1 Lelo IMNDEWA hayabamile kumsola Eliya kulanga mna ichipfulapfumbi, Eliya na Elisha tsawang'ali wamnzila, wolawa Giligali. 2 Eliya kamlongela Elisha, "Kala ahano, IMNDEWA kanituma ng'ende Beteli." Lekeni Elisha kamwidika, "Nelaha kwa IMNDEWA iyali mgima na kwa ghwegwe yauli mgima nene sitsokuleka baye." Apfo wahulumka waghenda Beteli. 3 Lelo kingili lya manabii iwakalile Beteli walawa waghenda kumghutsa Elisha apfino, "Angu kumanya ka leloli IMNDEWA komsola imkulu wako?" Elisha kedika, "Ona nimanya, lelo mwinyamale."

4 Baho Eliya kamdedetsa Elisha, kalonga, "Kala ahano Elisha, IMNDEWA kanituma ng'ende Yeriko" Naye kedika, "Nelaha kwa IMNDEWA iyali mgima na kwa ghweghwe yauli mgima, sitsokuleka baye."

5 Manabii iwokala Yeriko wamghendela wamghutsa, "Pfihi komanya leloli IMNDEWA komsola mkulu wako?" Kamwidika, "Ona nomanya, lelo mwinyamale."

6 Kuya Eliya kamlongela, "Kala ahano, IMNDEWA kanituma ng'ende kuna ghumto Yoridani." Naye kamwidika, "Nelaha kwa IMNDEWA iyali mgima na kwa ghweghwe yauli mgima, nene sitsokuleka baye." Apfo wose weli waghenda. 7 Na manabii hamsini waghenda mbaka kuna ghumto Yoridani, Eliya na Elisha tsawema habehi na ghumto, na manabii tsawema kutali chidogho. 8 Eliya katsula ligwanda lyake, kalibota kuya kalitowela mmatsi, nagho gheghola akuno na akuno, na awo weli waloka kumwambu, wabita hanu hanyalile. 9 Na hawalokile, Eliya kamlongela Elisha, "Nongele, nikutendele choni ng'ana nene nisolighwe baye?" Elisha kamwidika, "Nobama ning'ighwe tsisehemu mbili tsa iloho yako ya ukutenda pfihulo."

10 Eliya kamwidika, "Kulomba chinu ing'achidahika baye, lekeni kutsobokela ahala hautsombona nene nosolighwa, lekeni ka ng'umbona baye, ng'utsobokela baye."

11 Hawang'ali woghenda aku wodawala, baho kulawila mtuka ghwa moto na wafalasi wa moto, ghuwabaghula awo weli na Eliya kasolighwa kaghenda kulanga mna ichipfulapfumbi. 12 Elisha hayonile alino kalila, kakemelela, "Aba wangu! Aba wangu! Mkulu wa ing'ondo wa Isiraeli!" Naye Elisha ng'amwonile keli baye. Kuya Elisha kasola ghamagwanda ghake kaghadegha pfihande pfili. 13 Kuya kadondola ligwanda lya Eliya ilimlaghalile, koya kema mmbalimbali mwa ghumto Yoridani. 14 Kuya kasola ligwanda lya Eliya ilimlaghalile na lyiyatowele ghamatsi, kalonga, "Yalikwani IMNDEWA, iyali Imulungu wa Eliya?" Kuya naye kaghatowa ghamatsi na ligwanda alyo, ghamatsi nagho gheghola akuno na akuno, baho Elisha kaloka. 15 Na manabii awala hamsini iwalawile Yeriko wamwona kwa kutali, walonga, "Iloho ya Eliya ya ukutenda pfihulo yokala mchanya mwa Elisha." Na waghenda kwitingana naye na wenamitsa pfihanga pfawo mbaka hasi hambele hake. 16 Wamlongela, "Lola, twetwe watumighwa wako tuna wanu hamsini wana ingupfu, utuleke tuwatume waghende wakakubamile imkulu wako, songaha iloho ya MNDEWA imsola na kumwasa mna chidunda chimwe au mna ulwanda umwe."

17 Lekeni wawo wamdedetsa mbaka kona chinyala ukuwalemela, kawalongela, "Watumeni." Nawo wawatuma wanu awala hamsini, iwambamile kwa matsuwa madatu lekeni ng'awamwonile baye. 18 Hawoyile kwa Elisha, iyakalile ako Yeriko, kawalongela, "Pfihi tsasiwalongele baye mleke kughenda?"

19 Iwanu wa Yeriko wamlongela Elisha, mkulu wetu ka pfaulola mwenyegho, ghumji aghuno ghukala hanu hanoghile, lekeni ghamatsi ghake ng'aghanoghile baye na lidongo lyake ng'alimela chinu baye.

20 Kalonga, "Ngalileni lisinia lya sambisambi, na mumo mwike ghumkele," nawo wamghalila. 21 Elisha kaghenda hana imbwibwi, kasa ghumkele mmbwibwi, kalonga, IMNDEWA kolonga apfino, "Nighatenda ghamatsi aghano ghahone, kulawa sambi ng'aghatsotenda ipfijo pfileke kumela, litsotenda lidongo lya isi limele ipfijo." 22 Apfo ghamatsi ghahona mbaka leloli aino, ka pfayalongile Elisha.

23 Elisha kalawa Yeriko, kaghenda Beteli. Hayang'ali kamnzila, iwasongolo iwalawile kuna ghumji wanza kumwowela akuno wolonga, "Uke ahano, uke ahano, ghweghwe yuna uhalatsa."

24 Elisha kahunduka kawalola na baho kawalighita kwa taghwa lya IMNDEWA. Kuya walawila dubu weli mapinga kulawa kubagho, wawamopfula wasongolo alubaini na weli kulawa mna wawo wose. 25 Elisha kaghendelela na ghumwanza ghwake mbaka kapfika kuna ichidunda cha Karimeli, na hayalawile ako koya Samaria.