1 Naamani, mkulu wa iwanu wa maasikali wa mfalume wa Aramu, yeye tsa munu mkulu na mfalume wake tsakamkunda ng'ani, kwaapfila kubitila yeye IMNDEWA kayapfila isi ya Aramu ihume. Yeye tsakadaha ukwitowa pfinoghile, lekeni tsakana ukoma. 2 Tsuwa limwe Waaramu walawa waghenda ukwitowa, kuko wamsola imwali yumwe mdoghodogho kulawa Isiraeli, naye yang'ali yomsang'anila tsing'onde mwehe wa Naamani. 3 Hambele imwali ayo kamlongela pinga wa Naamani, "Ka mkulu wangu yang'aghendile kwa nabii iyokala Samaria, yang'amhonetse ukoma wake." 4 Naamani hayahulike imbuli aino, kaghenda kwa mfalume wake kamlongela achila chayalongile ichigholi ayo kulawa Isiraeli. 5 Mfalume wa Aramu kamlongela, "Nitsakwandika ibaluwa umghalile mfalume wa Isiraeli." Apfo Naamani kaghenda aku kaghala pfihande elufu selasini pfa fetsa, pfihande elufu sita pfa nzahabu, na maghwanda kumi ighanoghile. 6 Ibaluwa ayo kaighala kwa mfalume wa Isiraeli, nayo tsailonga apfino, "Ibaluwa aino haikupfikila, umanye ghendo ka nimtuma mtumighwa wangu Naamani, naghwe umuhonetse ukoma wake."

7 Mfalume wa Isiraeli hayaisomile ibaluwa ayo, baho kadegha tsinguwo tsake kalonga, "Pfihi nene na Imulungu iyodaha kughala ilifwa na ugima? Heule miyangu ayuno komtuma munu yatse kuna nene nimuhonetse ukoma wake? Lelo mlole imunu ayuno pfayobama ukwisonga na nene.!"

8 Elisha imunu wa Imulungu hayahulike apfo, ka mfalume wa Isiraeli kadegha tsinguwo tsake, katuma munu kwa mfalume, kamghutsa, "Hebali udeghile tsinguwo tsako? Mleke yatse kuna nene, ili yamanye ka kuna nabii mna isi ya Isiraeli!"

9 Apfo Naamani kaghenda na falasi wake na mituka yake ikweghighwa na falasi, kema hana ghumlango ghwa ing'anda ya Elisha.

10 Elisha kamtuma munu kaghenda kumlongela Naamani, "Ghenda ukoghe mala saba mna ghumto Yoridani, na ilukuli lwako lutsakuya, naghwe kutsakwela ghendo."

11 Lekeni Naamani koka akuno kaghudubuka, kalonga, "Nene tsanighamba yeye yang'alawile kunze na yeme na yamlombe iyali IMNDEWA, Imulungu wake, yabititse ghumoko ghwake hanu hanighula na kunihonetsa ukoma wangu! 12 Angu Abana na Faripairi, imito ya Dameski, ng'ainoghile baye kubita matsi ghose gha Isiraeli? Pfihi sidaha baye ukwogha amwo nihone, na ilukuli lwangu lwele?" Apfo kahunduka, koka akuno kaghudubuka. 13 Iwatumighwa wa Naamani wamghendela na wamlongela, "Ghwe mkulu wetu ka nabii yang'akulongele utende chinu chikomu, pfihi ung'alekile kutenda? Lekeni yeye chayakulongele mbona chidodo ghendo, ‘Ghenda ukoghe wele!’ " 14 Apfo Naamani kaghenda kuna ghumto Yoridani, kepfabika mmatsi mala saba, ka Elisha imunu wa Imulungu pfayamlaghitse, naye kela ghendo, na kadegheta ka mwana yoneke sambi. 15 Kuya Naamani na iwanu wake wose woya kwa imunu wa Imulungu. Naye Naamani kema habehi naye kamlongela, "Lelo sambi nomanya ghendo ka kuduhu Imulungu muisi yose ila mna isi ya Isiraeli. Lelo bokela chayanikughalile mtumighwa wako."

16 Lekeni Elisha kamlongela, "Nene nelaha kwa IMNDEWA iyali mgima, ayula yanimsang'anila, sitsobokela chinu baye." Naamani kamnanahitsa yabokele, lekeni yeye kalemesa ghendo. 17 Naamani kalonga, "Ka ng'ubokela baye, undeke nene mtumighwa wako, ning'ighwe lidongo lighalighwe na pfihongwe weli, kwaapfila kulawa leloli nene mtumighwa wako sitsolapfa baye nambiko tsa ukulakatsighwa, wala kumtambikila mulungu yungi ila kwa IMNDEWA iyali mgima yaliyeka. 18 Lekeni IMNDEWA yambonele libatsi ahala hanighenda na mfalume wangu mna ing'anda ya Rimoni mulungu wa Aramu, nikename na kumtambikila ayo Imulungu Rimoni. Nomlomba ghendo IMNDEWA yambonele libatsi!"

19 Elisha kamlongela, "Ghenda tseghamba." Naye Naamani koka. Lekeni Naamani hayang'ali ng'ana yapfike kutali baye, 20 Gehazi, mtumighwa wa Elisha imunu wa Imulungu, kelongela imwenyegho, "Mkulu wangu, kamlekekelela pfipfino ghendo Naamani, Muaramu ayuno yoke bila kubokela chinu. Nene nelaha kwa IMNDEWA iyali mgima, nene notsuma nomuwinza ghendo yangaye chinu chochose." 21 Apfo Gehazi kamuwinza. Naamani. Naye Naamani hayamwonile kotsuma komuwinza, kahulumka mna ghumtuka ghwake kaghenda kwitingana naye, kamghutsa, "Pfihi chila chinu cha ghoya?" 22 Gehazi kamwidika, "Chila chinu chinogha, lekeni mkulu wangu kanituma nikolongele ka wamtsila wanu weli kulawa mna isi ya ipfidunda pfa Efuraimu, kuna likingili lya wamanabii. Apfo kokulomba uweng'e pfihande elufu ndatu pfa fetsa na maghwanda meli ighanoghile."

23 Naamani kamlongela, "Nokulomba sola pfihande elufu sita pfa fetsa." Kamnanahitsa Gehazi yatsibokele, na katsoha sendi atso mna mikoba mili, na ghamabwende. Kaweng'a weli mna iwatumighwa, nawo waiduta waghenda hamwe na Gehazi. 24 Gehanzi hayapfikile kuchidunda kwayang'ali yokala Elisha, kasola imikoba ayo mili, kaingitsa mng'anda, kuya kawaleka iwatumighwa awo woke. 25 Kuya kengila mng'anda kema hambele ha Elisha, mkulu wake. Elisha kamghutsa, "Tsauli kwani?" Gehazi kamwidika, "Nene mtumighwa wako sighendile kokose baye."

26 Lekeni Elisha kamlongela, "Pfihi iloho yangu ng'aighendile na ghweghwe baye ahala imunu hayahulumke kulawa mna ghumtuka ghwake na kwitingana naghwe? Angu sambi matsuwa gha ukubokela tsisendi na magwanda, na mighunda ya mitseituni na mitsabibu na wang'olo na wang'ombe na watumighwa wamale na wapinga? 27 Lelo ukoma wa Naamani utsokutsila ghweghwe na lukolo lwako matsuwa ghose." Apfo Gehazi koka akuno kana ukoma, na kawa mtselu chwee.