1 Lelo pinga yumwe iyakwelighwe na yumwe wa kingili lya manabii wa IMNDEWA kamlongela Elisha, "Mtumighwa wako iyakalile mmale wangu kafa, naghwe komanya ghendo apfila pfayampfukile IMNDEWA. Lekeni munu yumwe iyomdai kakutsa kuwasola iwasongolo wangu weli yoke nawo wakawe watumwa wake."

2 Elisha kamwidika, "Lelo nikwapfile choni? Unongele una choni ukaye yako?" Ipinga ayo kamwidika, "Nene mtumighwa wako nahela chinu ghendo, ila nina mapfuta chidogho mna isupa."

3 Elisha kamlongela, "Ghenda kwa iwanu iwokala naghwe habehi, walombe pfiya pfilihela chinu, uleke kulomba pfiya chidogho. 4 Kuya wingile, wihindile mng'anda ghweghwe na wanagho. Wanze kughida ghamapfuta mna ipfiya apfo, na chila chiha ching'amema, chiseghetse hambali."

5 Apfo koka kehindila mng'anda yeye na wanaghe, wamghalila ipfiya, naye kanza kughida ghamapfuta. 6 Ipfiya pfose hapfimemile, kamlongela mwanaghe, "Ndetele chiya chingi." Lekeni kamwidika, "Kuduhu chiya chikalile." Baho ghamapfuta ghaleka ukulawa. 7 Ipinga ayo kaghenda kumlongela imunu wa Imulungu, naye kamlongela, "Utsa ghamapfuta agho, na ulihe acho chawokudai, nagho ighakalile mkale nagho ghweghwe na wanagho."

8 Tsuwa limwe Elisha kaghenda Shunemu, kuko tsakuna pinga yumwe yana tsimali, ipinga ayo kamlomba yatse yaje chijo. Apfo chila Elisha hayabitile inzila ayo, yang'ali yakwimaghahanu aho na kaja ichijo. 9 Ipinga ayo kamlongela immale wake, "Imunu ayuno iyabitagha ahano hakaye yetu kakoneka ka munu iyelile ghendo wa Imulungu. 10 Tumtsengele chiheleto mchanya mwa ing'anda yetu, twike lusatsi, imetsa na chitasa, yawaseghe chila hayotwangila."

11 Tsuwa limwe Elisha hayatsile, kagheluka kuchanya kuwasa, kuna ichiheto chake. 12 Kamlongela mtumighwa wake Gehazi, "Ghenda ukamkeme mai ayuno Mshunami." Na hayamkemile katsa, kema hambele ha Gehazi. 13 Elisha kalonga, "Mlongele, ‘Twona uluso wako waututendele. Lelo na twetwe tukutendele choni? Pfihi tukulombele chinu chochose kwa mfalume au kwa mkulu wa maasikali?’ " Naye kamwidika, "Nene nokala na iwanu wangu, wodaha kungaya chila chinu."

14 Elisha kamghutsa, "Lelo nimtendele choni?" Gehazi kamwidika, "Kahela mwana na immale wake kalala."

15 Kuya Elisha kamlongela, "Mkeme ahano." Apfo kamkema, naye katsa kema hana ghumlango. 16 Kamlongela, "Mna ghumsimu ka aghuno ghumwaka ghukutsa kutsomhaghata mwana mna ghamoko ghako." Ipinga ayo kamwidika, "Baye mkulu wangu, uleke kungutsukila nene mtumighwa wako, ghwe munu wa Imulungu!"

17 Lekeni ipinga ayo kakinda inda, keleka mwana mmale matsuwa ghaghala mna ghumwaka ghuwinzile, ka Elisha pfayamlongele.

18 Imwana kakula, na tsuwa limwe kaghenda kwa aba wake, iyang'ali yopfuna kumghunda hamwe na iwanu wake iwopfuna, 19 kamlongela aba wake, "Litwi lyangu mwe! Litwi lyangu lyotama!" Aba wake kamlongela mtumighwa wake, "Umbape umuyitse kwa mai wake." 20 Imtumighwa kamsola kamuyitsa kwa mai wake, naye kakala mmahatsa mwa mai wake mbaka nemisi, kuya kafa. 21 Mai wake kagheluka kuchanya kamuwasitsa mna ilusatsi lwa imunu wa Imulungu, kuya kahinda ghumlango kalawa koka.

