1 Mfalume Yosia kawakema hamwe iwanzehe wose wa Yuda na Yerusalemu. 2 Naye mfalume kaghenda kuna ing'anda ya IMNDEWA aku kelongotsa na iwamale wose wa Yuda na wa Yerusalemu, iwatambika na manabii, na iwanu wose wadodo kwa wabala. Kawasomela aghala ghose ighandikighwe mna ichitabu cha lilaghano, ichoneke mna ing'anda ya IMNDEWA. 3 Mfalume kema hana ingutso, keka laghano hambele ha IMNDEWA, ka katsomuwinza IMNDEWA, kwa ukughakinda ghamalaghitso ghake, imiko yake na ghamalamtsi ghake, kwa ghumoyo ghwake ghose, na iloho yake yose, na katsotenda aghala ighandikighwe mna ichitabu acho cha lilaghano. Na iwanu wose welaghana ukutenda apfo. 4 Mfalume Yosia kamlaghitsa Hilikia mtambika mkulu, na iwatambika iwomwapfila, na wakalitsi wa imilango wapfilapfe kulawa kuna ing'anda ya IMNDEWA ipfinu pfose ipfitengenetsighwe kwa ukumtambikila Baali, na Ashela, na ukutambikila pfinu pfa ukulanga. Mfalume kapfilakatsa kunze mwa Yerusalemu kuna ulwanda lwa Kidironi, na lipfu lyake kalighala ako Beteli. 5 Kawawinga iwatambika wose iwasaghulighwe na wafalume wa Yuda wadusule upfumba mna chila hanu henulighwe mna imiji ya Yuda na mna Yerusalemu yose, na iwatambika awala iwamdusulile Baali, na litsuwa, na ghumwetsi, tsinondo, na ipfinu pfose pfa kulanga. 6 Mfalume Yosia kachilapfa ichinyagho cha Ashela kulawa mna ing'anda ya IMNDEWA, kachighala kuna ulwanda lwa Kidironi kunze mwa Yerusalemu, na kuko kachilakatsa. Kachidugha dugha chinyagho ichilakatsighwe chiwa ka timbwisi, na litimbwisi lyake kalyasa mchanya mna ghamakabuli gha iwanu. 7 Kuya Yosia kapfimwagha ipfiheleto pfa iwamale pfiweghe ipfikalile mna ing'anda ya IMNDEWA, hanu iwamapinga hawang'ali wodadatsa ghamapanzia gha Ashela. 8 Kawalapfa iwatambika wose kulawa mna imiji ya Yuda kawaghala Yerusalemu, na kahatenda chila hanu henulighwe hehe, kwanzila Geba mbaka Beeri Sheba, akula iwatambika kwawadusulile upfumba. Kaimwagha imatsabahu itsengighwe hana lilango lya ghumji, hana nzila ikwingilila ubali wa kumoso wa lilango lya Yoshuwa, mkulu wa ghumji. 9 Watambika awo ng'awalekighwe baye watambike kuna imatsabahu ikalile ako Yerusalemu, lekeni tsawaja ipfighate ipfilihela ihamila ipfighalighwe na ndughu tsawo. 10 Kuya mfalume kahatenda hanu hakemighwe Tofethi hehe, mna ulwanda lwa iwana wa Hinomu, ili imunu wowose yaleke kumlapfa iwanaghe mmale au pinga kwa kumbititsa mna ghumoto yawe nambiko kwa mulungu Moleki. 11 Kawalapfa wafalasi awala iwakalile hana inzila ya ukwingilila kuna ing'anda ya IMNDEWA, awala iwafalume wa Yuda iwawalapfile wawe wa mulungu tsuwa. Tsawakala habehi na ing'anda ya mkulu yumwe iyakemighwe Nathani Meleki. Apfo Yosia kailakatsa imituka yose ilapfighwe iwe ya mulungu tsuwa. 12 Katsimwagha tsimatsabahu tsawatsengile wafalume wa Yuda kuna ichiheleto chitsengighwe mchanya mwa ing'anda ya Ahazi, hamwe na tsimatsabahu tsayatsengile Manase hana ipfikuta pfili pfa ing'anda ya IMNDEWA. Katsimwagha na katsihonda honda na kalyasa litimbwisi lyake mna ichikolongo cha Kidironi. 13 Pfipfila mfalume kahatenda hehe chila hanu henulighwe ha ukutambikila hakalile mashaliki mwa Yerusalemu na kusini mwa Chidunda cha Ukuhinyika, hanu hatsengighwe na Selemani, mfalume wa Yuda hawe hanu ha ukumtambikila Ashitoreti, mulungu pinga wa ukudesa wa Wasidoni, na Kemoshi, mulungu wa ukudesa wa Moabu, na Milikomu, mulungu wa ukudesa wa Waamoni. 14 Mfalume Yosia katsitula tsingutso tsa ghamabwe, na katsigana gana tsingutso tsa Ashela, na hanu hatsimile tsingutso atso kalundika mipate ya iwanu kuhatenda hehe. 15 Pfipfila mfalume kaihinya imatsabahu itsengighwe na mfalume Yeroboamu mwanaghe Nebati ako Beteli, iyawahonzile Waisiraeli watende nzambi. Yosia kaimwagha hasi, kaghatula ghamabwe ghake, na kaghahonda ghawa timbwisi, pfipfila kapfilakatsa ipfinyagho pfa Ashela. 16 Kuya Yosia kahunduka, baho kona ghamakabuli kuna ichidunda, kalaghitsa iwanu wakafukule imipate, kuya wailakatse hana imatsabahu na kuitenda ihe. Apfo imatsabahu ayo tsaiha ka longa lya IMNDEWA lyayalongile imunu wa Imulungu, iyaghalongile aghano kulawa ghumwande ka ghatsolawila. 17 Kuya mfalume kawaghutsa, "Likabuli alila litsengelighwe lyanikona lya nani?" Na iwanu wa ghumji aghwo wamwidika, "Likabuli alyo lya imunu wa Imulungu iyatsile kulawa Yuda iyalongile aghano ghautendile hana imatsabahu ya Beteli." 18 Mfalume kalonga, "Mlileke, imunu yaleke kufukula imipate yake." Apfo iwanu waileka imipate yake hamwe na imipate ya nabii iyatsile kulawa Samaria. 19 Ka apfila pfayatendile akula Beteli, Yosia pfipfila katsihinya tsimatsabahu tsawatsengile wafalume wa Isiraeli kuna imiji ya Samaria, itsimtendile IMNDEWA yaghudubuke. 20 Yosia kawakoma iwatambika mchanya mwa tsimatsabahu tsa chila hanu henulighwe, na kailakatsa mipate yawo mchanya mwa tsimatsabahu atso.

