe ipunda," Nawo hawachitandike mchanya mwa ipunda, naye kamdina. 14 Kamuwinza imunu ayula wa Imulungu na kampfika kakala hasi, hana ghumbiki ghwa mwaloni, baho kamghutsa, "Pfihi ghweghwe kwa munu wa Imulungu yulawile Yuda?" Naye kamwidika, "Ona, na nene."

15 Apfo inabii ayula kamlongela, "Tuke ukaye yangu, tukaje ichijo."

16 Imunu wa Imulungu kamlongela, "Sikuya baye kuchughu na kuka naghwe, wala sikwingila baye mng'anda mwako na sikuja ichijo baye wala kunwa ghamatsi hanu ahano. 17 Kwaapfila Imulungu kandaghitsa ndeke kuja chijo wala kunwa ghamatsi hanu ahano, wala kuyila inzila aino yutsile nayo ghweghwe."

18 Inabii ayula imnzehe kamlongela, "Pfipfila nene na nabii ka pfauli ghweghwe, na imalaika we Imulungu kanongela kwa longa lye IMNDEWA, ‘Umuyitse ukaye yako yaje ichijo na yanwe ghamatsi.’" Lekeni inabii ayo imnzehe yang'ali yomghutsukila. 19 Apfo imunu ayo we Imulungu koya naye ukaye yake, kuya kaja ichijo na kanwa ghamatsi naye.

20 Hawang'ali wakuja longa lya IMNDEWA limtsila inabii ayula imnzehe, iyamhitse kuchughu imunu we Imulungu. 21 Kamkembela imunu ayula we Imulungu iyalawile muisi ya Yuda, "Achi chicho chayolonga IMNDEWA, ‘kwaapfila ng'utegheletse baye longa lya IMNDEWA, na ng'ukindile baye laghitso lyayakulaghitse IMNDEWA. 22 Lekeni ghweghwe kuya kuchughu na kuja ichijo na kunwa ghamatsi hanu hanikughomile uleke kuja, wala kunwa ghamatsi. Apfo lukuli lwako ng'alutsotsikighwa baye hana ghamakabuli gha sekulu tsako.’ "

23 Imunu wa Imulungu hayamalitse ukuja na ukunwa, inabii iyamhitse kuchughu katandika chilagho mchanya mwe ipunda yamdine. 24 Na hayang'ali kamnzila kakuka, isimba ketingana naye mnzila kamkoma, na lukuli lwake lwasighwa mnzila, ipunda wake na simba wose wema hambalimbali hake. 25 Iwanu iwapfosile aho wona lukuli lwasighwa mnzila, aku isimba kema habehi na ilukuli, waghenda kulonga kuna ghumji ghwayang'ali yokala inabii iyalalile.

26 Inabii iyamhitse kuchughu hayahulike chinu acho, kalonga, "Imunu we Imulungu ng'ategheletse baye longa lya IMNDEWA, apfo IMNDEWA kamtuma isimba yampfingilile kuya kamkoma ka longa lya Imulungu pfalimkanyile."

27 Inabii kawalongela iwanaghe, "Mnitandikile chilagho mchanya mwe ipunda," nawo wamtandikila. 28 Naye koka, kalyona lukuli lwasighwa mnzila aku isimba na punda wema habehi nalwo, isimba ayula ng'alujile baye lukuli, wala ng'amjile ipunda baye. 29 Apfo inabii ayo kalusola lukuli lwa imunu wa Imulungu, kalwika mchanya mwe punda na kalughala kuna ghumji ghwake, kuko kamlilila kuya kamtsika. 30 Kuya kalutsika lukuli alyo hana likabuli lyake mwenyegho, yeye na iwanaghe wamlilila na walonga, "Wenye ghwe ndughu yangu!"

31 Na hawamtsikile, kawalongela iwanaghe, "Hanikufa, nitsikeni hana likabuli lyayatsikighwe imunu wa Imulungu, ikeni mipate yangu habehi na mipate yake. 32 Kwapfila ghatsolawila ghendo aghala ghose ghayalongile ahala hayailongile imatsabahu na pfidanando pfose pfa kutambikila pfili mna imiji ya Samaria kwa longa lya IMNDEWA."

33 Yeroboamu ng'alekile baye ghehile ghake, lekeni yeye kaghendelelela kuwasaghula iwanu wowose wakatambike hana ipfidando. Na munu wowose yabamile kuwa mtambika, yeye kamsaghula yawe mtambika wa kupfidando. 34 Chinu achino chiwa nzambi ng'ulu, na chihonza lukolo wa Yeroboamu luhupe na ng'alyoneke keli baye muisi.