1 Nabii Elisha kamkema munu yumwe kulawa mna likingili lya manabii kamlongela, "Wisafulule usole supa aino ya mapfuta, kuya ughende Ramoti ili muisi ya Gileadi. 2 Hautsopfika ako umbame Yehu mwana wa Yehoshafati, na mtsukulu wa Nimshi. Mghendele, mlongele yakale kutali na wayaghe. Kuya umwingitse mna chiheleto ichili mghati. 3 Pfipfila sola isupa aino ummwaghile mwitwi, kuya umlongele IMNDEWA kolonga apfino, ‘Nikusaghula uwe mfalume wa Isiraeli.’ Na baho pfughula ghumlango utsume, uleke kukawa."

4 Apfo imsongolo ayo nabii kaghenda Ramoti Gileadi. 5 Na hayapfikile kawona iwakulu wa ing'ondo wakala hamwe, kalonga, "Ghwe mkulu, nina mbuli naghwe." Naye Yehu kamghutsa, "Yuhi yaubama kulonga naye?" Naye kamwidika, "Ghweghwe mkulu." 6 Apfo Yehu kenuka kengila mng'anda. Baho nabii kamghidila ghamapfuta mwitwi mwake, kuya kalonga "IMNDEWA wa Isiraeli kolonga apfino, ‘Nokubaka ghamapfuta uwe mfalume wa iwanu wangu wa Isiraeli. 7 Kobamighwa uwakome iwanu wa ikaye ya Ahabu iyali mkulu wako, na nene nitsowakoma ka pfawawakomile manabii na iwatumighwa wose wa IMNDEWA iwakomighwe na Yezebeli. 8 Na iwanu wose wa Ahabu watsohupa ghendo. Nitsomkoma chila mwana mmale iyakoneka mna ng'anda ya Ahabu, yang'awa mtumwa au si mtumwa baye. 9 Na nene nitsoitenda ing'anda ya Ahabu iwe ka ng'anda ya Yeroboamu imwanaghe Nebati, na ka ng'anda ya Baasha mwana wa Ahiya. 10 Yezebeli ng'atsotsikighwa na munu baye, ilukuli lwake lutsakujighwa na wambwa mna isi ya Yezireeli.’ " Hayamalitse kulongsa apfo, nabii ayula kapfughula ghumlango koka.

11 Yehu hayalawile kunze yaghende kuna iwakulu wake wa ing'ondo, yumwe wawo kamghutsa, "Pfii kuna chinu chochose chilawile?" "Hebali imunu ayuno yana ilukwale katsa kuna ghweghwe?" Naye Yehu kamwidika, "Mwommanya imunu ayuno, na apfila pfayolongagha." 12 Nawo walonga, "Kwa mghutsu ghweghwe! Tulongele chayakulongele." Yehu kawalongela, "IMNDEWA kanongela apfino, ‘Nikubaka ghamapfuta uwe mfalume wa Isiraeli.’ "

13 Baho iwakulu weyaghe watsuma, waghenda kusola magwanda ghawo, waghatandatsa mna tsingatsi ili yemile. Kuya watowa malati na ukukemelela walonga, "Yehu ka mfalume!"

14 Apfo Yehu mwana wa Yehoshafati na mtsukulu wa Nimshi, kamtendela ghehile Yoramu. Naye Yoramu na iwanu wose wa Isiraeli wang'ali wobetetsa isi ya Ramoti Gileadi, ileke kutowighwa na Hazaeli mfalume wa Aramu. 15 Lekeni mfalume Yoramu tsakoya Yezireeli ili yahonei pfilonda pfake pfayatowighwe na Hazaeli mfalume wa Aramu. Yehu kawalongela "Ka mwemwe mwobama apfo, Mleke kumleka munu wowose yalawe muisi yaghende kuwalongela mbuli aino iwanu wa Yezireeli." 16 Baho Yehu kadina mna ghumtuka ghwake, koka Yezireeli, kwaapfila Yoramu tsang'ana yahone baye. Naye Ahazia mfalume wa Yuda tsakahulumka kaghenda kumlola.

17 Imunu iyang'ali yobetetsagha ghumnala ghwa Yezireeli hayawonile iwakulu wa Yehu wakutsa, kakemelela kalonga, "Nowona wanu wengi wakutsa." Baho Yoramu kalonga, "Msole mdina falasi yumwe, yaghende yaketingane nawo, kuya yawaghutse, ‘Pfihi mtsa ghoya?’ "

18 Apfo imdina falasi kaghenda ketingana na Yehu kamlongela, "Pfihi mtsa ghoya?" Naye Yehu kamwidika, "Heule utughutsa apfo? Ghweghwe hunduka utuwinze." Na ayula iyang'ali yobetetsa ghumnala kawalongela, "Imunu iyatumighwe kapfika, lekeni ng'akuya baye." 19 Apfo mfalume kamtuma mdina falasi wakeli. Naye hayawapfikile kawaghutsa, "Mfalume koghutsa apfino, ‘Pfihi mtsa ghoya?’ " Yehu kamwidika, "Heule utughutsa apfo? Ghweghwe hunduka uniwinze."

