1 Mna ghumwaka ghwa kumi na mbili ghwa utawala wa mfalme Ahazi wa isi ya Yuda, Hoshea mwanaghe Ela kanza kuitawala Israeli kwa miaka tisa, naye katawala aku kokala Samaria 2 Tsakatenda nzambi hambele ha IMNDEWA, lekeni si ka wafalume wa Isiraeli iwamlongolele baye. 3 Mfalume Shalimanesa wa Ashuru kaghenda kumtowa mfalume Hoshea, na Hoshea kawa mtumighwa wake na kamliha kodi chila mwaka. 4 Shalimanesa mfalume wa Ashuru katanga ka Hoshea tsakabama ukumbiduka, kwaapfila tsakatuma wanu waghenda kwa mfalume So wa Misiri, naye tsakaleka ukuliha ikodi kwa mfalume wa Ashuru ka pfayang'ali yotendagha chila mwaka. Apfo Shalimanesa kamghogha kamwoha mna ligeletsa.

5 Mfalume wa Ashuru tsakaitowa isi yose, kapfika kuna ghumji ghwa Samaria na maasikali wake waghupfingila kwa miyaka midatu. 6 Mna ghumwaka ghwa tisa ghwa mfalume Hoshea, mfalume wa Ashuru kaghuboka ghumji ghwa Samaria, apfo iwanu wa Isiraeli waghalighwa Ashuru, kaweka wakale mna imiji ya Hala, na Gozani habehi na ghumto Habori, na wakala mna imiji ya Wamedi. 7 Aghano ghalawila kwaapfila Waisiraeli tsawamtendela inzambi IMNDEWA, Imulungu wawo, iyawalapfile Misiri, na iyawakombole kulawa mna ghamoko gha Farao, mfalume wa Misiri, waitambikila milungu ingi. 8 Watenda ghaghala ghawatendile iwanu wa isi tsingi, awala IMNDEWA iyawawahingile hambele hawo, na watenda ipfihendo pfihile pfawaghalile wafalume wa Isiraeli 9 Waisiraeli watenda chinyelenyele aghala ighehile hambele ha IMNDEWA, Imulungu wawo, watsenga chila hanu henulighwe ha ukutambikila imilungu yawo chila hanu mna imiji yawo, kwanzila kuna ghumnala ghwa wabetetsi mbaka kuna imji ina ubanda. 10 Wemitsa ghamabwe na tsingutso tsa Ashera mna chila chidando na hasi ha chila mbiki. 11 Wadusula upfumba chila hanu henulighwe, ka iwanu wa is tsingi pfawatendile, iwanu awala IMNDEWA, iyawawingile hambele hawo. Wamtenda IMNDEWA yaghudubuke kwa ighehile ghawo ghawatendile. 12 Waitambikila milungu ingi, IMNDEWA iyawaghomile, hayawalongele, "Mleke ukutenda apfo."

13 IMNDEWA kawakanya Waisiraeli na Wayuda kubitila manabii na walaghutsi wake wose, kalonga, "Mleke ukutenda ghehile. Mkinde malamtsi na imiko yangu, ka ghamalaghitso aghala ghaniweng'ile wahenga wenu pfaghobama, aghala ghaniwatumile manabii wawalongele." 14 Lekeni ng'awabamile ukutegheletsa baye, wawo wawa wasughu ka iwahenga wawo, iwalemile ukumtoghola IMNDEWA, iyali Imulungu wawo. 15 Walema kukinda ghamalaghitso ghake na lilaghano lyayekile na iwahenga wawo, na apfila pfayawakanyile, waitambikila imilungu ingi ilihela chinu, nawo wenyegho woneka si chinu baye. Wawegha iwanu wa isi tsingi iwawatsunguluke, hata ka IMNDEWA tsakawalaghitsa apfino, "Mleke ukutenda ka pfawotenda wawo," nawo watenda ghaghala IMNDEWA ghayawaghomile waleke ukutenda. 16 Waghaleka ghose ghayawalaghitse IMNDEWA, Imulungu wawo, na wafina pfinyagho pfili pfa iwana wa ng'ombe, wemitsa tsingutso tsa mulungu pinga Ashera, wamtambikila mulungu Baali na watambikila ipfunu pfose pfa kulanga. 17 Wawabititsa iwana wawo wamale na iwapinga mna ghumoto walakale, na waghenda kwa watowa lamli, na kwa wahawi, welapfa iwenyegho mna ukutenda ghehile, na wamtenda IMNDEWA yaghudubuke. 18 Apfo IMNDEWA kawaghudubukila Waisiraeli, na kawawinga ghendo yaleke kuwona. Kalileka likabila lya Yuda liliyeka mna isi. 19 Nawo iwanu wa Yuda ng'awakindile baye ghamalaghitso gha IMNDEWA Imulungu wawo, watenda pfihendo pfihile ipfighalighwe na Waisiraeli. 20 Apfo INMDEWA kawalema iwanu wa Isiraeli na iwanu wa Yuda, kawadununza na kawaleka waghoghighwe na iwanu iwawatowile, na kuya kawawinga hambele hake. 21 INMDEWA hayawabaghule Waisiraeli wakale kutali na iwanu wa ing'anda ya Daudi, wamsaghula Yeroboamu mwanaghe Nabati yawe mfalume wawo. Yeroboamu kawaswangitsa Waisiraeli wamleke IMNDEWA, na kawatenda watende nzambi ng'ulu. 22 Waisiraeli tsawatenda nzambi tsitsila tsayatendile Yeroboamu, nawo ng'awatsilekile baye, 23 mbaka IMNDEWA hayawawingile hambele hake, ka apfila pfayawakanyile kubitila manabii wake. Apfo iwanu wa Isiraeli wasolighwa kulawa mna isi yawo wenyegho waghenda Ashuru, na wakala kuko mbaka leloli aino.

