1 Yoramu mwana wa Ahabu kawa mfalume wa Isiraeli mna ghumwaka ghwa kumi na nane ghwa utawala wa Yehoshafati mfalume wa Yuda, naye Yoramu kaitawala Samaria kwa miyaka kumi na mili. 2 Yoramu kamtendela ghehile IMNDEWA, lekeni yeye ng'ehile baye ka aba wake na mai wake, kwaapfila tsakaimwagha ingutso ya Baali iyaifinile aba wake. 3 Hata apfo, Yoramu kaghendelela kutenda nzambi tsayatendile Yeroboamu mwana wa Nebati, iyawahonzile Waisiraeli watende nzambi, naye ng'atsilekile baye.

4 Mfalume Mesha wa Moabu yang'ali yofugha wang'olo, naye yang'ali yomwing'agha mfalume wa Isiraeli wang'olo laki imwe na mighala kulawa mna ng'unzu laki imwe. 5 Lekeni Ahabu hayafile, mfalume wa Moabu kambiduka mfalume wa Isiraeli. 6 Apfo mfalume Yoramu koka kulawa Samaria, kuya kawakema hamwe maasikali wake wose. 7 Katuma wanu waghende kwa Yehoshafati, mfalume wa Yuda, kamlongela, "Mfalume wa Moabu kanibiduka. Pfihi kutsoghenda na nene kwitowa na isi ya Moabu?" Mfalume kamwidika, "Nitsoghenda naghwe!" Nene na ghweghwe twa chinu chimwe, wanu wangu ka wanu wako, falasi wangu ka falasi wako. 8 Kuya kamghutsa keli, "Hatughenda ukuwatowa tubitila nzila yachi?" Naye kedika, "Tubitile nzila ya kunyika ya Edomu."

9 Apfo Yoramu mfalume wa Isiraeli kelongotsa na mfalume wa Yuda na wa Edomu. Hawatsunguluke kwa matsuwa saba, iwanu tsawahela matsi gha ukunwa wawo, wala gha ukuwanwesa iwanyama wawo. 10 Baho mfalume wa Isiraeli kalonga, "Angu achino choni! Angu IMNDEWA katukema hamwe twetwe wafalume wadatu tughoghighwe mna ghamoko gha mfalume wa Moabu?"

11 Baho Yehoshafati kaghutsa, "Pfihi ahano haduhu nabii wa IMNDEWA, ili kubitila yeye tudahe kumghutsa IMNDEWA?" Mtumighwa yumwe wa mfalume wa Isiraeli kedika, "Elisha mwana wa Shafati kabaha, iyang'ali yomwapfilagha Eliya kwa kumghidila ghamatsi ghamoko ghake." 12 Yehoshafati kalonga, "Nabii ayo kolongesa ghendo." Apfo mfalume wa Isiraeli na mfalume wa Edomu wahulumka waghenda kumlola. 13 Elisha kamlongela mfalume wa Isiraeli, "Angu nina choni naghwe? Ghenda kwa manabii wa aba wako na manabii wa mai wako." Lekeni mfalume wa Isiraeli kedika, "Baye! IMNDEWA yuyo iyatukemile twetwe wafalume wadatu yatwike mna ghamoko gha Wamoabu."

14 Elisha kalonga, "Kwa IMNDEWA iyali mgima, yanimsang'anila, ka si mfalume Yehoshofati wa Yuda baye, nene yanimtoghola, ning'alekile kukwalangula wala kukulola ghweghwe. 15 Lekeni ngalileni mtowa ching'weng'we." Na mtowa ching'weng'we hayang'ali yotowa, ingufu ya IMNDEWA imtsila Elisha 16 Naye kalonga, "IMNDEWA kolonga apfino, ‘Muhimbe masimo chila hanu mlwanda. 17 Kwaapfila ng'amtsolyona libeho baye wala imvula, lekeni ulwanda auno utsomema matsi, namwe mtsakunwa hamwe na wang'ombe wenu na wanyama wenu.’ " 18 Elisha kaghendelela kulonga apfino, "Chinu achino chibewe ghendo kwa IMNDEWA ukuchitenda, yeye pfipfila katsowaghogha Wamoabu na kuweka mna ghamoko ghenu. 19 Namwe mtsotowa chila isi itsungulusighwe ubanda na chila chumji ghunoghile, na chila mmbiki ghunoghile mghugane, na tsimbwibwi tsose tsa ghamatsi mtsidiwe, na mhinye chila mghunda ghunoghile kwa kughumemesa ghamabwe."

20 Nemitondo haipfikile, hawang'ali wobama ukulapfa nambiko, lola, ghamatsi ghang'ali ghokina kulawa ubali wa Edomu! Na isi yose imema ghamatsi. 21 Lelo Wamoabu hawahulike ka wafalume awo wadatu watsa ukuwatowa, iwanu wose iwadahile kukinda tsisilaha kulawa iwasongolo mbaka iwabala wakemighwa, wema kuna imbaka. 22 Na hawalamke nemitondo tondo, wona litsuwa lyopulika mna ghamatsi. Wamoabu waghona ghamatsi agho madung'u ka damu, 23 nawo walonga, "Aino damu, wafalume awano wetowa wawo kwa wawo ghendo. Lelo tukeni tukawaboke ipfinu pfawo!"

24 Lekeni hawapfikile hana indalo ya Waisiraeli, iwanu wa Isiraeli wenuka wawatowa Wamoabu, nawo watsuma. Iwanu wa Isiraeli wawawinzilitsa mbaka Moabu aku wowakoma. 25 Wabomola imiji yawo, na chila munu kasa libwe mna chila mghunda ghunoghile mbaka ghumema ghamabwe. Wadiwa tsimbwibwi tsose na wagana chila mbiki ghunoghile. Lekeni waghuleka ghumji ghwa Kiri Haleseti ghuliyeka ghuna ubanda wa ghamabwe, lekeni pfipfila iwanu waghutsingila na waghutowa na ng'umbewe. 26 Mfalume wa Moabu hayonile kotowighwa, kasola wanu wake miya saba iwadahile ukwitowa na ghamapanga, tsawabama wabite mna misululo ya masikali wa Isiraeli, watsumile kwa mfalume wa Edomu, lekeni ngawadahile baye ukutsuma. 27 Kamsola imwanaghe chaudele, iyabamile yawe mfalume hanu hake, kamlapfa yawe nambiko ya ukulakatsighwa mchanya mwa ubanda wa ghumji. Na imaya ng'ulu iwaghwila Waisiraeli, apfo woya mna isi yawo.