1 Ahabu tsakana wana sabini wamale mna isi ya Samaria. Apfo Yehu kandika baluwa kaituma Samaria kwa iwakulu wa ing'ondo wa Yezireeli, na kwa iwabala na kwa awala iwang'ali wolela iwana wa Ahabu. Na ibaluwa ayo yandikighwa apfino: 2 "Kwaapfila kuna mwemwe kuna iwana wa mfalume, na wafalasi, mituka ikweghighwa na falasi, tsisilaha na imiji itsungulusighwe ubanda, 3 nisaghulileni mwana yumwe iyodahaha ukutawala kulawa mna iwana wa mfalume mmwike yawe mfalume, hanu ha aba wake. Kuya mwitowe kwaajili ya ing'anda ya imkulu wenu mfalume."

4 Lekeni wawo wapfuka ng'ani walonga, "Ka mfalume Ahazia na mfalume Yoramu ng'awadahile baye kumtowa, lelo twetwe tutsodahatse?" 5 Lelo ayula iyololesa ing'anda ya mfalume, na iimkulu wa ghumji hamwe na iwanzehe na iwelesi, watuma munu kwa Yehu, walonga, "Twetwe twa watumwa wako, tutsotenda chochose chaulonga, ng'atutsomsaghula munu baye yawe mfalume, tenda chochose chaukona chinogha."

6 Kuya Yehu kawandikila baluwa ya keli, nayo ilonga, "Ka mwemwe mwawayangu, na mwonitegheletsa, ngalileni ghamatwi gha iwana wa mfalume, na mnighalile ilupfi isaa ka aino." Baho wana sabini wa mfalume Ahabu, tsawakala kwa iwakulu wa isi, iwang'ali wowalela. 7 Ibaluwa haiwapfikile, wawasola iwana sabini wa mfalume wawakoma wose. Na ghamatwi ghawo wagheka mna ipfiseghe, wamghalila Yehu ako Yezireeli.

8 Msenga yumwe kapfika kamlongela Yehu, "Ghamatwi gha iwana wa mfalume ma ghapfika." Baho kawalaghitsa kalonga, "Ghekeni hasi mabughulu meli hana lilango lya ghumji mbaka ilupfi nemitondo." 9 Kuya nemitondo hakuchele kalawa kunze, kema hambele ha iwanu wose kawalongela, "Mwemwe mwahela totso, nene yuyo yanimtendele ghehile mkulu wangu mbaka nimkoma. Lekeni nani iyawatowile iwanu wose awano? 10 Mmanye ghendo aghala ghose IMNDEWA ghayalongile kwa ikaye ya Ahabu ghatsolawila, lelo IMNDEWA kaghatenda aghala ghayalongile kubitila mtumighwa wake Eliya." 11 Apfo Yehu kawakoma iwanu wose wa kaye ya Ahabu iwakalile Yezireeli, iwakulu wake wa ing'ondo, sale tsake wa habehi na watambika wake, na ng'alekile munu wowose baye.

12 Baho Yehu koka na kaghenda Samaria, hayang'ali kamnzila, hayapfikile hanu hokemighwa, "Ndalo ya Wadimi." 13 Yehu ketingana na ndughu tsake Ahazia mfalume wa Yuda kawaghutsa, "Mwemwe mli tsina nani?" Nawo wamwidika, "Twetwe twa ndughu tsake Ahazia. Tuhulumka akuno kuwakanza iwana wa mfalume na iwana wa ipinga wa mfalume." 14 Kuya kawalongela, "Waghogheni pfipfo pfawali wagima." Apfo wawaghogha wanu alubaini na weli aku wawagima. Nawo wawakomela habehi na chisima cha Beti Ekedi, wala ng'amlekile munu wowose baye.

15 Hayalawile ako yoke, ketingana na Yehonadabu mwana wa Rekabu yang'ali yoghenda kumlamsa. Yehu kamlamsa kalonga, "Pfii ghumoyo ghwako na ghumoyo ghwangu ghwakwalangula chinu chimwe?" Naye Yehonadabu kamwidika "Ona." Yehu kamlongela "Ka kolengesa, ngaya ghumoko ghwako." Naye kamwing'a ghumoko. Kuya Yehu kamsola kamdinitsa mna ghumtuka ghwake ghwa ing'ondo. 16 Naye Yehu kamlongela, "Uniwinze, naghwe kutsolola pfanilapfa nimwenyegho kwa IMNDEWA." Apfo kamdinitsa mna ghumtuka ghwake woka wose. 17 Hayapfikile Samaria, Yehu kawakoma iwanu wose wa ikaye ya Ahabu iwasighale. Naye ng'amlekile hata munu yumwe ka IMNDEWA pfayamlongele Eliya.

