1 Yosia tsakana miyaka minane hayanzile ukutawala ako Yerusalemu, tsakatawala kwa miaka salasini na ghumwe. Wenye wake tsakakemighwa Yedida, neghe Adaya, iyokala mna ghumji ghwa Boskati. 2 Katenda ighanoghile hambele ha IMNDEWA, na kalangitsa ghoya ukukinda ghamalaghitso gha Imulungu ka pfayatendile mfalume Daudi, ng'ahunduke aku wala akula baye.

3 Mna ghumwaka ghwa kumi na nane mfamlume Yosia kamtuma mwandishi wake iyakemighwe Shafani, mwanaghe Azalia, mtsukulu wa Meshulamu yaghende kuna ing'anda ya IMNDEWA. Kamlongela, 4 Gheluka ughende kwa Hilikia, mtambika mkulu umlongele yapete ifetsa ighalighwe mna ing'anda ya IMNDEWA, tsawabokele iwakalitsi wa imilango kulawa kwa iwanu. 5 Ifetsa ayo weng'ighwe iwanu iwakwimilila ing'onde ya ukiitsenga keli ing'anda ya IMNDEWA. Iwanu awano iwakwimilila wawalihe iwanu wose iwotsenga mna ing'anda ya IMNDEWA. 6 Wawalihe maselamala, iwotsenga, na iwanu wangi iwosang'ana, pfipfila waghulile mibiki na ghamabwe ighasongolighwe, watsengele ing'anda. 7 Iwanu wemilile ing'onde ayo ng'awaghutsighwe baye walonge apfila ifetsa ayo pfawaitumile, kwaapfila wawo tsawanu wa ukutogholeka ghendo.

8 Kuya mtambika mkulu Hilikia kamlongela Shafani imwandishi wake ka kachona ichitabu cha ghamalaghitso mna ing'anda ya IMNDEWA. Kuya Hilikia kamwing'a Shafani ichitabu, naye kachisoma. 9 Kuya Shafani imwandishi kamghendela mfalume, kamlongela, "Watumighwa wako wailapfa ifetsa iyoneke mna ing'anda ya IMNDEWA, na weng'ighwa iwanu wemilile ing'onde ya ukuitsenga keli ing'anda ya keli." 10 Kuya Shafani imwandishi kamlongela mfalume apfino, Hilikia imtambika kangaya ichitabu, naye Shafani kamsomela mfalume. 11 Mfalume hayahulike achila ichandikighwe mna ichitabu cha ghamalaghitso, kadegha ghamagwanda ghake. 12 Kamlaghitsa mtambika Hilkia, na Ahikamu mwanaghe Shafani, na Akbori mwanaghe Mikaya hamwe na imwandishi Shafani na Asaya mtumighwa wa mfalume, kalonga, 13 Mghende mkangutsile nene kwa IMNDEWA na mkawaghutsile iwanu wa Yuda aghala ighandikighwe mna ichitabu achino ichoneke. IMNDEWA katughudubukila kwaapfila iwahenga wetu ng'awategheletse baye ghamalonga gha ichitabu achino, na ng'awatendile baye aghala ighandikighwe twetwe tutende.

14 Apfo mtambika Hilikia, na Ahikamu, na Akibori, na Shafani na Asaya, wose waghenda kwa pinga yumwe nabii taghwa lyake Hulida, ipinga wake Shalumu, iyang'ali yotunza ghamajoho gha mfalume, na ayo Shalumu tsamwana wa Tikiva, na mtsukulu wa Harihasi. Hulida tsakakala Yerusalemu, nawo walonga naye. 15 Ipinga ayo kawalongela, achino chicho chayolonga IMNDEWA, Imulungu wa Isiraeli, mlongeleni apfino imunu iyawatumile kuna nene, 16 IMNDEWA kolonga apfino, "Nitsoghala ghehile hanu ahano na mna iwanu wake, ka chila chinu ichandikighwe mna ichitabu acho chayasomile mfalume wa Yuda pfachilonga. 17 Kwaapfila wandeka nene, na wadusula upfumba kuna imilungu ingi na wanitenda nene nighudubuke kwa ipfinyagho pfawatendile kwa ghamoko ghawo, imaya yangu itsakwaka hanu ahano, na kuduhu wa kuitsima. 18 Mlongeleni mfalume wa Yuda iyawatumile mwemwe mtse kuna nene, apfino pfipfo pfayolonga IMNDEWA, Imulungu wa Isiraeli mna aghala ghayahulike. 19 Kwaapfila ghumoyo ghwako ghukutama na kwihulumsa hasi hambele hangu nene IMNDEWA, ahala hauhulike apfila pfanihalongile hanu ahano na iwanu wake, ka wang'alighitighwe na kulekighwa uchuwa. Kwa ukudegha ghamagwanda ghako na ukulila kwaulilile, nene nikuhulika, nene IMNDEWA yanilonga apfo. 20 Sitsoghala baye ighehile agho hanu ahano mbaka ghweghwe hautsakufa na kutsikighwa. Tsinenge tsako ng'atsitsakona baye ighehile ghanitsoghala hanu ahano."

Apfo woya kwa mfalume Yosia, wamlongela tsimbuli atso.