22 Kuya kamkema immale wake kamlongela, "Ndetele munu yumwe na chihongwe yumwe, nimghendele sambi baha imunu wa Imulungu kuya mbuye." 23 Mmale wake kamghutsa, "Heule ughenda leloli? Leloli si chihungo cha kulawa kwa lwetsi baye, wala si tsuwa lya Sabato baye." Naye ipinga ayo kedika, "Ghweghwe leka pfipfo." 24 Kamwika ghoya ichihongwe kwa ukumdina, kuya kamlongela imtumighwa wake, "Umwendese, umtende yatsume na yaleke kwima mbaka nikulongele." 25 Apfo koka kaghenda kwa imunu wa Imulungu, kuna ichidunda cha Karimeli. Imunu wa Imulungu hayamwonile kutali kakutsa, kamlongela imtumighwa wake Gehazi, "Lola nomwona ipinga Mshunami ayula kakutsa. 26 Tsuma, ughende uketingane naye kuya umghutse, ‘Pfihi kulamka? Mmale wako kalamka? Imwanagho naye kalamka?’ " Naye kamwidika, "Wose tulamka." 27 Ipinga ayo hayapfikile kwa imunu wa Imulungu kuchidunda, kamkinda ghamaghulu, Gehazi kasoghela, yamkunughitse, lekeni imunu wa Imulungu kamlongela, "Mleke! Kana usungu mkulu, lekeni IMNDEWA kanipfisa na ng'anongele baye alino?"

28 Ipinga ayo kamlongela Elisha, "Pfihi tsanikulomba mwana, angu tsasikulongele baye uleke kunighutsukila?" 29 Baho Elisha kamlongela Gehazi, "Wiyohe ligholole lyako mchuno, sola ing'weku yangu, uikinde mmoko mwako na utsume. Ung'etingana na munu, uleke kumlamsa, na munu wowose yang'akulamsa uleke kumwidika, na ukeke ing'weku yangu mna ichihanga cha imwana."

30 Lekeni mai wa imwana ayo kalonga, "Nelaha kwa IMNDEWA iyali mgima na ghweghwe yauli mgima, nene sitsokuleka baye." Apfo kenuka kamuwinza mai wa imwana ayo. 31 Gehazi kalongola na hayapfikile keka ing'weku ya Elisha mna ichihanga cha imwana, lekeni imwana ng'ahumule baye, na kuduhu chinu ichilangusa ka mgima. Apfo Gehazi koya kwa Elisha kamlongela, "Imwana ng'alamke baye."

32 Apfo Elisha hayapfikile mng'anda, kamwona imwana kafa, kawasa mlili. 33 Kengila mng'anda kehindila ghumlango, yeye na imwana ayula wose weli, kamlomba IMNDEWA. 34 Kadina mlili, kamuwasila imwana, keka ghumlomo ghwake mchanya mwa ghumlomo ghwake, na nenge tsake mchanya mwa tsinenge tsake, na ghamoko ghake mchaya mwa ghamoko ghake. Na hayegholose mchanya mwake, baho ilukuli lwa imwana lwanza kutsumbuka. 35 Elisha kenuka na kangakanga mng'anda, kuya kadina keli mlili na kegholosa keli mchanya mwake. Imwana katowa miyesa mala saba, na kafumbula tsinenge tsake. 36 Elisha kamkema Gehazi kamlongela, "Nikemele ipinga ayo Mshunami." Naye kamkema. Na hayamkemile Elisha kamlongela, "Msole mwanagho." 37 Kengila mghati kenama hana maghulu gha Elisha mbaka uhanga wake udonza hasi, kuya kamsola imwanaghe, koka.

38 Elisha koya Giligali, na tsakukala na nzala mna isi ayo, na kingili lya manabii tsawakala hambele hake. Kamlongela imtumighwa wake, "Ugheleke libigha mmoto uwambikile ichijo kingili lya manabii." 39 Yumwe wawo kaghenda kumghunda kubawa mbogha. Kuko kaghona maghitsi gha kubagho, kabawa maghitsi mengi na kaghowa mna ligwanda lyake, koya nagho, kaghaganagana kuya kagheka mbigha na ng'awaghamanyile baye. 40 Apfo wawekila iwanu waje, lekeni hawaghalanzile wamlilila Elisha, "Ghwe imunu wa Imulungu chijo chili mbigha chokoma" Na ng'awajile baye.

41 Elisha kalonga, "Ngalileni utimbo." Naye kaughela mbigha kuya kalonga, "Lelo uweng'e ichijo waje." Baho mna libigha tsakuduhu keli ichinu ichikoma.

42 Munu yumwe kalawa Baali Shalisha, kamghalila pfighate ishilini, pfambikighwe na shayili na pfighate ipfilawile mna inganyo ya ipfunighwe sambi Elisha kalonga, "Uweng'e iwanu waje," 43 Imtumighwa wake koyila keli kughutsa, "Nitsogholatse kwa wanu wose awano miya?" Lekeni Elisha, kamwidika, "Uweng'e iwanu waje, kwaapfila IMNDEWA kolonga apfino, ‘Watsakuja na chijo chingi chitsokala.’ " 44 Kawekila ichijo acho, nawo waja na chingi chikala, ka apfila pfayalongile IMNDEWA.