1 Matsuwa mengi haghabitile, longa lya IMNDEWA limtsila Eliya mna ghumwaka ghwa kadatu ghulihela mvula, lilonga, "Ghenda wikelanguse kwa mfalume Ahabu, kuya nene nitsoghala mvula muisi." 2 Apfo Eliya kaghenda kwilangusa mwenyegho kwa Ahabu. Mna ghamatsuwa agho tsakuna nzala ng'ulu ako Samaria. 3 Lelo Ahabu kamkema Obadia, mwimilitsi wa ing'anda ya chifalume. Obadia tsakampfuka IMNDEWA Sideke. 4 Yezebeli hayang'ali yowakoma manabii wa IMNDEWA, Obadia kawasola manabii miya imwe kawapfisa mna mango mbili, hamsini mna chila mango, yang'ali yowaghalila ichijo na ghamatsi. 5 Kuya Ahabu kamlongela Obadia, "Ghenda mna isi yose mna tsimbwibwi tsose tsa ghamatsi, na mna ulwanda, songaha toyona mitsani ya ukuweng'a wafalasi na punda falasi wetu, ili wawe wagima na tuleke ukuwaghisa wanyama wose." 6 Apfo waighola isi ayo, wadahe kuighendela yose, Ahabu kaghenda ubali umwe na Obadia kaghenda ubali ungi.

7 Obadia hayang'ali kamnzila koghenda, ketingana na Eliya, baho Obadia kamtanga, kamwinamila mbaka hasi na kalonga, "Angu ghweghwe kwa Eliya, mkulu wangu?"

8 Naye kamwidika, "Ona nene, ghenda kamlongele mkulu wako ka nene Eliya nabaha."

9 Obadia kamghutsa, "Nitendile choni mbaka kongala kuna ghamoko gha Ahabu yakanikome? 10 Neleha kwa IMNDEWA, Imulungu wako iyali mgima, kuduhu isi wala ufalume, mkulu wangu iyalekile kutuma wanu wakubame ghweghwe. Isi yoyose, au ufalume wowose wang'alonga ka ng'awakonile baye, mkulu wangu Ahabu komtenda mfalume wa isi ayo yelahe ka ng'awakonile baye. 11 Lekeni sambi ghweghwe kolonga, ‘Ghenda ukamlongele, Eliya kabaha.’ 12 Simanyile baye ghumuhe ghwa IMNDEWA kwani kwaghutsokughala hanitsokuleka. Ning'aghenda kumlongela Ahabu ka ghweghwe kwabaha, naye ng'okona baye, yeye katsonikoma, hata ka nene na mtumighwa wako yanimpfukile IMNDEWA kulawa udodo wangu. 13 Angu ng'uhulike baye mkulu wangu, chanitendile ahala Yezebeli hayawakomile manabii wa IMNDEWA, apfila pfaniwapfisile manabii miya imwe mna tsimango mbili, hamsini mna chila mango, na niwaghalila ichijo na ghamatsi? 14 Lekeni sambi ghweghwe konongela ng'ende kwa mkulu wangu nikamlongele, ‘Eliya kabaha.’ Baye katsonikoma ghendo."

15 Eliya kalonga, "Nelaha kwa IMNDEWA, Imulungu iyali mgima, yana ingupfu yanimsang'anila, leloli aino nitselangusa kwa Ahabu."

16 Apfo Obadia kaghenda kwitingana na Ahabu, kamlongela ka Eliya koneka, naye Ahabu kaghenda kwitingana na Eliya. 17 Ahabu hayamwonile Eliya, kamlongela, "Angu ayu ghweghwe, yuidununza Isiraeli?" 18 Eliya kamwidika, "Nene siidununze baye isi ya Isiraeli, yamuidununze Isiraeli ghweghwe na iwanu wa ikaye ya aba wako, kwaapfila mghaleka ghamalaghitso gha IMNDEWA na muitambikila milungu ya Mabaali. 19 Apfo lelo nikemeleni Waisiraeli wose watse twitingane na nene hana ichidunda cha Karimeli, pfipfila wakeme manabii awala miya nne na hamsini wa Baali, na manabii miya nne wa Ashera, iwajagha hana imetsa ya Yezebeli."

20 Apfo Ahabu kawakema Waisiraeli wose na kawakema hamwe manabii wose wetingane kuna ichidunda cha Karimeli. 21 Eliya kawasoghelela iwanu wose habehi, kawalongela, "Angu mwemwe mtsakwalangula mbuli mbili mbaka tsuwachi? Ka IMNDEWA ka Imulungu, muinzeni yeye, na ka Baali ka Imulungu muwinzeni yeye." Iwanu ng'awedike chinu chochose baye. 22 Kuya Eliya kawalongela iwanu apfino, "Nene niliyeka yanisighale, inabii wa IMNDEWA, lekeni manabii wa Baali wa miya nne na hamsini. 23 Tughalileni ng'ombe weli, walekeni wasaghule ng'ombe yumwe, wamchinje na wamgane pfihandepfihande na weke mna tsingondi, lekeni waleke kutuwa ghumoto. Na nene nitsomganagana pfihande ing'ombe iyakalile, na sitsotuwa ghumoto baye. 24 Namwe mlombe kwa taghwa lya mulungu wenu, na nene nolomba kwa taghwa lya IMNDEWA, na Imulungu ayula iyakwidika kwa kughala ghumoto, ayo yuyo Imulungu ghendo." Nawo iwanu wose wedika, "Ona gholoko! Kulonga ghoya."