18 Yehu kawakema hamwe iwanu, kawalongela, "Ahabu yeye tsakamsang'anila Baali chidogho, lekeni nene nitsomsang'anila ng'ani. 19 Lelo nikemele manabii wose wa Baali na watumighwa wake wose, na iwatambika wake wose, na chila yumwe yawe baho, kwaapfila nobama kulapfa nambiko ng'ulu, na imunu wowose iyoleka kupfika aho, ayo katsokomighwa." Agho tsaghatendeka ili Yehu yawakome watumighwa wa Baali. 20 Kuya Yehu kawalongela, "Wakemeni iwanu watse wamtambikile Baali" Nawo wawakema. 21 Naye Yehu katuma nume kwa iwanu wose iwokala mna isi ya Isiraeli. Nawo iwanu wose watsa wamema mna ing'anda ya Baali kulawa membe imwe mbaka membe ingi. 22 Naye Yehu kamlongela imunu ayula iyang'ali yobetetsa ghamagwanda, "Ulapfe ghamaghwanda ghose uweng'e iwanu awano iwomtambikila mulungu Baali." Naye kalapfa ghamaghwanda agho kaweng'a iwanu. 23 Kuya Yehu kengila mna ing'anda ya Baali akuno kelongotsa na Yehonadabu mwana wa Rekabu. Kuya kawalongela iwanu iwomtambikila Baali, "Mwalangitse mlole chila hanu, kuleke koneka munu wowose iyomtambikila IMNDEWA mna mwemwe, lekeni woneke awala iwomtambikila Baali yaliyeka." 24 Kuya wengila mng'anda wakatambike na wakalapfe nambiko tsa ukulakatsighwa, aku Yehu kaweka wanu semanini kunze kuya kawalaghitsa apfino, "Muwakome iwanu awano wose. Yumwe wenu yang'amleka munu wowose yatsume kulawa mna iwanu awano waniwekile mna ghamoko ghenu, ayo katsokomighwa hanu ha imunu ayo!"

25 Na hayamalitse ukulapfa nambiko tsa ukulakatsighwa, Yehu kawalongela iwabetetsi iwemile kunze na iwakulu wa ing'ondo, "Mwingile mng'anda mkawakome, mleke kumleka munu yatsume." Apfo wawakoma. Iwabetetsi na iwakulu wa ing'ondo wawalapfa kunze, kuya wengila mghati mwa ing'anda ya Baali. 26 Wapfilapfa kunze pfinyagho pfa ngutso ipfili mna ing'anda ya mulungu Baali, kuya wapfilakatsa. 27 Waighwisa ingutso ya Baali waibomola ing'anda yake, na waitenda cholo. Apfo pfipfo pfaili mbaka leloli aino.

28 Apfo pfipfo Yehu pfayahinyile ichihendo cha ukumtambikila mulungu Baali mna isi ya Isiraeli. 29 Lekeni Yehu ng'alekile baye ukutenda ghehile ghayatendile Yeroboamu mwana wa Nebati, yeye iyawahonzile Waisiraeli watende nzambi kwa kutambikila pfiinyagho pfa nzahabu pfa imwana wa ing'ombe pfayekile ako Beteli na Dani. 30 Baho IMNDEWA kamlongela Yehu, "Kwaapfila kutenda ghoya kwa ukusang'ana ghose aghala ighoninoghela nene, na pfauwatendele iwanu wa Ahabu aghala ghose ghanibamile kutenda, lelo iwanagho na mweleko ghwako ghwakane watsakuwa wafalume mna isi ya Isiraeli." 31 Lekeni Yehu ng'aghakindile baye ghamalaghitso ghe IMNDEWA wa Isiraeli kwa ghumoyo ghwake ghwose, ila yeye katenda aghala ghehile ghayatendile Yeroboamu, yeye iyawahonzile Waisiraeli watende nzambi.

32 Mna ghamatsuwa agho IMNDEWA kanza kuihungutsa isi ya Isiraeli, na mfalume Hazaeli wa Aramu kaihuma isi ya Isiraeli mna tsimbaka tsake tsose, 33 kulawa ubali wa mashaliki wa mto Yoridani, na isi yose ya Gileadi, Gadi, Rubeni na Manase. Na Kulawa Aroeli habehi na Lwanda lwa Arinoni, mna tsiisi tsa Gileadi na Bashani.

34 Chila chinu na aghala ghose ghayatendile Yehu, ghandikighwa mna ichitabu cha ukukumbuka wafalume wa Isiraeli. 35 Apfo Yehu kafa na katsikighwa Samaria. Na Yehohazi imwanaghe kawa mfalume hanu hake. 36 Naye Yehu tsakatawala Isiraeli aku kokala mna ghumji Samaria kwa miyaka ishilini na minane.