1 Manase tsakana miyaka kumi na mili hayanzile ukutawala, kawa mfalume aku kokala Yerusalemu kwa miyaka hamsini na tano. Mai wake tsakakemighwa Hefisiba. 2 Manase katenda ghehile hambele ha IMNDEWA, katenda pfinu pfa ukudesa pfawatendile iwanu wa isi tsingi, awala IMNDEWA iyawawingile hambele ha Waisiraeli. 3 Kahatsenga keli hanu henulighwe ha ukutambikila milungu ingi ihamwaghighwe na Hezekia, aba wake, katsenga imatsabahu ya ukumtambikila mulungu Baali, na kafina ichinyagho cha Ashera, ka pfayatendile Ahabu mfalume wa Isiraeli. Manase pfipfila katsinamila tsinondo tsose tsa kulanga. 4 Katsenga matsabahu tsa ukutambikila milungu ingi mna ing'anda ya IMNDEWA, ing'anda iyailongile IMNDEWA, ka mna ghumji ghwa Yerusalemu baho hawatsonitambikila. 5 Mna ipfikuta pfose pfibili pfa ing'anda ya IMNDEWA, katsenga tsimatsabahu tsa ukutambikila pfinu pfose pfili kulanga. 6 Kamlakatsa imwanaghe mmoto ka nambiko ya ukulatsighwa, tsa kamhawi, yang'ali yotowa lamli, yang'ali yolonga na mitsimu, na tsakatenda ghehile ketseketse hambele ha IMNDEWA. 7 Kasola ichinyagho cha Ashera chayafinile kachimisa mna ing'anda, ing'anda IMNDEWA iyawalongele Daudi na imwanaghe Selemani apfino, "Mna ing'anda aino na mna Yerusalemu, nisaghula kulawa mna ghamakabila ghose gha Isiraeli wanitambikile matsuwa ghose ing'aghotsigha. 8 Sitsowaleka keli baye Waisiraeli wange wange kulawa mna isi yaniweng'ile sekulu tsawo." 9 Lekeni iwanu awano ng'awahulike baye, Manase kawalongotsa mna ukutenda agho ghehile kubita iwanu wa isi tsingi, awala IMNDEWA iyawakomile hambele ha Isiraeli. 10 IMNDEWA tsakalonga kubitila manabii wake, kalonga, 11 "Kwaapfila Manase mfalume wa Yuda katenda pfinu apfino pfa ukudesa, katenda ghehile kubita Waamori iwalongole ukukala mna isi aino, na kawahonza Wayuda pfipfila watende nzambi kubitila ipfinyagho pfake. 12 Apfo IMNDEWA, Imulungu wa Isiraeli kolonga apfino, Nitsowaghalila ghehile iwanu wa Yerusalemu na Yuda, chila munu iyatsohulika ng'atsotoghola baye ichilawile. 13 Nitsoghutowa ghumji ghwa Yerusalemu ka pfaniitowile Samaria, na pfanimtowile mfalume Ahabu, na iwatsukulu wake. Nitsoibaghusa Yerusalemu ka imunu pfayobaghusa isahani, na kuighubikitsa. 14 Nitsowalema hata awala iwanu wangu iwalekighwe wagima, nitsowaleka waghoghighwe na maaduwi tsawo wose, nawo watsowaboka ipfinu pfawo na isi yawo. 15 Kwa apfila watenda ghehile hambele hangu, na wanenda nighudubuke, kulawa iwahenga wawo hawalawile Misiri mbaka leloli aino."

16 Manase kawakoma hela iwanu wengi, na idamu yawo tsaimema kulawa hana imembe imwe ya ghumji ghwa Yerusalemu mbaka hana imembe ingi. Pfipfila tsakatenda nzambi nyingi, hamwe na inzambi yake ya ukuwalongotsa Wayuda wamtendele ghehile IMNDEWA. 17 Ghangi gha Manase, na chila chinu chayatendile, na hata inzambi yake iyaitendile, ghose ghandikighwa mna ichitabu cha ukuwakumbuka wafalume wa Yuda. 18 Manase kahupa na katsikighwa hana ibostani ya ing'anda ya chifalume, ibostani ya Uza. Naye Amoni imwanghe kawa mfalume, hanu hake.

19 Amoni tsakana miyaka ishilini na mili hayawile mfalume, na katawala Yerusalemu kwa miyaka mili. Wenye wake tsakakemighwa Meshulemeti, neghe Haruzi kulawa ghumji ghwa Yotiba. 20 Katenda ghehile hambele ha IMNDEWA, ka manase aba wake pfayatendile. 21 Kawinza tsinzila tsa aba wake, kapfitambikila pfinyagho pfayapfitambikile aba wake, na kapfinamila. 22 Kamlema IMNDEWA, Imulungu wa iwahenga wake, ng'aghakindile baye ghamalaghitso gha IMNDEWA. 23 Lekeni iwatumighwa wake wamtendela tsengwe na wamkomela mna ing'anda yake ya chifalume. 24 Kuya iwanu wali muisi ya Yuda wawakoma iwanu wose iwatendile tsengwe na kumkoma mfalume Amoni, nawo wamwika Yosia imwanaghe yawe mfalume hanu hake. 25 Ghangi gha Amoni, na chila chinu chayatendile, ghose ghandikighwa mna ichitabu cha ukuwakumbuka wafalume wa Yuda. 26 Katsikighwa mna likabuli mna ibostani ya Uza. Kuya Yosia imwanaghe kawa mfalume hanu hake.