25 Kuya Eliya kawalongela manabii wa Baali, "Tanu mwisaghulile wenyegho ng'ombe yumwe, na mwanze kumgana gana, kwaapfila mwemwe mwa wengi, kuya mlilombe taghwa lya mlungu wenu, lekeni mleke kutuwa ghumoto mna tsingodi."

26 Apfo wamsola ing'ombe ayo yaweng'ighwe, wamgana gana na walikema taghwa lya Baali kulawa nemitondo mbaka nemisi, walomba apfino. "Ghwe Baali utwidike," Lekeni tsakuduhu litsi, wala imunu iyawedike. Nawo wang'ali wobighabigha kutsunguluka imatsabahu yawatsengile.

27 Haipfikile nemisi Eliya kawabetsa kalonga, "Mlombeni kwa ukukemelela! Yeye kamulungu, songaa kakwalangula. Imane kolota, au kaghenda kucholo, au kammwanza, au kawasa, na latsima yalamke." 28 Manabii wa Baali wakemelela, na weganagana na mimaghe na pfimaghe pfidopfido ka pfawatsowele mbaka idamu iwalawa. 29 Waghendelela kukemelela misi yose mbaka nemihe hachipfikile ichipindi cha ukulafa inambiko. Lekeni tsakuduhu litsi, wala iyedike, wala iyalolile. 30 Eliya kuya kawalongela iwanu, "Sogheleni hana nene." Na iwanu wose wamsoghelela. Naye katsenga keli imatsabau ya IMNDEWA, aila ihinyighwe. 31 Eliya kasola mabwe kumi na meli, chila libwe kwa chila kabila lya iwana wa Yakobu, yeye IMNDEWA iyamlongele, "Taghwa lyako kutsokemighwa Isiraeli." 32 Kwa ghamabwe agho Eliya kamtsengela IMNDEWA imatsabahu, kahimba mfeleji kutsunguluka imatsabahu ayo, ighudaha kumema ka debe limwe lya matsi. 33 Katsika ghoya tsingodi atsila hana imatsabahu, kuya kamgana ing'ombe ayula pfihandepfihande, na kapfika mchanya mwa itsingodi. Kuya kawalongela iwanu, "Ghamemeseni mabigha mane gha matsi na mghaghide mchanya mwa inambiko aino ya ukulakatsighwa na mchanya mwa tsingodi atsino." 34 Kuya kawalongela, "Tendeni lwa keli," na watenda pfipfo lwa keli. Kawalongela keli, "Tendeni lwa kadatu", nawo watenda lwa kadatu, 35 Aghala ghamatsi ghapfosa kutsunguluka imatsabahu, na ghumfeleji ghose ghumema ghamatsi.

36 Na ichipindi cha ukulapfa nambiko tsa nemihe hachipfikile, nabii Eliya kasoghela habehi na kulomba, "Ghwe IMNDEWA, Imulungu wa Abrahamu, na wa Isaka, na wa Isiraeli, leloli wamanye ka ghweghwe kwa Imulungu mna Isiraeli, na wamanye ka nene na mtumighwa wako na nenda aghano ghose kwa kulaghitsighwa na ghweghwe. 37 Ghwe Imulungu unyidike. Unyidike ili iwanu awano wamanye ghendo ka ghweghwe IMNDEWA yuyo Imulungu, na wamanye ghendo ka ghweghwe yuyo yutenda imimoyo yawo ikuhundukile keli ghweghwe."

38 Baho IMNDEWA kahulumsa moto, ghulakatsa inambiko ya inyama ya ukulakatsighwa, na tsingodi, na ghamabwe, na lidongo, na ghunyalitsa ghamatsi ghose ighali mna ghumfeleji. 39 Iwanu wose hawonile apfo, waghwa hasi chifudifudi walonga, "IMNDEWA, yuyo Imulungu, IMNDEWA, yuyo Imulungu." 40 Kuya Eliya kawalongela iwanu, "Waghogheni manabii wose wa Baali, mleke kumleka hata yumwe yatsume." Apfo wawaghogha na Eliya kawahulumsa kuna ichikolongo cha Kishoni, na kuko kawakoma.

41 Kuya Eliya kamlongela Ahabu, "Ghenda ukaje na kunwa, kwaapfila nohulika mdumo ghwa mvula ng'ulu." 42 Apfo Ahabu kaghenda ukuja na ukunwa, lekeni Eliya kagheluka mbaka hana ichidanando cha ichidunda cha karimeli, kuko kenamila hasi mbaka ichihanga chake chidonza ghamafindi. 43 Kamlongela mtumighwa wake, "Ghenda ukalole ibahali." Naye kaghenda kalola, kuya kalonga. "Sonile chinu baye." Kamlongela, "Ghenda," mala saba. 44 Hayaghendile lwa saba, imtumighwa koya, kalonga, "Lola, libingu lyolawa mna ibahali, nalyo dodo ka chighanza cha moko ghwa munu." Baho Eliya kalonga, "Ghenda ukamlongele mfalume Ahabu yeke ghoya ghumtuka ghwake na yahulumke kuhisi ng'ana imvula imkwamise baye." 45 Bahala kulawila bingu titu kulanga, na beho iliduma, na mvula ng'ulu itowa. Ahabu kadina ghumtuka ghwake kaghenda Yezireeli. 46 Ingupfu ya IMNDEWA imtsila Eliya, keyoha gholole lyake ghoya mchuno, katsuma kamlongolela Ahabu kupfika Yezreeli.