1 Elisha tsakamlongela ipinga ayula, iyamtsilihule mwanaghe yawe mgima, "Ghenda na wanu wako, kakale kokose kwaubama, kwaapfila IMNDEWA kaghala nzala muisi, nayo itsokala kwa miyaka saba." 2 Apfo ipinga ayo kenuka, katenda ka imunu wa Imulungu pfayamlongele. Apfo yeye na iwanu wa akaye yake woka, waghenda kukala mna isi ya Wafilisti kwa miyaka saba. 3 Miyaka saba haimalile, koya kulawa mna isi ya Wafilisti, kaghenda kwa mfalume kulomba ng'anda yake na isi yake. 4 Mfalume yang'ali yolonga na Gehazi, mtumighwa wa imunu wa IMNDEWA, kamlongela, "Nongele ghose ghayatendile Elisha." 5 Na hayang'ali komlongela mfalume apfila Elisha pfayamtsilihule imunu iyafile, baho kalawila ipinga ayula yana imwana Elisha iyamtsilihule, katsa kumlomba mfalume yamwing'e ng'anda yake na isi yake. Gehazi kamlongela, "Mfalume wangu pinga mwenyegho yuyo ayuno, na ayuno yuyo mwanaghe, Elisha iyamtsilihule." 6 Mfalume kamghutsa ipinga ayo, naye kamlongela chila chinu. Apfo mfalume kamsaghulila mkulu wake yumweli wa maasikali, kamlongela, "Muyitsile chila chinu chili chake, sendi tsake tsose tsilawile mna imighunda yake kulawa tsuwa alila liyailekile."

7 Kuya Elisha kaghenda Dameski, akuno mfalume Ben hadadi wa Aramu yang'ali yoghula. Iwanu wamlongela ka munu wa Imulungu ka Dameski. 8 Baho kamlongela Hazaeli, "Kinda chinu mmoko mwako ughende uketingane na imunu wa Imulungu, mghutse IMNDEWA kwa mlomo wake, pfihi nitsohona utamu auno au sitsohona baye?" 9 Hazaeli kaghenda kwitingana na Elisha akuno kaduta ipfinu pfa ikumghweka, ipfinoghile ipfilawa Dameski, ka mitsigho ya ngamia alubaini. Hayengile mng'anda kema habehi naye kamlongela, "Imwanagho Ben hadadi mfalume wa Aramu kanituma nikughutse apfino, ‘Pfihi utamu wangu nitsohona?’ "

10 Elisha kamwidika, "Ghenda ukamlongele, ‘Kutsohona ghendo.’ " Lekeni IMNDEWA kanangusa yeye katsakufa. 11 Baho Elisha kamtsodolela tsinenge kwa wogha mbaka Hazaeli kona chinyala, Baho imunu wa Imulungu kanza ukulila. 12 Na Hazaeli kamghutsa, "Heule hulila mkulu wangu?" "Nolila kwaapfila nomanya ghehile ghautsowatendela iwanu wa Isiraeli." Kutsotsilakatsa tsing'anda tsawo na kuwakoma iwana wawo kwa mimaghe, kutsowadughadugha iwana wawo wadowado, na kutsowadegha iwapinga wana inda. 13 Hazaeli kalonga, "Lekeni nene mtumighwa wako inili yumbwa hela, nidahatse kutenda pfinu apfo pfikulu?" Elisha kamwidika, "IMNDEWA kanangusa ka ghweghwe kutsakuwa mfalume wa Aramu." 14 Kuya Hazaeli kamleka Elisha, koya kwa mkulu wake. Naye mfalume Beni hadadi imkulu wake, kamghutsa, "Elisha yakulongele choni?" Hazaeli kamwidika, "Kanongela ghweghwe kutsohona ghendo." 15 Tsuwa lya keli kasola gholole tsito, kalipfulamsa mna ghamatsi kuya kamghubika mchihanga mabka kafa. Kuya Hazaeli kawa mfalume hanu hake.

16 Mna ghumwaka ghwa tano ghwa mfalume Yoramu mwana wa Ahabu mfalume wa Isiraeli, Yehoramu mwana wa Yehoshafati hayakalile mfalume wa Yuda kanza kutawala. 17 Yeye tsakana miyaka salasini na mili hayawile mfalume, naye katawala Yerusalemu kwa miyaka minane. 18 Kawinza nzila tsihile tsa wafalume wa Isiraeli, ka ilukolo lwa Ahabu pfalutendile, kwaapfila tsakamkwela neghe Ahabu. Kamtendela nzambi IMNDEWA. 19 Lekeni IMNDEWA ng'abamile baye kuihinya isi ya Yuda, kwajili ya imtumighwa wake Daudi, kwaapfila tsakamlongela ka iwatsukulu wake watsoghendelela kutawala matsuwa ghose.

20 Mna ghamatsuwa gha Yehoramu, iwanu wa Edomu waubiduka ufalume wa Yuda, nawo wamsaghula mfalume wawo iwenyegho. 21 Apfo Yehoramu kaghenda Zairi na mituka yake yose ya ukukweghighwa na falasi. Kalawa nechilo kaghenda kuwatowa Waedomu iwamtsunguluke yeye na maasikali wake. Lekeni iwanu wake wa ing'ondo watsumila ukaye. 22 Na mbaka leloli aino iwanu wa Edomu wolema kutawalighwa na iwanu wa Wayuda. Mna ghamatsuwa ghagho nawo iwanu wa Libina waibiduka Yuda.

23 Aghala ghose ghayatendile Yehoramu, pfihi ng'aghandikighwe baye mna ichitabu ukukumbuka wafalume wa Yuda? 24 Yehoramu kafa na katsikighwa mna ikaye ya Daudi, naye Ahazia imwanaghe kawa mfalume hanu hake.

25 Mna ghumwaka ghwa kumi na mbili ghwa Yoramu mwana wa Ahabu mfalume wa Isiraeli, Ahazia mwana wa Yehoramu mfalume wa Yuda kanza kutawala. 26 Ahazia tsakana miyaka ishilini na mili hayawile mfalume, naye katawala Yerusalemu kwa mwaka ghumwe. Mai wake tsakakemighwa Atalia, mtsukulu wa mfalume Omri wa Isiraeli. 27 Kwaapfila yeye tsakakwela mna ing'anda ya Ahabu, katenda ghaghala ghawatendile iwanu wake Ahabu, na kamtendela ghehile IMNDEWA. 28 Mfalume Ahazia kelongotsa na Yoramu mwana wa Ahabu, waghenda ukwitowa na Hazaeli mfalume wa Aramu ako Ramoti Gileadi. Na kuko iwanu wa Aramu wamlagha Yoramu. 29 Apfo mfalume Yoramu koya mna isi ya Yezireeli yahone pfilonda pfake pfawamlaghile iwanu wa Aramu ako Ramoti hawang'ali wetowa na mfalume wa Aramu. Naye Ahazia mwana wa Yehoramu mfalume wa Yuda kahulumka kaghenda Yezireeli kumwona Yoramu mwana wa Ahabu, kwaapfila tsakana pfilonda.