1 Yehoyakimu hayang'ali ka mfalume, mfalume Nebukadneza wa Babeli katsa kuitowa isi ya Yuda, na kamnanahitsa Yehoyakimu yamtumikile, naye kamtumikila kwa miyaka midatu, kuya hambele Yehoyakimu kaghalambuka kambiduka mfalume Nebukadneza. 2 Kuya IMNDEWA kawatuma wanu wa Babeli, Waaramu, Wamoabu na Waamoni waghende wakaitowe isi ya Yuda na kuihinya, ka apfila IMNDEWA pfayalongile kubitila iwatumighwa wake manabii. 3 Aghano ghalawila ghendo mna isi ya Yuda ka apfila IMNDEWA pfayalaghitse, tsakabama kuwawinga Wayuda walawe hambele hake, kwa tsinzambi atsila tsayatendile mfalume Manase, na ghose ghayatendile, 4 kwa ukowakoma hela iwanu, na kuimemetsa idamu ya wanu iwakomighwe hela mna Yerusalemu, naye IMNDEWA ng'atoghole baye kuilekelela inzambi yake. 5 Ghangi ghayatendile Yehoyakimu mna utawala wake, na chila chinu chayatendile, ghose ghandikighwa mna ichitabu ukuwakumbuka wafalume wa Yuda. 6 Yohoyakimu kahupa na imwanaghe Yehoyakini kawa mfalume hanu hake.

7 Mfalume wa Misiri na maasikali wake ng'awatsile keli baye kulawa mna isi yake, kwaapfila mfalume wa Babeli tsakasola isi yose iwile ya mfalume wa Misiri, kwanzila ichikolongo cha Misiri mbaka kuna ghumto ghwa Eufurate.

8 Yehoyakini tsakana miyaka kumi na minane hayawile mfalume, katawala Yerusalemu kwa miyetsi midatu. Wenye wake tsakakemighwa Nehushta neghe Elinatani iyolawa kuna ghumji ghwa Yerusalemu. 9 Yehoyakini katenda ghehile hambele ha IMNDEWA ka apfila aba wake pfayatendile. 10 Matsuwa agho maasikali wa mfalume Nebukadineza waghenda kughutowa ghumji ghwa Yerusalemu na waghutsingila. 11 Mfalume Nebukadineza imwenyegho tsakagheluka kuna ghumiji ahala maasikali wake hawang'ali woghutowa ghumji. 12 Mfalume Yehoyakini wa Yuda keghala imwenyegho kwa mfalume wa Babeli yakaghoghighwe, yeye imwenyegho na wenye wake, iwatumighwa wake, na iwakulu wa iwanu wake. Mfalume wa Babeli kamghogha na kamwoha kuna ligeletsa mna ghumwaka ghwa nane ghwa ufalume wake. 13 Kasola chila chinu ichikalile mna ing'anda ya IMNDEWA, na mna ing'ana ya chifalume, ka apfila IMNDEWA pfayalongile, na kasola chila chinu cha nzahabu chayatendile Selemani mfalume wa Isiraeli chiwe cha ing'anda ya IMNDEWA. 14 Kawasola iwanu wose wa Yerusalemu, koka nawo kuna isi ya utumwa, kasola wakulu wose, na awala iwadahile ukwitowa, mafundi wose, wosewose wapfika wanu elufu kumi. Lekeni kawaleka iwahingwa waliyeka muisi. 15 Mfalume Nebukadneza kamghogha Yehoyakini kamghala Babeli, hamwe na mame wake, na wehe tsake, na iwakulu wake, na pfilongotsi wose wa isi. 16 Mfalume wa Babeli pfipfila kawasola wanu elufu saba wa Yuda iwadahile ukwitowa, wose awo tsawana ngupfu ya ukwitowa, na mafundi iwanoghile, na walubula chuma elufu imwe. 17 Mfalume wa Babeli kamwika Matania, ndughu wa aba wake Yehoyakini, yawe mfalume hanu hake, na kamwing'a taghwa lingi, kamkema Sedekia.

18 Sedekia tsakana miyaka ishilini na ghumwe hayawile mfalume, katawala Yelusalemu kwa miyaka kumi na ghumwe. Wenye wake tsakakemighwa Hamutali, neghe Yeremia iyolawa kuna ghumji ghwa Libina. 19 Katenda ghehile hambele ha IMNDEWA ka apfila Yehoakini pfayatendile. 20 IMNDEWA kawaghudubukila iwanu wa Yerusalemu na Yuda, apfo kawawinga hambele hake.