1 Mfalume Hezekia hayahulike aghano, kadegha ghamagwanda ghake, kapfala ghamaghunila, kuya kaghenda kuna ing'anda ya IMNDEWA. 2 Kamtuma Eliakimu, mwanaghe Hilikia, iyang'ali yakwimilila ing'anda ya mfalume, na Shebina iyali mwandishi wake, na iwatambika wakulu, wamghendela nabii Isaya mwanaghe Amozi aku wapfala ghamaghunila. 3 Nawo wamlongela Isaya apfino, "Hezekia kolonga apfino, leloli tsuwa lya ukughaya, na lya ukukembelighwa, na lya ukulighighwa, twetwe tuwa ka pinga iyobama kweleka, lekeni tsingupfu tsa ukweleka kahela. 4 Songaha IMNDEWA, Imulungu wako katsohulika ghayalongile mkulu wa masikali iyatumighwe na mkulu wake, mfalume wa Ashuru yamlighe Imulungu iyali mgima, naye IMNDEWA, Imulungu wako katsomkembela kwa aghala ghayahulike, naye kokubama uwalombele awala chidogho iwalekighwe wagima."

5 Watumighwa wa mfalume Hezekia hawapfikile kwa Isaya, 6 Hayawahulikitse Isaya kawedika apfino, "Mlongeleni mkulu wenu, IMNDEWA kolonga apfino, ‘Mleke kupfuka kwa aghala ghamuhulike, aghala watumighwa wa Ashuru ghawanilighile nene. 7 Nitsomtenda mfalume yahulike mbuli itsomtenda yoye ukaye yake, kuya katsakuya kuna isi yake, na kuko nitsotenda yakomighwe na lipanga.’"

8 Imkulu ayula wa masikali kahulika ka mfalume koka Lakishi kaghenda kughutowa ghumji ghwa Libina. 9 Kuya mfalume Senakeribu wa Ashuru hayahulike ka mfalume Tirihaka wa Kushi kakutsa kwitowa naye, katuma wanu keli waghende kwa Hezekia, kalonga 10 "Mlongeleni mfalume Hezekia wa Yuda, ‘Uleke kutoghola Imulungu wako yaumwaghamila yakughutsukile hayolonga ka Yerusalemu ng'aitsobokighwa baye na mfalume wa Ashuru. 11 Ghweghwe kuhulika achila chawatendile wafalume wa Ashuru kwa isi tsose, kutsihinya ghendo, pfihi kwakwaghitsa ghweghwe kutsokomboka? 12 Angu milungu ya wanu wa isi tsingi tsaidaha kutsikombola isi tsawo, ahala sekulu tsangu hawawatowile, ayula mulungu wa Gozani, na wa Harani, na wa Rezefu na awala iwanu wa Edeni iwakalile Telasari? 13 Apfi ilikwani milungu ya Hamati na Aripadi? Walikwani milungu ya Sefarivaimu, Hena na Iva?’ "

14 Mfalume Hezekia kaibokela ibaluwa kulawa kwa iwanu iwatumighwe kuya kaisoma. Kuya kaghenda kuna ing'anda ya IMNDEWA, na kayika hambele ha IMNDEWA. 15 Na Hezekia kalomba kwa IMNDEWA, kalonga, "Ghwe IMNDEWA, Imulungu wa Isiraeli, yaukala mna ichighoda chako cha ufalume, mchanya mwa ipfiumbe wana ghamabawa iwakemighwe makerubi, ghweghwe kwa Imulungu yuliyeka, tsifalume tsose tsili muisi tsa hasi hako. Ghweghwe kuumba isi na kulanga. 16 Ghwe IMNDEWA, ufumbule tsinenge tsako wone, uwambe lighutwi lyako utegheletse ghayalongile Senakeribu iyakulighile ghweghwe Imulungu yuli mgima. 17 Ghwe IMNDEWA, twomanya ghendo ka wafalume wa Ashuru wawakoma wanu wengi wa isi tsingi na kutsihinya itsi tsawo, 18 na wayasa imilungu yawo mmoto ilakale, kwaapfila tsa si milungu baye, kumbe tsa mibiki na ghamabwe, itendighwe kwa ghamoko gha iwanu. 19 Lelo IMNDEWA Imulungu wetu tukombole kulawa mna ghumoko ghwake, apfo tsifalume tsose tsa isi yose tsitsomanya ka ghweghwe uliyeka IMNDEWA, kwa Imulungu."