21 Mfalume Yosia kawalaghitsa apfino iwanu wose, kalonga, "Mtendeleni ipasaka IMNDEWA, Imulungu wenu, ka pfayandikighwe mna ichitabu cha lilaghano, ichoneke." 22 Kuduhu Pasaka ingi ka aino ideng'elelighwe kulawa mna ghamatsuwa ghose gha Walamtsi iwailongotse Isiraeli, wala mna ghamatsuwa ghose gha wafalume wa Yuda na wafalume wa Isiraeli. 23 Apfo mna ghumwaka ghwa kumi na nane ghwa ufalume wa Yosia, iwanu waideng'elela ipasaka kwa IMNDEWA ako Yerusalemu.

24 Kuya Yosia kawawinga watowa lamli na iwahawi, kuya kapfilapfa pfinyagho pfa imilungu ingi, pfinyagho na chila chinu cha ukudesa ichoneke mna Yuda na Yerusalemu. Katenda apfo ili yanze ukughatenda ghamalaghitso ighali mna ichitabu chayonile mtambika Hilkia mna ing'anda ya IMNDEWA. 25 Tsakuduhu mfalume ka Yosia mna wafalume wose iwamlongolele ghumwande, na iwatsile hambele hake, iyamtumikile IMNDEWA kwa ghumoyo ghwake ghose, kwa ngupfu tsake tsose, na kwa iloho yake yose, ka apfila ghamalaghitso ghose gha Musa pfagholonga. 26 Lekeni IMNDEWA ng'alekile baye kuwaghudubukila iwanu wa Yuda, kwa aghala ighehile ghayatendile mfalume Manase ighamtendile yaghudubuke.

27 Apfo IMNDEWA kalonga, "Nitsowawinga iwanu wa Yuda walawe hambele hangu ka apfila pfaniwawingile iwanu wa Isiraeli, na nitsoghulema ghumji ghwa Yerusalemu, ghumji ghwanisaghule, na ing'anda aino, yanilongile, ‘Taghwa lyangu litsokala mumo.’ "

28 Ghangi ghayatendile Yosia mna ukatawala kwake, na chila chinu chayatendile, ghose ghandikighwa mna ichitabu cha ukuwakumbuka wafalume wa Yuda. 29 Yosia hayang'ali kamfalume, Farao Neko mfalume wa Misiri kagheluka kuna ghumto Eufrati kumwapfila mfalume wa Ashuru. Mfalume Yosia kaghenda kwitowa naye, lekeni Neko kamtowa na kamkomela ako Megido. 30 Iwatumighwa wa Yosia waludinitsa ilukuli lwake mna ghumtuka ako Megido, na woya nalwo Yerusalemu, na kuko wamtsika kuna likabuli lyake imwenyegho. Kuya iwanu wa Yuda wamsola Yehoahazi imwanaghe Yosia, wambakatsa ghamapfuta wamwika yawe mfalume hanu ha aba wake.

31 Yehoahazi tsakana miyaka ishilini na midatu hayawile mfalume, katawala Yerusalemu kwa miyaka midatu. Wenye wake tsakakemighwa Hamutali, neghe Yeremia iyolawa kuna ghumji ghwa Libina. 32 Yehoahazi katenda ighehile hambele ha IMNDEWA ka sekulu tsake pfawatendile. 33 Mfalume Neko kamwoha mna iminyololo ako Ribla mna isi ya Hamati, ili yaleke ukutawala ako Yerusalemu, na Neko kailaghitsa isi ya Yuda walihe kodi, wamwing'eghe fetsa kilo elufu ndatu na miya nne, na nzahabu kilo salasini na nne. 34 Mfalume Neko kamwika Eliakimu, mwanaghe Yosia yawe mfalume hanu ha aba wake, na kamwing'a taghwa lingi, kamkema Yehoyakimu. Lekeni kamsola Yehoahazi, kamghala Misili na kafila kuko.

35 Mfalume Yehoyakimu kamwing'a Falao ifetsa na inzahabu iyabamile. Tsakatenda apfo kwa ukuwalaghitsa iwanu walihe fetsa na nzahabu, na chila munu kalapfa kwa kuwinza achila chayalaghitsighwe na mfalume. 36 Yehoyakimu tsakana miyaka ishilini na mitano hayawile mfalume, katawala kwa miyaka kumi na ghumwe ako Yerusalemu, mai wake tsakakemighwa Zebida, neghe Pedaya iyolawa Ruma. 37 Naye tsakatenda ighehile hambele ha IMNDEWA ka sekulu tsake pfawatendile.