1 Mna ghumwaka ghwa ishilini na tatu ghwa ufalume wa Yoashi wa Yuda, Yehoahazi mwanaghe Yehu kanza kuwa mfalume wa Isiraeli mna isi ya Samaria, naye katawala kwa miyaka kumi na saba. 2 Katenda nzambi hambele ha IMNDEWA, ka apfila pfayatendile Yeroboamu mwana wa Nebati, iyawahonzile Waisiraeli nawo watende nzambi, naye Yehoahazi ng'atsilekile baye. 3 Apfo IMNDEWA kawaghudubukila Waisiraeli, kawaleka watowighwe towighwe na mfalume Hazaeli wa Aramu na mfalume Beni Hadadi imwanaghe. 4 Baho Yehoahazi kamdedetsa IMNDEWA yawonele libatsi Waisiraeli, naye IMNDEWA kamtegheletsa kwaapfila tsakona apfila mfalume wa Aramu pfayawadununze. 5 IMNDEWA kaweng'a Waisiraeli munu wa ukuwakombola, kawakombola kulawa mna utawala wa Aramu. Nawo Waisiraeli wakala tulu ka pfawakalile aho ghumwande. 6 Lekeni ng'awalekile baye ukutenda tsinzambi atsila tsa Yeroboamu, iyawahonzile Waisiraeli watsitende. Nawo waghendelela na nzambi tsawo, na waghendelela kwimitsa chinyagho cha mulungu wa Ashera ako Samaria.

7 Yehoahazi maasikali wake tsawamala ghendo, iyakalile nawo tsa wadina falasi hamsini, na mituka kumi ya ng'ondo, na masikali wa ghamaghulu elufu kumi, kwaapfila mfalume wa Aramu tsakawadugha dugha na woneka ka timbwisi ahala hawobeta. 8 Ghangi ghayetendile Yehoazi mna ukutawala kwake na chila chinu chingi chayetendile, ghose ghandikighwa mna ichitabu cha Ukukumbuka cha Wafalume wa Isiraeli. 9 Yehoahazi kafa na katsikighwa ako Samaria, na Yehoashi imwanghe kawa mfalume wa Isiraeli hanu hake.

10 Mna ghumwaka ghwa selasini na saba ghwa ukutawala Yoashi mfalume wa Yuda, Yehoashi mwanaghe Yehoahazi kawa mfalume wa Isiraeli aku kokala Samaria. Naye kawa mfalume kwa miyaka kumi na sita. 11 Pfipfila Yehoashi katenda nzambi hambele ha IMNDEWA, katenda nzambi tsitsila tsayatendile Yeroboamu mwana wa Nebati, iyawahonzile Waisiraeli nawo watende nzambi, naye ng'atsilekile baye. 12 Ghangi ghayatendile Yehoashi mna ukutawala kwake na chila chinu chingi chayatendile, na apfila pfayetowile na Amazia, ghose ghandikighwa mna ichitabu cha Ukukumbuka Iiwafalume wa Isiraeli. 13 Yehoashi kafa na katsikighwa ako Samaria kwawatsikighwe iwafalume, imwanghe iyakemighwe Yeroboamu kawa mfalume, hanu hake.

14 Nabii Elisha tsakaghula utamu wihile sideke, hambele tsaumkoma. Yehoashi mfalume wa Isiraeli tsakaghenda kumlola, na kuko kamlilila kalonga, "Wenye ghwe aba wangu! Wenye ghwe aba wangu! Mkulu wa ing'ondo wa Isiraeli!"

15 Elisha kamlaghitsa kalonga, "Nighalile iminde na imishale!" Naye mfalume katenda pfipfo. 16 Elisha kamlongela mfalume wa Isiraeli, "Ukinde ghoya iminde yako kwa ukwasa ghumshale. Naye mfalume keka ghoya, kuya Elisha keka ghamoko ghake mchanya mwa ghamoko gha mfalume." 17 Elisha kalonga, "Pfughula lidilisha lya mashaliki," Naye mfalume kalipfughula. Kuya Elisha kalonga, "Wase ghumshale!" Naye kasa ghumshale. Elisha kalonga, "Aghuno mshale ghwa ukuhuma ghwa IMNDEWA, mshale ghwa ukuitowa isi ya Aramu! Kutsowakoma ghendo Waaramu iwali Afeki." 18 Kuya Elisha kalonga, "Sola imishale," Naye mfalume kasola. Elisha kamlongela, "Utowe hasi." Mfalume katowa hasi mala ndatu, kuya kaleka. 19 Imunu wa Imulunngu tsakamwonela maya, kalonga, "Ung'atowile mala tano au mala sita, kuya ung'aitowile Aramu na kuimalitsa ghendo, lekeni lelo kutsoitowa mala ndatu."

20 Elisha kafa na katsikighwa. Chila mwaka Wamoabu wang'ali wakwingila waitowe isi ya Waisiraeli. 21 Haghabitile matsuwa chidogho, Waisiraeli wang'ali womtsika miyao, wona kingili lya iwanu wakutsa kuwatowa, baho walwasa ilukuli lwa imunu ayo mna likabuli lya Elisha. Ilukuli alwo haludonzile imipate ya Elisha, imunu ayula katsilihuka, na kema kwa ghamaghulu ghake mwenyegho.

22 Hazaeli mfalume wa Aramu tsakawadununza Waisiraeli mna ghamatsuwa ghose gha ufalume wa Yehoahazi. 23 Lekeni IMNDEWA kawalangusa uluso wake, na kawonela libatsi, na kawalangusa wende wake kwa laghano lyayekile na Abrahamu, Isaka na Yakobu. Ng'awakomile baye wala ng'awalekile baye. 24 Hazaeli mfalume wa Aramu hayafile, Ben hadadi imwanaghe kawa mfalume hanu hake. 25 Mfalume Yehoashi kamtowa Beni Hadadi mala ndatu na kaikombola imiji yose ibokighwe mna ghamatsuwa gha Yehoahazi, aba wake.