20 Na ayula iyang'ali yobetetsa ghumnala kawalongela, "Imunu iyawamtumile kapfika, lekeni naye ng'akuya keli baye." Pfipfila kalonga, "Naye kakwendesa ka Yehu mwana wa Nimshi, kwaapfila kakwendesa ka munu yana ilukwale."

21 Baho Yoramu kawalaghitsa kalonga, "Nyikileni ghoya mtuka ghwangu ghwa ing'ondo." Nawo hawamalitse ukwika ghoya ghumtuka, Yoramu mfalume wa Isiraeli na Ahazia mfalume wa Yuda woka akuno chila yumwe kadina ghumtuka ghwake, waghenda kwitingana na Yehu. Naye wampfika kuna ichibwalu cha Naboti, munu wa Yezireeli.

22 Yoramu hayamwonile Yehu kamghutsa, "Pfihi mtsa ghoya?" Naye Yehu kamwidika, "Hebali utughutsa tutsa ghoya aku iwanu iwotambikila pfinyagho, na wahawi wa mai wako Yezebeli wa wengi?"

23 Baho Yoramu kahunduka katsuma, akuno kolonga, "Ahazia ghweghwe kwobugha wanu!" 24 Yehu kasomola iminde yake, kamwasila ghumshale Yoramu, nagho ghuluta mmayegha na ghumuhoma ghumoyo ghwake. Naye Yoramu kafila mumo mna ghumtuka ghwake. 25 Yehu kamlongela Bidikari iyang'ali iyomwapfila mna ghumtuka, "Sola lukuli lwake ulwase mna mghunda ghwa Naboti Muyezireeli. Ukumbuke ahala ghweghwe na nene hatudinile ifalasi kuchughu kwa Ahaba, aba wake Yoramu, ahala IMNDEWA hayalongile chinu achino kuna yeye. 26 Kwa idamu aila ya Naboti na idamu ya wanaghe yaniyonile ahano mna ghamatsuwa ighanibitile, nelighita ghendo nene nitsokulihila achila chawakutendele mna ichibwalu achino. Lelo usole lukuli lwa Yoramu ulwase mna chibwalu achino, ka pfayalongile IMNDEWA."

27 Mfalume Ahazia wa Yuda hayonile ichilawile, katsumila kuna inzila ighenda Beti Hagani. Yehu kamuwinga akuno kokemelela kalonga, "Ayo naye pfipfila mkomeni!" Nawo wamlagha mna ghumtuka ghwake hawang'ali woghenda Guri, isi ili habehi na Ibleamu, lekeni katsumila Megido, kafila kuko.

28 Iwatumighwa wake walusola ilukuli lwake mna ghumtuka woya nalwo Yerusalemu, wamtsika kwawatsikighwe iwahenga wake mna ghumji ghwa Daudi.

29 Ahazia kawa mfalume wa Yuda mna ghumwaka ghwa kumi na ghumwe ghwa mfalume Yoramu mwana wa Ahabu kutawala Isiraeli.

30 Yehu hayapfikile Yezireeli, Yezebeli ma tsakahulika aghala ghose ighalawile. Kebakatsa wanja mna tsinenge tsake na katana mvili tsake, kuya kaghenda kuna lidilisha yakasungulile kunze. 31 Yehu hayang'ali yakwingila hana lilango, Yezebeli kamghutsa, "Ghweghwe yuuli ka Zimri, yaukoma iwakulu wako, pfihi kwakutsa ghoya?"

32 Yehu kalola mchanya kuna lidilisha kalonga, "Yuhi yakuwa hamwe na nene?" Weli au wadatu, awala iwang'ali wosang'ana mna ing'anda ya mfalume wamsungulila kulawa mna lidilisha. 33 Naye Yehu kalonga, "Mwaseni hasi ipinga ayo!" Apfo wamwasa hasi, na idamu yake ingi yenela mchanya mwa ubanda na mna wafalasi, nawo wafalasi wambajughabajugha. 34 Kuya Yehu kengila mng'anda, kaja na kanwa. Kuya kalonga, "Mtsikeni ipinga ayo iyalighitighwe, kwaapfila yeye tsa neghe mfalume." 35 Lekeni hawaghendile kumtsika, ng'awonile chinu baye ila wona lipate lya litwi na imipate ya ghamatsayo na ya ghamoko. 36 Apfo woya wamlongela Yehu. Naye kalonga, "Aino iyo imbuli ya IMNDEWA iyalongile kubitila mtumighwa wake Eliya imunu wa Mtishibi ahala hayalongile, ‘Mna chibwalu cha Yezireeli iwambwa watsoluja lukuli lwa Yezebeli. 37 Lukuli lwa Yezebeli lutsakoneka ka mipfi mna ghumghunda ghwa Yezireeli, ili yaleke kulawila munu wowose iyatsomtanga.’ "