1 Naye Atalia mai wake mfalume Ahazia, hayonile mwanaghe kafa, tsakalamla kaghenda kuwakoma iwanu wose wa ikaye ya mfalume.

2 Lekeni Yehosheba, neghe wa mfalume Yoramu, lumbu wake Ahazia, kamsola chinyele Yoashi kulawa mna iwana wa mfalme iwang'ali wobama ukukomighwa, kamwika mna chiheleto cha ukuwasa yeye na pinga iyang'ali iyomlela. Tsakampfisa ili Atalia yaleke kumwona, apfo Yoashi ng'akomighwe baye. 3 Naye Yoashi kakala na Yehosheba kwa miyaka sita, aku kapfisighwa mna ing'anda ya IMNDEWA, ahala Atalia hayang'ali iyotawala isi.

4 Lekeni mna ghumwaka ghwa saba mtambika Yehoyada kawakema iwakulu wa ing'ondo wa Wakari na iwabetetsi, waghende kuna ing'anda ya IMNDEWA. Kuko keleghana nawo, na kawalighita mumo mna ng'anda ya IMNDEWA, kuya kawalangusa Yoashi mwana wa mfalume Ahazia. 5 Pfipfila kawalaghitsa kalonga, "Hamkutsa ukukalitsa mna litsuwa lya Sabato, selusi yenu imwe watsokalitsa ing'anda ya mfalume, 6 na selusi ingi ya mwemwe watobetetsa hana lilango lya Suri, na wamwenga wenu wabetetse hana lilango lya kuchughu kwa iwabetetsi. Apfo pfipfo pfamtsobetetsa ing'anda ya IMNDEWA ileke kubenighwa. 7 Makingili aghala meli ighabwihilagha mna litsuwa lya sabato, watsokalitsa ing'anda ya IMNDEWA, wambetetse mfalume Yohashi. 8 Mtsomtsunguluka mfalume, aku chila munu kakinda silaha mna ghamoko ghake, na imunu wowose iyobama kuwasoghelela, ayo mumkome ghendo. Kaleni na mfalume, kokose kwayoghenda."

9 Iwakulu wa ing'ondo watenda ka mtambika Yehoyada pfayawalaghitse. Chila yumwe kaghala wanu wake, na awala iwoghenda ukukalitsa mna litsuwa lya Sabato na awala iwamalitse ukukalitsa, wose wamghendela mtambika Yehoyada. 10 Kuya mtambika Yehoyada kaweng'a iwakulu wa ng'ondo, imighoha na tsingawo itsikalile tsa mfalume Daudi, na atsila itsikighwe mna ing'anda ya IMNDEWA. 11 Nawo iwabetetsi tsawema, kulawa membe imwe ya ing'anda mbaka membe ingi watsunguluka imatsabahu na ing'anda yose, na chila munu kakinda tsisilaha tsake ili wamtsunguluke mfalume. 12 Naye Yehoyada kamlapfa kunze imwana wa mfalume, kamfatsa litaji mwitwi, kamwing'a ghamalaghitso gha kifalume. Kuya kambaka mapfuta na kamsaghula yawe mfalume. Nawo watowa makofi wakemelela walonga, "IMNDEWA yakwike mfalume!"

13 Atalia hayahulike iwanu na awala iwabetetsi wokemelela, kawaghendela iwanu awo iwakalile mna ing'anda ya IMNDEWA. 14 Hayasungulile kamwona mfalume kema habehi na ingutso hana lilango lya ing'anda ya IMNDEWA, ka pfaitsoweleke, akuno iwakulu wa ing'ondo wema habei na mfalume watowa malati, na iwanu wose iwali muisi wodeng'elela. Baho Atalia kadegha magwanda ghake kakemelela kalonga, "Konibiduka! Konibiduka!"

15 Kuya mtambika Yehoyada kawalaghitsa iwakulu wa ing'ondo kalonga, "Mlapfeni kunze mmwike haghati ha iwanu, na imunu wowose ayula iyomuwinza, ayo yakomighwe," Kwaapfila mtambika tsakalonga apfino, "Mleke kumleka yakomighwe mna ing'anda ya IMNDEWA." 16 Apfo wamghogha, wambititsa hawakwingilila wafalasi kuna ing'anda ya mfalume, na wamkomela kuko.

17 Kuya Yehoyada kawatenda iwanu na mfalume welaghane na IMNDEWA, na ukwilaghana kwao wawe iwanu wa IMNDEWA, pfipfila kamtenda mfalume na iwanu welaghane.

18 Kuya iwanu wose waghenda kuna ing'anda ya miulungu Baali, waighwisa hasi, na waibomola matsabahu yake na pfinyagho pfake pfose mbaka wamkoma Matani mtambika wa Bali hambele ha imatsabahu. Naye mtambika Yehoyada kaweka iwanu wakalitse ing'anda ya IMNDEWA. 19 Pfipfila tsakawasola iwakulu wa ing'ondo, Wakari, na iwobetetsa, na iwanu wose wa isi wamuhulumsa mfalume hasi kulawa mna ing'anda ya IMNDEWA mbaka kuna ing'anda ya mfalume. Nawo wabitila inzila ila yawabitilagha iwanu iwokalitsa kughende kuna ing'anda ya mfalume. Naye kakala hana ichighoda chawokala iwafalume. 20 Apfo iwanu wose iwali muisi tsawadeng'elela, na isi yose tsaikala tulu, kwaapfila Atalia tsakakomighwa na lipanga hana ing'anda ya mfalume. 21 Naye Yoashi tsakana miyaka saba ahala hayanzile kutawala isi ya Yuda.