1 Mna ghumwaka ghwa kadatu ghwa Hoshea, mwanaghe Ela, mfaulme wa Israeli, Hezekia mwana wa Ahazi, mfalme wa Yuda, kanza ukutawala. 2 Tsakana miyaka ishilini na mitano hayawile mfalume, na kaitawala Yerusalemu kwa miyaka ishilini na tisa. Mai wake tsakakemighwa Abiya, neghe Zekari. 3 Katenda ighanoghile hambele ha IMNDEWA, ka sekulu wake Daudi pfayatendile. 4 Kahinya chila hanu henulighwe ha ukutambikila, katsimwagha tsingutso tsa ghamabwe, na katsigana tsingutso tsa Ashera. Pfipfila kambena pfihande hande inzoka wa Shaba iyakemighwe Nehushitani, iyamfinile Musa, Mbaka matsuwa agho iwanu wa isiraeli tsawang'ali womtambikila. 5 Hezekia tsakamtoghola IMNDEWA, Imulungu wa Isiraeli. Tsakuduhu mfalume yungi ka yeye mna wafalume wose wa Yuda, iwamlongolele ghumwande na iwatsile hambele hake. 6 Yeye tsakamnanahila IMNDEWA wala ng'epfile baye kumuwinza yeye. Yeye kaghakinda ghamalaghitso ghose gha IMNDEWA ghayamlaghitse Musa. 7 Naye IMNDEWA tsakahamwe naye, apfo katenda pfinoghile mna chila chinu chayatendile. Kambiduka mfalume wa Ashuru na ng'amtumikile baye. 8 Tsakawatowa Wafilisti mbaka Gaza na isi itsunguluke, kwanzila kuna ghamnala ghwa wabetetsi mbaka kuna ghumji ghutsungulukighwe ubanda, 9 Mna ghumwaka ghwa kane ghwa ufalume wa Hezekia, ighuli ghumwaka ghwa saba ghwa ufalume wa Hoshea mwanaghe Ela mfalme wa Israeli, Shalmanesa mfalme wa Ashuru kaghenda kughupfingila. ghumji ghwa Samaria 10 Haimalile miyaka midatu Washuru waghuboka ghumji ghwa Samaria. Agho tsaghalawila mna ghumwaka ghwa sita ghwa mfalume Hezekia, ighuli ghumwaka ghwa tisa ghwa mfalume Hoshea mfalume wa Yuda. 11 Mfalume wa Ashuru kawasola Waisiraeli iwaghoghighwe kawghala ako Ashuru, wamwenga kaweka wakakale kuna ghumji ghwa Hala, na ghwa Gozani ighuli habehi na ghumto Haboli, na wamwenga kawaghala kuna ghumji ghwa Media. 12 Agho ghalawila kwaapfila Waisiraeli ng'awamtegheletse baye IMNDEWA Imulungu wawo, lekeni wawo walibena lilaghano lyake, waleka kughahulika na kughatenda ghose ghayawalaghitse Musa imtumighwa wa IMNDEWA. 13 Mna ghumwaka ghwa kumi na nne ghwa mfalme Hezekia, mfalume Senakeribu wa Ashuru katsa kuitowa imiji yose itsingulusighwe ubanda ya Yuda na kaiboka.

14 Mfalume Hezekia wa Yuda katuma wanu waghenda kwa mfalume wa Ashuru ako Lakishi wamlongela apfino, "Nene nitotsa, uleke kunitowa keli, na nitsokuliha chochose chaubama." Mfalume wa Ashuru kamlaghitsa mfalume Hezekia wa Yuda yamghalile mabwe gha fetsa kilo elufu tano, na kilo elufi imwe ya nzahabu. 15 Apfo mfalume Hezekia kamwing'a ifetsa yose ikalile mna ing'anda ya IMNDEWA na mna ihatsina ya ing'anda ya chifalume. 16 Pfipfila kaibandula inzahabu iyaikandike mna imihimili na imilango ya ing'anda ya IMNDEWA, kamwing'a mfalume wa Ashuru. 17 Mfalume wa Ashuru katuma masikali wake iwalongotsighwe na iwakulu wawo wadatu, walawa Lakishi waghenda kwa Hezekia ako Yerusalemu. Hawapfikile Yerusalemu wema hana ghumfeleji ighughala ghamatsi kuna litsimbu lya kuchanya, kuna inzila ng'ulu ighenda kuna ichiwala cha ukutsapfila ghamagwanda. 18 Kuya watuma wanu wakamkeme mfalume Hezekia yawaghendele, Hezekia ng'aghendile baye, lekeni kawatuma iwatumighwa wake wakulu waghende. Tsakawatuma Eliakimu, mwanaghe Hilkia, iyang'ali yakwimilila ing'anda ya mfalume, na Shebina, imwandishi wake, na Yoa, mwanaghe Asafu, iyakwika tsikumbukumbu tsa mfalume. 19 Mkulu wa masikali wa Ashuru kawalongela apfino, "Mlongeleni Hezekia, apfi pfipfo pfayolonga mfalume mkulu wa Ashuru, Angu chinu chachi ghendo chawihuwila? 20 Kwakwaghitsa ukulonga longa hela kwako kokutenda umanye na uwe na tsingupfu tsaukwitowa? Angu nani ghweghwe yahumwaghamila mbaka konibiduka. 21 Ghweghwe komlolela mfalume wa Wamisiri yakwapfile, lekeni yeye keghana la iludete ilubeneke, lutsomhoma mmoko munu wowose iyolwaghamila. Apfi pfipfo pfayali Farao mfalume wa Misiri kwa ayula iyomwaghamila." 22 Hata ka kwonongela, "Twetwe twomlolela IMNDEWA Imulungu wetu!" Angu si yeye Imulungu baye Hezekia iyamwaghile hanu hake henulighwe na tsimatsabahu tsake tsa ukutambikila, kuya kawalongela iwanu wa Yuda na Yerusalemu watambike hana imatsahabu aino ahano Yerusalemu? 23 Lelo utse wilaghane na imkulu wangu mfalume wa Ashuru. Nitsokwing'a falasi elufu mbili, ka kutsodaha kunibamila wanu elufu mbili wa ukuwadina. 24 Ghweghwe komlolela imfalume wa Misiri yakwing'e imituka na wadina falasi, lekeni wawo ng'awodaha ghendo baye kumtowa hata imkulu yumwe iyali mdodo ghendo mna maasikali wa Ashuru! 25 Angu mwopfikitsa ukutsa kwangu ahano kuitowa isi yenu na kuitenda ihupe ghendo nene silongotsighwe na IMNDEWA baye? IMNDEWA yuyo iyanongele, "Uitowe isi ino na ihupe ghendo."

