1 Mna ghumwaka ghwa kumi na saba ghwa ukutawala Peka, mwanaghe Remalia, Ahazi mwanaghe Yotamu mfalume wa Yuda kanza ukutawala. 2 Ahazi tsakana miyaka ishilini hayawile mfalume, katawala Yerusalemu kwa miyaka kumi na sita. Ng'atendile ghanoghile baye hambele ha IMNDEWA, Imulungu wake, ka sekulu wake Daudi pfayatendile. 3 Katenda ghaghala ghawatendile wafalume wa Isiraeli, mbaka kamlampfa imwanaghe yawe nambiko ya ukulakatsighwa. Katenda pfinu pfa ukudesa pfawatendile iwanu wa tsiisi tsingi, awala iwawingighwe na IMNDEWA hambele ha iwanu wa Isiraeli. 4 Kalapfa nambiko na kadusula upfumba hanu henulighwe, na mna ipfidunda, na mna ichimbeho cha chila mbiki.

5 Kuya Resini mfalume wa Aramu, na Peka mwana wa Remalia mfalume wa Isiraeli waghenda kughutowa ghumji ghwa Yerusalemu, wampfingilila Ahazi, lekeni ng'awadahile baye ukumtowa. 6 Mna ghamatsuwa agho mfalume Resini wa Aramu kaghuyitsa ghumji ghwa Elati kwa Aramu, na kawawinga iwanu wa Yuda. Kuya Waedomu wahamila Elati, na wokala kuko mbaka leloli. 7 Ahazi katuma wanu waghende kwa Tigilati Pileseri mfalme wa Ashuru wakamlongele, "Nene na mtumighwa wako na namwanagho ghendo, ugheluke utse unikombole kulawa mna ghamoko gha mfalume wa Aramu na mfalume wa Isiraeli iwonitowa." 8 Ahazi kasola fetsa na nzahabu ikalile mna ing'anda ya IMNDEWA, na ikalile mna chiheleto cha ing'anda ya mfalume, kamghalila mfalume wa Ashuru, ka nzawadi. 9 Mfalume wa Ashuru kamtogholela chayalombile Ahazi, apfo kaghutowa ghumji ghwa Dameski na kaghuboka, kamkoma Resini, na kawaghala kuna ghumji ghwa Kiri iwanu iyawaghoghile.

10 Mfalume Ahazi kaghenda Dameski kwitingana na mfalume Tigilati Pileseri, ako kona matsabahu, na kamtumila mtambika Uria ghumcholo ghwa imatsabahu ayo, na chila chinu pfachili. 11 Apfo mtambika Uria kaitsenga imatsabahu ayo kwa ukwigha ghumcholo iyaghutumile mfalume Ahazi kulawa Damasko, na kaimalitsa ng'ana mfalume Ahazi yoye ukaye. 12 Mfalume Ahazi hayoyile kulawa Damasko, kaisoghelela imatsabahu ayo, na kalapfa nambiko mchanya mwake. 13 Kalapfa nambiko tsa ukulakatsa iwanyama, kalapfa nambiko tsa ipfijo, nambiko tsa ukunwa, na kamitsa idamu ya nambiko yake ya ukukala tseghamba mchanya mwa imatsabahu. 14 Mfalume kailapfa imatsabahu ya shaba ya ghumwande kulawa hambele ha ing'anda ya IMNDEWA, kaika kasikazini mwa imatsabahu ya sambi. 15 Kuya kamlaghitsa mfalume Uria kalonga, "Kulawa sambi na ukughendelela, nemitondo na nemihe ulapfe nambiko ya ukulakatsighwa, na nambiko ya ipfijo, na nambiko ya ukunwa mna imatsabahu aino ya sambi. Kuya mchanya mwa imatsabahu ayo umitse idamu ya iwanyama wose iwalakatsighwe walapfighwe nambiko. Lekeni imatsabahu aila ya shaba nitsoitumila nene kwa ukumlomba Imulungu ka choni chanibamighwa ukutenda." 16 Naye mtambika Uria katenda ka mfalume Ahazi pfayamlaghitse.

17 Mfalume Ahazi katsisoghetsa tsimbao itsimile hana imembe, na kaghalapfa ghamasiniya mna ipfinu ipfikindilise. Kuya kailapfa ibahari kulawa kuna wang'ombe wa shaba iwakindilise na kalika mchanya mwa msingi ghwa ghamabwe. 18 Kwa kumnogheletsa mfalume wa Ashulu, Ahazi kachilapfa ichiswili cha inzila yawang'ali wakwang'ila iwanu kughenda kuna ing'anda ya IMNDEWA mna litsuwa lya sabato, pfipfila kaidiwa inzila ya hakwingilila mfalume wa Yuda kuna ing'anda 19 Ghangi ghayatendile Ahazi mna ukutawala kwake na chila chinu chingi chayatendile, ghose ghandikighwa mna ichitabu cha ukuwakumbuka iwafalume wa Yuda. 20 Ahazi kafa na katsikighwa kuna ghumji ghwa Daudi, kwawatsikighwe iwahenga wake. Kuya Hezekia kawa mfalume hanu hake.