1 Mna ghumwaka ghwa kabili ghwa ukutawala Yehoashi mwana wa Yehoahazi mfalume wa Isiraeli, Amazia mwana wa Yoashi mfalume wa Yuda kanza ukutawala. 2 Amazia tsakana miyaka ishilini na mitano hayawile mfalume, na katawala Yerusalemu kwa miyaka ishilini na tisa. Mai wake tsakakemighwa Yehoadani, iyolawa Yerusalemu. 3 Yeye katenda ighanoghile hambele ha IMNDEWA, lekeni ng'awile ka sekulu wake Daudi baye. Katenda ghaghala ghayatendile aba wake Yoashi. 4 Yeye ng'abomole baye hanu henulighwe ha ukutambikila, iwanu waghendelela ukutambika na ukudusula upfumba mchanya mwa chila hanu aho.

5 Ufalume wa Amazia hawimile ghoya, kawakoma iwatumighwa wake iwamkomile mfalume Yoashi, aba wake. 6 Lekeni ng'awawakomile baye iwana wa awala iwamkomile aba wake, ka pfayandikighwe mna ichitabu cha malaghitso cha Musa ahala IMNDEWA hayalaghitse apfino, "Aba au mai ng'atsokomighwa baye kwa inzambi iyatendile imwanaghe na imwana ng'atsokomighwa baye kwa inzambi iyatengile aba wake au mai wake, chila munu katsokomighwa kwa inzambi iyatendile imwenyegho."

7 Amazia tsakawakoma maasikali elufu kumi wa Edomu mna Ulwanda lwa Munyu, na kaghuboka ghumji ghwa Sela, naye kaghukema Yokiteeli, nagho ghokemighwa pfipfo mbaka leloli aino.

8 Kuya Amazia katuma wanu waghende kwa Yehoashi mwana wa Yehoahazi, iyali mtsukulu wa Yehu, mfalume wa Isiraeli, kalonga, "Utse twitowe." 9 Lekeni Yehoashi mfalume wa Israeli kamwidika Amazia mfalme wa Yuda, kalonga, "Mbighili itsilo Lebanoni tsituma nume kuna ghumbiki ghwa mkataluba ighuli kuko Lebanoni, kulonga, ‘Umleke imwanagho pinga yakwelighwe na imwanangu.’ Kuya kabita imnyama wa kubagho kaghubajugha mbaluti aghula. 10 Ona ghweghwe kuwatowa ghendo Waedomu, na sambi kotamba. Ghweghwe wighode kwa ukuwatowa, na ukale ukaye yako, lekeni heule wibamila ghamaghayo ighatsokukoma ghweghwe ghumwenyegho hamwe na iwanu wako wa Yuda?"

11 Lekeni Amazia ng'ategheletse baye, apfo Yehoashi mfalume wa Isiraeli kalawa kaghenda ukwitowa na mfalume Amazia ako Beti Shemesi mna isi ya Yuda.

12 Maasikali wa Isiraeli wawatowa iwanu wa Yuda, na chila munu katsumila ukaye yake. 13 Yehoashi mfalume wa Isiraeli kamghogha Amazia mfalume wa Yuda, imwana wa Yoashi, na mtsukulu wa Ahazia ako Beti Shemesi. Kuya Yoashi kaghenda Yerusalemu kuko kaumwagha ubanda wa Yerusalemu kanzila lilango lya Efuraimu mbaka lilango likalile hana imembe, utali wake tsa futi miya sita.

14 Kasola inzahabu yose na ifetsa yose na chila chinu ichoneke mna ing'anda ya IMNDEWA, na mna ing'anda ya chifalume. Kuya kasola iwanu iyawaghoghile, koya Samaria. 15 Ghangi ghayetendile Yehoashi mna ukutawala kwake na chila chinu chingi chayatendile, na ghamatendo ghake ghana ingupfi mna ukwitowa na mfalume Amazia wa Yuda, ghose ghandikighwa mna ichitabu cha ukuwakumbuka wafalume wa Isiraeli. 16 Yehoashi kafa na katsikighwa ako Samaria kwawatsikighwe iwafalume, na Yeroboamu imwanaghe kawa mfalume, hanu hake.

17 Amazia imwana wa Yoashi, mfalume wa Yuda tsakakala miyaka kumi na mitano tangiya hayafile Yehoashi mfalume wa Isiraeli. 18 Ghangi ghayatendile Amazia mna ukutawala kwake, ghose ghandikighwa mna ichitabu cha ukuwakumbuka wafalume wa Yuda. 19 Iwanu wa Yerusalemu watenda tsengwe lya ukumkoma Amazia, apfo katsumila Lakishi, lekeni iwanu awo watuma wanu wamuwinzilitsa ako Lakishi na wamkomela kuko. 20 Ilukuli lwake waludinitsa mna ifalasi, woya nalo Yerusalemu kuna ghumji ghwa Daudi, wamtsika kwawatsikighwe sekulu tsake. 21 Kuya iwanu wose wa Yuda wamsola Uzia, iyakalile na miyaka kumi na sita, wamwika yawe mfalume hanu ha Amazia aba wake. 22 Uzia yuyo iyaghutsengile keli ghumji ghwa Elati, na kughuyitsa ghutawalighwe keli na Yuda ahala Amazia hayafile.

23 Mna ghumwaka ghwa kumi na tano ghwa ukutawala Amazia mwana wa Yoashi mfalme wa Yuda, Yeroboamu mwanaghe Yehoashi mfalume wa Israeli kanza kutawala ako Samaria, naye katawala kwa miyaka alubaini na ghumwe. 24 Katenda nzambi hambele ha IMNDEWA, naye ng'atsilekile baye tsinzambi tsose tsayatendile Yeroboamu mwana wa Nebati, iyawahonzile Waisiraeli nawo watende nzambi. 25 Yeye kaikombola na kayuyitsa isi yose ikalile ya Waisiraeli kulawa Lebo Hanati mbaka kuna ibahali ya Araba. Ka apfila IMNDEWA, Imulungu wa Isiraeli pfayalongile kubitilila mtumighwa wake Yona mwana wa Amitai, inabii kulawa Gati Heferi.

26 Kwaapfila IMNDEWA tsakona Waisiraeli pfawaghanzike kwa usungu, yawe munu mtumwa au si mtumwa baye, kwaapfila tsahaduhu munu wowose wa ukuwapfila. 27 Lekeni IMNDEWA ng'alongile baye ka katsoitenda Isiraeli yose ihupe ghendo muisi, kawakombola kubitila mfalume Yeroboamu mwana wa Yehoashi.

28 Ghangi ghayatendile Amazia mna ukutawala kwake, na chila chinu chingi chayatendile, apfila pfayetowile kung'ondo, na apfila pfayaikombole imiji ya Dameski na Hamati iwe ya Waisiraeli keli, imiji ikalile ya Wayuda aho ghumwande, ghose ghandikighwa mna ichitabu cha ukuwakumbuka wafalume wa Isiraeli. 29 Yehoashi kafa na katsikighwa ako Samaria kwawatsikighwe wafalume, naye Zekaria imwanaghe kawa mfalume, hanu hake.