1 Mna ghamatsuwa agho Hezekia yang'ali yoghula sideke chidogho ghendo yafe. Nabii Isaya mwanaghe Amozi kamghendela kamlongela, "Apfi pfipfo pfayolonga IMNDEWA, ‘Wike ghoya chila chinu chili mna ing'anda yako, kwapfila kutsakufa, ng'utsohona baye.’ " 2 Baho Hezekia kahundukila kuna ubanda, na kamlomba IMNDEWA kalonga, 3 Ghwe IMNDEWA, ukumbuke apfila pfanikutendele kwa ukutogholighwa na kwa ghumoyo ghwangu ghwose, tsanitenda aghala ighanoghile hambele hako. Hezekia kalila kwa usungu mkulu. 4 Isaya koka hana mfalume, lekeni ng'ana yapfose baye hana ichibwalu cha haghati, longa lya IMNDEWA limtsila, lilonga, 5 uye ukamlongele Hezekia, chilongotsi wa iwanu wangu, "Nene IMNDEWA, Imulungu wa sekulu wako Daudi, nihulika chaunilombile na nighona ghamasotsi ghako, apfo nitsokuhonetsa, na haipfika ikacha kutsoghenda kuna ing'anda ya IMNDEWA. 6 Nitsokongetsela miyaka kumi na mitano ya ukukala mgima. Nitsokukombola ghweghwe na ghumji aghuno kulawa kuna ghamoko gha mfalume wa Ashuru. Nitsoghukinga ghumji aghuno na kughukombola, kwa ajili yangu nene, na kwa ajili ya lilaghano lyanyikile na mtumighwa wangu Daudi."

7 Kuya Isaya kalonga, "Soleni ng'ambi ya tini mnibandike." Nawo watenda pfipfo walibandika hana lipute, baho kahona. 8 Hezekia kamghutsa Isaya, "Chitango chachi chayatsonilangusa IMNDEWA ka nene nitsohona, na ikacha nitsogheluka kuna ing'anda ya IMNDEWA?" 9 Isaya kamwidika, "Achi chicho ichitango kulawa kwa IMNDEWA, yeye IMNDEWA katsotenda achila chayalongile. Pfii lisisila lilongole hambele maghulu kumi, au lyuye kuchughu maghulu kumi?" 10 Hezekia kamwidika, "Chinu chibewe ghendo kwa lisisila kulongola hambele maghulu kumi, leka lyuye kuchughu maghulu kumi." 11 Kuya nabii Isaya kamkemelela IMNDEWA, naye IMNDEWA katenda lisisila lyuye kuchughu maghulu kumi hana ingatsi itsengighwe na Ahazi.

12 Matsuwa ghagho, mfalume Merodaki Baladani mwanaghe Baladani mfalme wa Babeli kahulika ka Hezekia yang'ali yoghula na sambi kahona, kawatuma iwanu wamghalile baluwa na nzawadi. 13 Hezekiya kawabokela iwatumighwa awo, kawalangusa chila chinu ichili mna tsing'anda tsake tsine ipfinu, fetsa, na nzahabu, pfilungo pfa ukwika mna ipfijo, ghamafuta ighanoghile, ing'anda yakwikila tsisilaha tsake. Chila chinu ichili mna ing'anda yake ya chifalume na mna ufalume wake wose Hezekia kawalangusa. 14 Kuya nabii Isaya kaghenda kwa mfalume Hezekia kamghutsa, "Iwanu awo wolongatse na walawile kwani?" Hezekia kamwidika, "Walawa isi ya kutali ya Babeli." 15 Isaya kamghutsa, "Wonile choni mna ing'anda yako?" Hezekia kamwidika, "Niwalangusa chila chinu chanilinacho mna ing'anda yangu ya chifalume. Kuduhu chinu ghendo mna tsihatsina tsangu chandekile ukuwalangusa." 16 Kuya Isaya kamlongela Hezekia, "Tegheletsa chayolonga, IMNDEWA, 17 lola, ghamatsuwa ghatsakutsa ahala chila chinu ichili mna ing'anda yako ya chifalume na chila chinu chawekile sekulu tsako mbaka leloli aino, pfitsosolighwa na kughalighwa Babeli, kuduhu chinu chitsolekighwa. 18 Watsukulu wako wamwenga watsoghoghighwa na kughalighwa kutali, nawo watsoseyulighwa na watsosang'ana mna ing'anda ya mfalume wa Babeli." 19 Hezekiya kamwidika Isaya, "Longa lya IMNDEWA lyaulongile lyolongesa." Kalonga apfo kwa apfila tsakapfikitsa, "Ng'apfu iwe pfipfo, mana ng'akutsakuwa na ng'ondo baye mna ghamatsuwa ghangu ghanikala mgima."

20 Ghangi ghayatendile Hezekia mna ukutawala kwake na tsingupfu tsake tsose, apfila pfayatsengile litsimbu na kuhimba ghumfeleji ghughale ghamatsi kuna ghumji, ghose ghandikighwa mna ichitabu cha ukuwakumbuka wafalume wa Yuda. 21 Hezekia kahupa naye Manase imwanaghe kawa mfalume hanu hake.