1 Elisha kalonga, "Tegheletsa chayolonga IMNDEWA, ilupfi saa ka aino, makimbo madatu gha utimbo wa ngano ghatsoutsighwa kwa shekeli imwe ya fetsa, makimbo sita gha shayiri ghatsoutsighwa kwa shekeli imwe ya fetsa hana lilangao lya Samaria."

2 Imtumighwa yumwe, mfalume iyafughamile ghamoko ghake mna yeye, kamlongela imunu wa IMNDEWA, "Hata ka IMNDEWA yang'ekile madilisha kulanga, angu chinu achino ching'adahike?" Elisha kamwidika, "Ghweghwe kutsakona kwa tsinenge tsako ghumwenyegho, lekeni ng'utsakuja baye chijo chochose achila."

3 Wanu wane, wana ukoma tsawakala hana lilango lya ukwingila mna ghumji, welongela iwenyegho, "Heule twokala ahano mbaka tufe na inzala? 4 Tung'alonga twingile mna ghumji, ako kuna nzala, nayo itsotukoma, lekeni tung'akala ahano, pfipfila tutsakufa. Apfo tukeni kuna indalo ya Waaramu, ako wodaha kutukoma au watuleke wagima." 5 Apfo chisi hachanzile ukwingila, iwanu awala wane iwana ukoma, waghenda akula kwawapfikile Waaramu, lekeni hawapfikile ako tsa kuduhu munu. 6 Kwaapfila IMNDEWA kawatend iwanu wa Aramu wahulike ka wakutsa wanu wengi wana wafalasi, na mituka ya ing'ondo, apfo welongela. Mfalume wa Isiraeli kawakema Wahiti na Wamisiri watse kututowa! 7 Apfo watsuma mna ichilo chicho, waleka ghamahema ghawo, na wafalasi wawo, na pfihongwe wawo. Watsuma waleke ukukomighwa.

8 Iwanu awala wane wana ukoma hawapfikile mmbalimbali mwa indalo, wengila mna lihema limwe. Waja na wanwa na wasola fetsa, nzahabu tsinguwo, kuya woka waghenda wapfisa ipfinu pfawo. Kuya waghenda kuna lihema lingi na watenda pfipfila. 9 Kuya welongela iwenyegho, "Chinu achino chatutenda ng'achinoghile baye! Yatuli nayo leloli mbuli inoghile, na tung'enyamala na kubeta mbaka nemitondo, twetwe tutsakoneka tuna totso. Sambi baha tukeni tukawalongele watumighwa wa mfalume."

10 Apfo waghenda na wawakema iwanu awala iwobetetsa lilango lya ghumji, wawalongela, "Tughenda kuna indalo ya Waaramu, lekeni ng'atwonile munu baye, wala litsi lya munu, twona wafalasi na pfihongwe wohighwa, na ghamahema ghawo waghaleka ka pfaghali"

11 Iwabetetsi wa lilango walalatsa tsimbuli atso mbaka tsipfika ukaye kwa mfalume. 12 Mfalume kalamka nechilo kawalongela wakulu wake wa ing'ondo, "Lelo nitsowalongela achila chawatutendele. Wawo womanya ghendo ka tuna nzala, apfo waleka indalo waghenda kwipfisa mlwanda na kutonga ka twetwe tutsoleka kaye tsetu tukahemele chokuja, na wawo watughoghe wagima na kughusola ghumji." 13 Mkulu wake yumwe wa ing'ondo kamlongela, "Uwaleke iwanu waghende na wafalasi watano iwakalile kuna ghumji, ka ghehile ghang'awalawi ako, twetwe tutsohona, kubita twetwe wose Waisiraeli tukale ahano kuya tufe wose" 14 Apfo wasaghula mituka mili na wafalasi wawo, naye mfalume kawatuma waghenda kwa Waaramu, kawalaghitsa awala iwakwendesa, "Ghendani mkalole." 15 Iwanu awo wawawinzilitsa mbaka Yoridani, na nzila yose imema tsinguwo na pfinu pfawasile Waaramu hawang'ali wotsuma. Apfo iwanu awala watumighwe woya wamlongela mfalume. 16 Wanu wa Samaria walawa, waghenda kuboka ipfinu mna ghamahema gha Waaramu. Apfo, ilawawila pfipfila ka pfayalongile IMNDEWA, makimbo madatu gha utimbo wa ngano ghatsoutsighwa kwa sendi shekeli imwe, makimbo sita gha shairi ghatsoutsighwa kwa sendi shekeli imwe.

17 Naye mfalume tsakamwika munu ayula iyaghamile ghamoko ghake, yabetetse lilango, na iwanu wambayugha bayugha hana lilango, naye kafila baho, ka imunu wa Imulungu pfayalongile ahala mfalume hayahumke kughenda ukaye yake. 18 Ilawila ka imunu wa Imulungu pfayalongile, ilupfi saa ka aino, makimbo madatu gha utimbo wa ngano utsoutsighwa kwa pfetsa shekeli imwe, makimbo sita gha shairi ghatsoutsighwa kwa fetsa shekeli imwe mna ghumji ghwa Samaria. 19 Mkulu ayula wa ing'ondo iyamlongela imunu wa Imulungu, "Hata ka IMNDEWA yang'ekile madilisha kulanga, angu chinu achino ching'adahike?" Na Elisha kamwidika, "Kutsakona kwa nenge tsako mwenyegho, lekeni ng'utsakuja baye chijo chochose achila." 20 Apfo pfipfo pfailawile, iwanu wambayugha naye kafila baho.