26 Eliakimu mwana wa Hilikia, Shebina na Yoa wamlongela mkulu ayo, "Longa na twetwe kwa chiaramu, kwaapfila tuimanya, uleke kulonga na twetwe kwa chihebrania, kwaapfila iwanu iwemile mna ubanda watsohulika." 27 Mkulu ayo wa masikali kedika, "Angu mkulu wangu mfalume kanituma nonge na mfalume wenu na nonge na mwemwe mliyeka? Angu ng'anitumile baye nonge na wanu wose iwemile mna ubanda, iwatsakuja mipfi yawo na kunwa mikotso yawo wenyegho ahala hanitsoitowa isi?"

28 Kuya mkulu ayo wa masikali kema kakemelela kwa chieburaniya, "Tegheletseni chayolonga mfalume mkulu, mfalume wa Ashuru! 29 Kowakanya mleke kutoghola Hezekia yawabughe. Yeye ng'odaha baye kuwakombola. 30 Na mleke kumleka Hezekia yawaswangitse ukumlolela IMNDEWA. Mleke kufikitsa ka IMNDEWA katsomkombolani, na ka katsotenda ghumji ghwenu ghuleke ukubokighwa na mfalume wa Ashuru. 31 Mleke kumhulikitsa Hezekia. Mfalume wa Ashuru komlaghitsani mwemwe mlawe mna ghumji na mtoghole ukuhumighwa. Kuya chila munu katsakuja kulawa mna ghumtsabibu ghwake imwenyegho, na ghumtini ghwake imwenyegho, na kunwa ghamatsi mna ichisima chake imwenyegho, 32 mbaka hanikutsa kuwasola na kuwaghala kuna isi ili ka isi yenu muwenyegho, isi ina ipfijo, na idipfai, isi ina ipfighate na mighunda ya minzabibu, isi ina ghamapfuta gha minzeituni na uki. Apfo lelo msaghule ugima na si ukufa baye. Mleke kumhulikitsa Hezekia, kwaapfila yeye kowaghutsukila hayolonga, IMNDEWA katsomkombolani. 33 Angu kuna mulungu wa iwanu wa isi ingi iyaikombole isi yake kulawa mna ghamoko gha mfalume wa Ashuru? 34 Apfi ili kwani milungu ya Hamathi na Arpadi? Ili kwani milungu ya Sefarvaimu, Hena na Iva? Pfihi idaha kuikombola Samaria ilawe mna ghamoko ghangu? 35 Angu mulungu wachi mna imilungu ya tsiisi atsino iyadahile kuikombola isi yake kulawa mna ghamoko ghangu? Lelo IMNDEWA yodahatse kuikombola Yerusalemu kulawa mna ghamoko ghangu?"

36 Lekeni iwanu wose wenyamala tulu, na ng'awamwidike chinu chochose baye, kwaapfila mfalume Hezekia tsakawalaghitsa apfino, "Mleke kumwidika." 37 Kuya Eliakimu, mwanaghe Hilikia, iyang'ali yakwimilila ing'anda ya mfalume, na Shebina, imwandishi wake, na Yoa, mwanaghe Asafu, iyakwika tsikumbukumbu tsa mfalume, woya kwa mfalume Hezekia, aku ghamagwanda ghawo waghadegha, na wamlongela ghose ghayalongile imkulu wa maasikali.