1 Sauli hayoile kulawa mna ukwitowa na Wafilisti, tsakalongelighwa ka Daudi kamna nyika ya Engedi. 2 Kuya Sauli kawasola maasikali wake elufu ndatu iwadahile ukwitowa ghoya kulawa mna isi yose ya Isiraeli, kaghenda kumbama Daudi na iwanu wake mna mabambalawe gha Dondolo. 3 Kapfika kuna imango ili habehi na libanda lya iwang'olo ilikalile mmbalimbali mwa inzila, Sauli kabaghuka kengila mna imango amwo yadehe. Daudi na iwanu wake nawo tsawakala mghati ghendo mwa imango ayo. 4 Iwanu wa Daudi wamlongela, "Litsuwa alila lyakulongele IMNDEWA ka katsakutsa imunu iyokuhila na nene nitsokughoghela na kukwing'a mna ghamoko ghako, naghwe umtendele ka pfaukona ghweghwe pfinogha lelo ipfika." Baho Daudi kamghendela Sauli chinyelenyele kulawa kuchughu, kadegha libeme lya lighwanda lyake. 5 Baho ghumoyo ghwa Daudi ghwanza kumtama kwaapfila kadegha chinyele libeme lya lighwanda lya Sauli. 6 Kawalongela iwanu wake, "IMNDEWA yangome ndeke kumtendela chinu ka achino mkulu wangu iyasaghulighwe na kubakighwa mapfuta na IMNDEWA. Ndeke kughugholosa ghumoko ghwangu ghumtowe imunu IMNDEWA iyambakile ghamapfuta." 7 Kwa ukulonga apfo, Daudi kawaghoma iwanu wake, waleke kumtowa Sauli. Kuya Sauli kalawa mmango koka tsake. 8 Hambele, naye Daudi kenuka, kalawa mmango kamkema Sauli, "Mkulu wangu, mfalume!" Mfalume Sauli hayahunduke kuchughu, Daudi kenamisa mbaka chihanga chake chidonza hasi, kamfughamila. 9 Kuya Daudi kamghutsa Sauli, "Heule uwategheletsa iwanu iwokulongela ka nene nobama nikukome? 10 Lelo lola, leloli kwona kwa nenge tsako mwenyegho, haung'ali mmango IMNDEWA tsakakwika mna ghamoko ghangu, iwanu wangi tsawanongela nikukome, lekeni nene nikwonela libatsi. Tsanonga ghendo ka sitsogholosa baye ghumoko ghwangu nimtowe mkulu wangu kwaapfila yeye kasaghulighwa na IMNDEWA kwa kubakighwa mapfuta. 11 Aba wangu, lola, libeme lya lighwanda lyako mna ghamoko ghangu, ka nidegha libeme lya lighwanga lekeni sikukomile baye. Lelo kwodaha ukumanya ghendo ka nene si munu yehile baye wala sikutendele totso baye. Nene sikutendele lihile lyolyose baye, lekeni ghweghwe konyembela unikome. 12 IMNDEWA yatuhighe ghweghwe na nene. Naye yakuyitsile ghose ghehile ghaubama kunendela, lekeni nene sitsogholosa baye ghumoko ghwangu nikulaghe. 13 Ukumbuke ing'ungo ila ya ghumwande, ilongagha apfino, ‘Kwa imunu yehile gholawa ghehile.’ Apfo nene sitsogholosa baye ghumoko ghwangu nikulaghe. 14 Lelo mfalume wa Isiraeli kalawa yamuwinze nani? Angu nani iyomuwinza? Komuwinza yumbwa iyafile au komuwinza ndana? 15 Lelo IMNDEWA yawe mlamtsi wetu, yatuhighe nene na ghweghwe. Yeye yalilole alino, yanyamile na yanikombole kulawa mna ghamoko ghako."

16 Daudi hayamalitse ukulonga, Sauli kalonga, "Angu alino litsi lyako mwanangu Daudi?" Baho Sauli katula ndilo. 17 Kuya kamlongela Daudi, "Ghweghwe kunogha kubita nene, kwaapfila kunendela ghanoghile lekeni nene nikutendela ghehile. 18 Leloli kunangusa apfila ghweghwe pfaunoghile kuna nene, hata ka IMNDEWA kanyika mna ghamoko ghako, ghweghwe ng'unikomile baye. 19 Angu munu yang'amghogha imunu iyomwihila, pfihi katsomlekelela pfipfino hela? IMNDEWA yakulihe kwa alila lyaunendele leloli. 20 Lelo nomanya ghendo ka ghweghwe kutsakuwa mfalume wa Isiraeli, na ufalume wa Isiraeli utsakwima ghoya mna ghamoko ghako. 21 Lelo wilahe kwa IMNDEWA ka ng'utsowakoma baye iwanu wa lweleko lwangu, na ng'utsolitenda baye taghwa lyangu lihupe mna ilukolo lwa aba wangu." 22 Apfo Daudi kelaha hambele ha Sauli. Kuya Sauli koya ukaye yake, lekeni Daudi na iwanu wake waghenda kwipfisa kuna ghamadagho.