20 Kuya Isaya mwana wa Amozi katuma usenga kwa mfalume Hezekia kalonga, apfi pfipfo pfayolonga IMNDEWA, Imulungu wa Isiraeli. Nihulika achila chaunombile kwa ajili ya Senakeribu, mfalume wa Ashuru. 21 Nene nomlongela apfino, "Ghumji ghwa Yerusalumu ghokuseka, na ghokubetsa, ghweghwe Senakeribu, na ghokuhighisila litwi lyake. 22 Angu umlighile nani na umlighite nani? Angu umkembele nani na tsinenge tsako tsina ichidandali tsimsodolele nani? Kunendela agho nene inili Mwenzeluka wa Isiraeli." 23 Kuwatuma iwanu wako watse wandighe nene IMNDEWA, tsakulonga, "Kwa imituka yangu mingi ya ing'ondo, nidina pfidanando pfose pfa ipfidunda, ona ipfidanando pfa kutali pfa ichidunda cha Lebanoni. Niighwisa mibiki yake mitali ya mikataluba, na mibiki yake inoghile ya misonobali, nipfika mna tsiisi tsake tsa kutali, na nyanga mna mihulo yake mikulu. 24 Nihimba pfisima mna isi tsa wagheni na nuwa ghamatsi ghake. Ighamatsayo gha ighamaghulu ghangu ghanyalitsa tsimbwibwi tsose tsa Misiri." 25 Angu ng' uhulike baye ka tsanibama kutenda chinu achino kulawa ghumwande. achino ichilalawila sambi tsanibama ukutenda kulawa ghumwande. Nikwing'a ingupfu ya ukwiitowa imiji itsungulutsighwe ubanda iwe pfilundo pfa ghamabwe. 26 Iwanu wake tsawahela ngupfu, watenyuka ghendo, na waumbulighwa. Wawa ka mitsani ya kumghunda, ka nyotela ndekendeke, ka mitsani ikota mna ichiswili cha ing'anda, ighonyala ng'ana ghakule baye. 27 Lekeni nene nokumanya, kwaukala, kwaulawa, nakwa ughenda, na apfila pfaunighudubukila. 28 Nene nihulika kwa ghamaghutwi ghangu nimwenyegho apfila pfaunighudubukila na apfila pfauli naichidandali, apfo nitsakwika indoano yangu mna imula yako, na nitsokoha chibang'wa changu mna ghumlomo ghwako, na nene nitsokuyitsa kuna inzila yautsile nayo.

29 Kuya Isaya kamlongela mfalume Hezekia, "Achino chitakuwa chitango kuna ghwegwe Hezekia, Ghumwaka ghuno na ghumwaka ghwa ilupfi mtsakuja apfila ipfikota pfenyegho. Lekeni ghumwaka ghwa ikacha mtsakuja apfila pfamhanda na pfampfuna, mtsohanda mitsabibu na ukuja ghamatunda ghake. 30 Na mwemwe imuhona mna likabila lya Yuda mtsakongetseka na mwakuwa wengi ka mbiki pfaghulapfa imitsisi hasi na kweleka ghamatunda. 31 Kutsakuwa na wanu iwahonile mna ghumji ghwa Yerusalemu, na mna ichidunda Sayuni kutsakuwa na wanu iwalekighwe wagima, Kwaapfila IMNDEWA yana ingupfu tsakabama ghendo kulitenda alino lilawile. 32 Apfo achi chicho IMNDEWA chayomlongelela mfalume wa Ashuru, yeye ng'atsakwingila baye wala kwasa ghumshale mna ghumji aghuno. Ng'atsakutsa baye na ingawo yake wala ukwika maasikali wake waghupfingile ghumji. 33 Kwa inzila yiyila iyatsile nayo, katsakuyila yiyo, ng'atsakwingila baye mna ghumji, apfi pfipfo pfayolonga IMNDEWA. 34 Nitsoghukinga ghumji aghuno na kughukombola, kwajili yangu nene, na kwa ajili ya lilaghno lyanyikile na mtumighwa wangu Daudi." 35 Chilo chicho imalaika wa IMNDEWA kengila mna indalo ya Waashuli na kawakoma wanu laki imwe na samanini na tano elufu, Na iwanu hawalamke nemitondo wona tsing'uli tsa iwanu chila hanu. 36 Baho Mfalume Senakeribu wa Ashuru koka, kaghenda kukala Ninawi. 37 Tsuwa limwe hayang'ali yotambika mna ing'anda ya Imulungu wake Nisiroki, iwanaghe weli iwamale Adirameleki na Sharezeri wamkoma na limaghe, kuya watsumila kuna isi ya Ararati. Naye Esari Hadoni, imwanaghe kawa mfalume, hanu hake.