24 Kuya mfalume wa Ashuru kasola wanu kulawa Babuloni, Kuta, Ava, Hamati na Sefarivaimu, kaweka wakale mna imiji ya Samaria, isi ya Waisiraeli iwaghalighwe kuna isi ya utumwa. Waisola imiji ayo na wakala mumo. 25 Hawanzile ukukala amwo, ng'awampfukile IMNDEWA baye, apfo IMNDEWA kawatumila simba nawo wawakoma wamwenga wawo. 26 Kuya iwanu wamlongela mfalume wa Ashuru apfino, "Iwanu yuwasolile na kuweka mna imiji ya Samaria ng'awamanyile baye chinu chachi chayobama Imulungu wa isi ayo. Imulungu ayo kawatumila simba mna wawo, nawo wawakoma." 27 Kuya mfalume wa Ashuru kalaghitsa apfino, "Umuyitse mtambika yumwe mna awala watuwaghoghile, yaghende yakawafunde iwanu aghala ghayobama Imulungu wa isi ayo. 28 Apfo mtambika yumwe iyaghoghighwe kulawa Samaria kaghenda kukala Beteli, na kuko kawafunda iwanu ukumpfuka IMNDEWA."

29 Lekeni chila wanu iwaghalighwe Samaria wafina milungu yawo iwenyegho mna imiji yawakalile, na wayika mna chila hanu henulighwe hatsengighwe na iwanu wa Samaria. 30 Iwanu kulawa Babeli wafina chinyagho cha Sukoti Benoti imulungu wawo, iwanu kulawa Kuta wafina chinyagho cha Nerigali mulungu wawo, na wanu kulawa Hamati wafina chinyagho cha Ashima mulungu wawo. 31 Waavi wamwika Nibihazi na Taritaki wawe milungu wawo, Wasefarivi wawalakatsa iwana wawo mmoto wawe nambiko kwa milungu yawo Adrameleki na Anameleki. 32 Pfipfila iwanu awano tsawamtambikila IMNDEWA, wawasaghula iwanu wowose awala kulawa mna wawo na wawatenda watambika, nawo wawalapfila tsinambiko mna chila hanu henulighwe haukutambikila. 33 Wamtambikila IMNDEWA, lekeni pfipfila waitambikila imilungu yawo iwatsile nayo kulawa kuna tsiisi tsawo.

34 Mbaka leloli aino woghendelela ukutenda ghaghala ghawatendile ghumwande, ng'awompfuka baye IMNDEWA wala ng'awokinda baye ghamalahgitso, na imiko, na ghamalamtsi aghala IMNDEWA ghayaweng'ile iwana wa Yakobu, iyamkemile Isiraeli. 35 IMNDEWA hayekile lilaghano na Waisiraeli tsakawalaghitsa apfino, "Mleke kuitambikila milungu ingi, mleke kuinamila, mleke kuisang'anila na mleke kuilapfila nambiko. 36 Mnitambikile nene IMNDEWA yaniwalapfile ako Misiri kwa ngupfu tsangu, na kwa ghumoko ghwangu ghuna ingupfu. 37 Matsuwa ghose mwalangitse ukughakinda ghamalaghitso ghangu, imiko yangu, na malamutsi ghangu ghanimwandikileni nene. Mleke kuitambikila milungu ingi. 38 Mleke kwisemwa lilaghano lyanyikile na mwemwe, mleke kuitambikila milungu ingi. 39 Lekeni mnipfuke nene IMNDEWA Imulungu wenu, nene yanitsowakombola mna ghamko gha maduwi tsenu." 40 Lekeni iwanu awano ng'awahulike baye, waghendelela kutenda ghaghala ghawanzile ukughatenda.

41 Iwanu awano wang'ali womtambikila IMNDEWA, na pfipfila wang'ali wotambikila pfinyagho pfawo. Mbaka leloli aino iwana wawo na watsukulu wawo woghendelela ukutenda apfo ka iwahenga wawo pfawatendile.