1 Tsuwa limwe, kingili lya manabii wamlongela Elisha, "Hanu ahano hatukala twetwe hadohado ng'ani. 2 Utuleke tughende kuna ghumto Yoridani tukagane imibiki, twitsengele hanu hatsotwenela." Naye kawedika, "Ghendani!"

3 Kuya yumwe wawo kamlongela, "Twokulomba tughende naghwe." Elisha kamwidika, "Pfinogha." 4 Apfo Elisha kaghenda nawo. Na hawapfikile kuna ghumto Yoridani, wanza ukugana imibiki. 5 Munu yumwe hayang'ali yogana ghumbiki, ihoya yake isomoka mna ghumhini ghwake, ilaghalila mmatsi, baho kalila kalonga, "Wenye ghwee! Imane nitendatsa! Ihoya yenyegho tuyatsima!"

6 Imunu wa Imulungu kamghutsa, "Ilaghalile kwani?" Imunu ayo kamlangusa. Elisha naye kagana lubiki, kalwasa ahala hailaghalile, na baho ihoya yeluka mchanya mwa ghamatsi. 7 Elisha kamlongela imunu ayo, "Isole." Naye kagholosa ghumoko ghwake, kaisola.

8 Mfalume wa Aramu yang'ali yetowa na isi ya Isiraeli. Baho, kawalongela iwakulu wake wa ing'ondo, "Nitsakwika indalo yangu hanu ahano au ahala." 9 Imunu wa Imulungu katuma nume kwa mfalume wa Isiraeli, kamlongela, "Walangitse haubita hanu ahala, kwaapfila Waaramu wohulumkila baho." 10 Kuya mfalume wa Isiraeli katuma maasikali wakakaghule hanu ahala hayalongile. Elisha kamkanya mfalume ayo si mala lumwe baye wala mala mbili. 11 Ichinu achino chimdesa ghendo mfalume wa Aramu, naye kawakema iwakulu wake wa ing'ondo kawaghutsa, "Lelo nongeleni, nani mna twetwe iyali ubali wa mfalume wa Isiraeli?"

12 Mkulu wake yumwe kamlongela, "Kuduhu munu iyotubiduka, ghwe mfalume wangu, lekeni Elisha iyali ako Isiraeli. Yeye komlongela mfalume wa Isiraeli chochose achila chaulonga, hata ka kwamna ichiheleto chako cha ukuwasa."

13 Mfalume kawalongela, "Ghendani mkambame kwayali, na nene nitsowatuma mkamghoghe." Baho wamlongela ka Elisha ka ako Dotani. 14 Kuya katuma falasi na mituka ya ing'ondo, na wanu wengi iwadahile ukwitowa ghoya, wapfika nechilo waghutsingila ghumji aghwo. 15 Nemitondotondo imtumighwa wa imunu wa Imulungu kalamka kalawa kunze, baho kawona iwanu, wafalasi na imituka yawo waghupfingila ghumji. Baho kalonga, "Tughaya ghwe mkulu wangu! Lelo tutendetse?"

16 Elisha kamwidika, "Uleke ukupfuka, kwaapfila iwali hamwe na twetwe wa wengi kubita awala iwali hamwe na wawo."

17 Baho Elisha kalomba, "Ghwe IMNDEWA, umfumbule tsinenge tsake, yone." Baho IMNDEWA kamfumbula tsinenge tsake, na baho kona chidunda chimema wafalasi na mituka ya moto ya ing'ondo, imtsunguluka Elisha.

18 Iwanu wa Aramu hawahulumke waghende wakamtowe, Elisha kamlomba IMNDEWA, kalonga, "Nokulomba uwatende iwanu awano wawe pfipfita!" Apfo IMNDEWA kawetenda wawe pfipfita, ka Elisha pfayalombile.

19 Kuya Elisha kawalongela, "Mwemwe mwagha inzila, aghuno si ghumji ghwamghubama baye. Niwinzeni, na nene nitsowahilika kwa imunu ayula yamumbama." Naye kawalongotsa mbaka Samaria.

20 Nawo hawengile Samaria Elisha kalomba, "Ghwe IMNDEWA uwafumbule iwanu awano tsinenge tsawo wone." IMNDEWA kawafumbula tsinenge tsawo, nawo webona wamghati mwa ghumji ghwa Samaria.

21 Mfalume wa Isiraeli hayawonile Waaramu, kamghutsa Elisha, "Aba wangu, pfihi niwakome?" Ooh, pfihi niwakome?

22 Elisha kamwidika, "Baye, Uleke kuwakoma. Angu hauwaghogha iwanu kwa lipanga lyako na kwa iminde yako kowakoma? Uweng'e ichijo na matsi, waje na wanwe, kuya woye kwa imkulu wawo." 23 Apfo kawatendela chihungo chikulu. Na ahala hawamalitse ukuja na ukunwa, kawaleka woke, nawo woya kwa mkulu wawo. Kulawa baho wanu wa Aramu ng'awaghendile keli baye kuitowa isi ya Isiraeli.

24 Matsuwa chidogho hambele, Beni Hadadi mfalume wa Aramu, kawakema maasikali wake wose ukwitowa, waghenda kughupfingila ghumji ghwa Samaria. 25 Apfo lelo tsakuna nzala ng'ulu mna isi ya Samaria, na litwi lya chihongwe liutsighwa kwa pfihande semanini pfa fetsa, na glamu miya ya mipfi ya njiwa iutsighwa kwa pfihande pfitano pfa fetsa.

26 Mfalume wa Isiraeli hayang'ali yopfosa mna ubanda wa ighumji, kahulika pinga yumwe komlilila, "Nyapfile ghwe mkulu wangu mfalume!" 27 Mfalume kamwidika, "Ka IMNDEWA ng'okwapfila baye, nene nidahatse ukukwapfila? Pfihi nikwing'e ingano kulawa hana ichibwalu cha ukubetela au nikwing'e idipfai kulawa hanu hakukamulila?" 28 Kuya kamghutsa, "Ubama choni?" Naye kamwidika, "Ipinga ayuno kanongela, ‘Leloli umlapfe imwanagho tumje, kuya ilupfi nomlapfa imwanangu tumje.’ 29 Apfo tumwambika imwanangu tumja, na ilupfi haipfikile nimlongela yamlapfe imwanaghe tumje, lekeni yeye kampfisa imwanaghe!"

30 Mfalume hayahulike chayalongile ipinga ayo, kadegha tsinguwo tsake kwa usungu, na baho iwanu wona ka tsakapfala ghunila. 31 Naye kalonga, "Imulungu yandiye leloli, ka litwi lya Elisha mwana wa Shafati ng'alitsoganighwa leloli!" 32 Elisha tsakakala ukaye yake na iwanzehe tsawakala naye, na mfalume tsakatuma munu yalongole, lekeni hata ng'ana yapfike baye, Elisha kawalongela iwanzehe awo, "Mwakona imunu ayuno mkoma wanu katuma munu yatse yadumule litwi lyangu. Lelo imunu iyatumighwe hayopfika, muhinde ghumlango, mleke kumleka yengile mng'anda, kwaapfila mfalume imwenyegho kakuchughu kakutsa." 33 Elisha hayang'ali yolonga nawo, imunu iyatumighwe kapfika kalonga, "Maghayo aghano gholawa kwa IMNDEWA! Heule nene ng'endelele kumbeta keli?"