1 Hayafile mfalume Ahabu, wanu wa Moabu tsawalema kutawalighwa na Isiraeli.

2 Mfalume Ahazia hayang'ali ka Samaria kalaghala kulawa kuna ichiheleto cha kuchanya ichikalile mna ing'anda yake, naye kelagha ng'ani. Apfo katuma wanu kawalongela, "Mghende mkamghutse Baali Zebubu, mulungu wa ghumji ghwa Ekironi, ka nitsohona au sitsohona baye kwa apfino pfanilaghile." 3 Lekeni malaika wa IMNDEWA kalonga na Eliya iyolawa kuna ghumji ghwa Tishibe, "Ghenda uketingane na iwanu iyawatumile mfalume wa Samaria kuya uwaghutse, ‘Angu kuduhu Mulungu mna isi ya Isiraeli mbaka mwoghenda kumghutsa Baali Zebubu mulungu wa Ekironi?’ 4 Lelo IMNDEWA kolonga apfino, ‘Ng'utsolamka baye kulawa mna ilunanda luwasile, kutsakufa ghendo’ " Apfo Eliya kawaghendela ka IMNDEWA pfayamlaghitse. 5 Iwanu iwatumighwe woya kwa mfalume, naye mfalume kawaghutsa, "Hebali msumke ukuya?"

6 Nawo wamwidika, "Munu yumwe katsa kwitingana na twetwe, naye katulongela tuye kwa mfalume, na tukulongele ka IMNDEWA kolonga apfino, ‘Pfihi kuduhu Imulungu mna isi ya Isiraeli, mbaka mwoghenda kumghutsa Baali Zebubu, mulungu wa Ekiloni?’ Lelo IMNDEWA kolonga apfino, ‘Ng'utsolamka baye kulawa mna ilunanda luwasile, kutsakufa ghendo’ "

7 Mfalume kawaghutsa, "Imunu ayo iyetingane na mwemwe na kuwalongela agho yali pfihi?"

8 Wamwidika, "Kapfala gholole lya mighala akuno msipi ghwa ngotsi ghwa mchuno mwake." Mfalume kawedika, "Ayo Eliya, imunu wa Tishibe."

9 Kuya mfalume kamtuma mkulu yumwe wa ing'ondo yaghende kwa Eliya iyelongotse na iwanu hamsini. Imkulu ayo kamghendela Eliya kampfika kakala mchidanando mwa ichidunda, kamlongela, "Ghwe imunu wa Imulungu, mfalume kolonga, ‘Uhulumke kuhisi!’ "

10 Eliya kamwidika imkulu ayo na iwanu wake, "Ka nene na munu wa Imulungu, ghumoto ghuhulumke kulawa kulanga ghukulambite ghweghwe na iwanu wako hamsini!" Baho ghumoto ghuhulumka kulawa kulanga ghumlambita imkulu ayo na iwanu wake.

11 Mfalume kamtuma keli mkulu yungi wa ing'ondo iyelongotse na wanu hamsini. Imkulu ayo kamlongela Eliya, "Ghwe munu wa Imulungu, mfalume kolonga apfino, ‘Uhulumke sambi baha!’ " 12 Eliya kawedika, "Ka nene na munu wa Imulungu ghumoto ghuhulumke kulawa kulanga ghukulakatse ghweghwe na iwanu wako hamsini!" Baho ghumoto ghwa Imulungu ghuhulumka ghumlakatsa yeye na iwanu wake hamsini.

13 Mfalume kamtuma mkulu yungi wakadatu na iwanu wake hamsini. Imkulu ayo wakadatu kagheluka kuchidunda, katowa magoti hambele ha Eliya, baho kamlomba, "Ghwe imunu wa Imulungu, ulole ugima wangu na ugima iwatumighwa wako awano hamsini ka chinu chikulu hambele hako! 14 Iwakulu weli wa ing'ondo iwalongole kutsa na iwanu wawo walakatsighwa na ghumoto ighuhulumke kulawa kulanga, lekeni sambi nokulomba uwonele libatsi ugima wangu!"

15 Baho malaika wa IMNDEWA kamlongela Eliya, "Uhulumke naye kuhisi, uleke kupfuka." Apfo Eliya kenuka na kahulumka naye kuhisi kwayali mfalume. 16 Eliya kamlongela mfalume, "IMNDEWA kolonga apfino, ‘Angu kwaapfila kuduhu Mulungu mna isi ya Isiraeli mbaka kutuma wanu waghende kumghutsa Baali Zebubu, mulungu wa Ekiloni? Lelo ng'usolamka baye kulawa mna lunanda lwa uwasile, kutsakufa ghendo.’ "

17 Apfo Mfalume Ahazia kafa ka longa lya IMNNDEWA lyayamlongele Eliya. Ahazia tsakahela mwana mmale, apfo Yoramu ndughu yake kawa mfalume hanu hake mna ghumwaka ghwa keli ghwayatawale Yehoramu mwana wa Yehoshafati mfalume wa Yuda.

18 Ghangi ghayatendile Ahazia mna ukutawala kwake, na chila chinu chayatendile, ghose ghandikighwa mna ichitabu cha wafalume wa Isiraeli.