1 Mna ghumwaka ghwa saba ahala Yehu hayang'ali yotawala, Yoashi kanza ukutawala, naye katawala Yerusalemu kwa miyaka alubaini. Na taghwa lya mai wake tsakakemighwa Sibia iyalawile mna ghumji ghwa Beeri Sheba. 2 Yoashi kamtendela ighanoghile IMNDEWA matsuwa ghake ghose ka apfila imtambika Yehoyada pfayamfundile. 3 Lekeni hanu henulighwe ha ukutambikila ng'ahahinyile baye, apfo iwanu waghendelela ukutambika na kulapfa tsinambiko hanu henulighwe.

4 Yoashi kawalongela iwatambika apfino, "Tsendi tsose itsighalighwa mng'anda mwa IMNDEWA, tsilawile mna ipfinu ipfelile, na tsisendi atsila tsose itsilaghitsighwe imunu yalapfe, na sendi tsose tsayolapfa imunu kwa ukubama mwenyegho itsighalighwa mng'anda mwa IMNDEWA, 5 walekeni iwatambika watsibokele kulawa kwa iwanu iwakwika sendi, na watsengele chila hanu hakoneka hahinyika mna ing'anda ya Imulungu."

6 Lekeni mna ghumwaka ghwa ishilini na tatu ghwa ukutawa mfalume Yoashi, iwatambika ng'awatsengile hanu hohose baye honeke habomoka mna ing'anda ya IMNDEWA. 7 Apfo mfalume Yoashi kamkema mtambika Yehoyada na watambika wayaghe kawalongela, "Heule ng'amtsengile baye hanu hakoneka habomoka mna ng'anda ya IMNDEWA? Lelo mleke kubokela keli tsisendi kulawa kwa iwanu iwakwika sendi. lekeni kulawa sambi tsisendi tsose tsobamighwa tsitsenge hanu aho habomoke." 8 Apfo iwatambika watoghola waleke kubokela sendi keli kulawa kwa iwanu, na pfipfila welaghana waleke kutsenga hanu habomoke mna ing'anda ya Imulungu.

9 Kuya Yehoyada kasola chisanduku, katobola ichighubiko chake, keka habehi na imatsabahu, ubali wa kujilo ahala imunu hayakwingila mna ing'anda ya IMNDEWA. Iwatambika iwakalitse lilango watsika tsisendi tsose mna ichisanduku itsighalighwe kuna ing'anda ya IMNDEWA. 10 Chila hawonile mna lisanduku mna sendi nyingi, imwandishi wa ing'anda ya mfalume na mtambika mkulu wang'ali wotsilapfa na wotsipeta tsisendi atso itsighalighwe mna ing'anda ya IMNDEWA, wotsoha na watsika mna imikoba. 11 Hawomalitsa kutsipeta tsisendi atso, waweng'a iwanu iwasaghulighwe wemilile tsing'onde mna ing'anda ya IMNDEWA. Nawo wawaliha iwanu iwang'ali wosang'ana mna ing'anda ya IMNDEWA. Iwanu awo wawo awano, iwanu iwang'ali wotsenga na awala iwang'ali wosongola imibiki, 12 na awala iwatsengile na ghamabwe, na wasongola mabwe. Pfipfila waghulila tsimbao na ghamabwe ighasongolighwe, ili watsengele hanu habomoke mna ing'anda ya IMNDEWA na waghala chila chinu ichibamighwa mna ukuitsenga ing'anda. 13 Lekeni tsisendi itsighaligwe mna ing'anda ya IMNDEWA ng'atsitumike baye mna ukutengenetsa ghamasiniya, ghamabilika, imikasi ya ukuganila utambi wa pfitasa, ghamabakuli, tsimalati wala kwa pfinu pfopfose pfa nzahabu na fetsa pfa ing'anda ya IMNDEWA. 14 Tsose tsiwaliha iwanu wose iwang'ali wosang'ana mna ukuitsenga keli ing'anda ya IMNDEWA. 15 Iwanu iwemilile ing'onde aino tsa wanu wa wakutogholeka ng'ani, apfo ng'awabamighwe baye walonge apfila pfawatsitumile tsisendi. 16 Tsisendi itsilapfighwe tsiwe tsa nambiko ya matotso na nambiko tsa ukuleghusa nzambi ng'atsingile baye mna ing'anda ya IMNDEWA. Atso tsatsikala sendi tsa watambika.

17 Matsuwa agho Hazaeli mfalume wa Aramu kagheluka kaghenda kughutowa ghumji ghwa Gati na kaghuboka. Kuya Hazaeli kahunduka kaghenda yakaghutowe ghumji ghwa Yerusalemu. 18 Baho mfalume Yoashi kasola nambiko tsose tsayalapfile yeye, na tsawalapfile iwahenga wake wafalume Yehoshafati, Yehoramu, na mfalume Ahazia itsilapfighwe tsiwe tsa IMNDEWA, hamwe na nzahabu yose ili mna ing'anda ya IMNDEWA na mna ing'anda ya mfalume, katsighala kwa Hazaeli mfalume wa Aramu, kuya Hazaeli kalawa Yerusalemu.

19 Ghangi ghayatendile mfalume Yoashi mna ukutawala kwake, na chila chinu chayatendile, ghose ghandikighwa mna ichitabu cha ukukumbuka cha wafalume wa Yuda.

20 Iwakulu wake wa ing'ondo wamtendela tsengwe, nawo wamkoma ako Beti Milo kuna inzila ihulumka kughenda Sila. 21 Iwamkomile tsa Yozabadi mwana wa Shimeati na Yehozabadi mwana wa Shomeri, iwakalile watumighwa wake. Naye Yoashi katsikighwa mna ghumji ghwa Daudi. Naye Amazia imwanaghe kawa mfalume hanu hake.