1 Kuya Samweli kawalongela Waisiraeli wose, "Nighategheletsa ghose ghamnongele, na nene nimwing'ani mfalume. 2 Lelo mwinaye imfalume wa kuwalongotsa. Nene nilala na nina mvi, na iwanangu wamale wahamwe namwe. Niwa chilongotsi wenu kulawa haning'ali msongolo mbaka leloli. 3 Nene na ahano, ka nenda lyolyose lihile, mlonge hambele ha IMNDEWA na hambele ha imfalume wake iyamsaghule. Apfi niboka ng'ombe au chihongwe wa imunu wowose? Pfihi nimghutsukila munu wowose? Pfihi nimdununza munu wowose? Angu nibokela hongo kulawa kwa munu wowose ili ndeke kuhigha ghoya? Yalonge na nene nitsomuyitsila."

4 Iwanu wamwidika, "Mbe, ng'utughutsukile baye, wala ng'utudununze, wala ng'usolile baye chinu chochose kulawa kwa munu wowose."

5 Samweli kawedika, "IMNDEWA ka mkalangama wenu na mfalume wake iyamsaghule ka mkalangama ka mmbona nahela chinu chihile chanendile." Nawo wamwidika, "Yeye yuyo imkalangama."

6 Samweli kaghendelela ukulonga, "IMNDEWA yuyo iyamsaghule Musa na Aruni na kuwalapfa wahenga wenu mna isi ya Misiri. 7 Lelo mwime baho hamli nene niwalonge mwemwe hambele ha IMNDEWA, kwa kuwalogela tsimbuli tsa ghamatendo ghake ighanoghile ghayatendile ili yawakombole mwemwe na iwahenga wenu. 8 Yakobu na iwanu wa ikaye yake hawaghendile Misiri, na Wamisiri hawawadununze mwemwe, wahenga wenu wamlilila IMNDEWA, naye kawatuma Musa na Aruni nawo wawalapfa iwahenga wenu mna isi ya Misiri na kuwatenda mkale mna isi aino. 9 Lekeni wawo wamsemwa IMNDEWA, Imulungu wawo, naye kawaghela mna ghamoko gha Sisera, imkulu wa maasikali wa Hazori, na mna ghamoko gha Wafilisti na mna ghamoko gha mfalume wa Moabu. Iwanu wa tsiisi atso tsawetowa na iwabala wenu na kuwahuma. 10 Iwahenga wenu wamlilila IMNDEWA, walonga, ‘Tutenda nzambi kwa kukuleka ghweghwe IMNDEWA, na kwa kutumikila milungu ya Mabaali na Maashitaroti. Lelo tukombole na awala iwotuhila twetwe, na twetwe tutsokutumikila ghweghwe!’ 11 Na IMNDEWA kawatuma Yerubaali, Baraka, Yefta, na hambele kanituma nene Samweli, ili chila yumwe wetu yawakombole kulawa mna iwanu iwowahila iwawatsunguluke, namwe tsamkala bila ukwitowa. 12 Lekeni hammwonile mfalume Nahashi wa Waamoni katsa kuwatowa, mumlema IMNDEWA iyali mfalume wenu, mnongela, ‘Baye! Twombama mfalume yatulongotse.’ 13 Lelo mfalume yamwisaghulile ayuno ahano. Tsamumlomba IMNDEWA yamwing'eni mfalume, naye kamwing'eni. 14 Mng'ampfuka IMNDEWA na kumtumikila yeye, na kumtegheletsa achila chayolonga, bila kuleka kughakinda malaghitso ghake, mwemwe hamwe na mfalume iyowalongotsani mng'amuwinza IMNDEWA, Imulungu wenu, mtsobweda. 15 Lekeni ka ng'amumtegheletsa IMNDEWA, na mwoleka ukukinda malaghitso ghake, yeye katsowadununza ka pfayawadununze iwahenga wenu. 16 Lelo mwime na mwone kwa nenge tsenu chinu chikulu IMNDEWA chayatsochitenda hambele henu. 17 Apfi sambi si msimu ghwa chiyangatsi baye, msimu wa ukupfuna ingano? Lekeni nene nitsomlomba IMNDEWA yaghale ladu na imvula. Namwe mtsotanga na ukwona ghehile ghenu ghamtendile pfaghali makulu hambele ha IMNDEWA kwa ukwibamila wenyegho mfalume."

18 Kuya Samweli kamlomba IMNDEWA, na mna litsuwa lilyo IMNDEWA katuma ladu na mvula. Iwanu wampfuka ng'ani IMNDEWA na Samweli. 19 Apfo wamlongela Samweli, "Chonde chonde, tulombele twetwe watumighwa wako kwa IMNDEWA, Imulungu wako, tuleke kufa, kwaapfila tutotsa ng'ani kwa ukwibamila wenyegho imfalume."

20 Samweli kawedika, "Mleke ukupfuka, hata ka mtenda ghehile ghose aghano, mleke ukuleka kumuwinza IMNDEWA, lekeni mtumikileni kwa ghumoyo ghwenu ghose. 21 Mleke kuiwinza milungu ya ughutsu ilihela chinu wala ng'aidaha baye ukuwakombola, kwaapfila ng'aidaha baye kuwapfila. 22 Kwa taghwa lyake kulu, IMNDEWA ng'atsowaleka baye iwanu wake kwaapfila pfimnoghela IMNDEWA kuwatenda mwemwe muwe iwanu wake. 23 Kuna nene ng'aitsolawila ghendo baye nimtendelele nzambi IMNDEWA kwa kuleke kuwalombelani mwemwe. Nitsoghendelela kuwalangulitsa nzila inoghile na igholoke. 24 Lelo mwemwe mumpfuke IMNDEWA na kumtumikila pfinoghile kwa ghumoyo ghwenu ghose. Mleke kwisemwa aghala ghamakulu ghayawatendeleni. 25 Lekeni mng'aghendelela ukutenda ghehile, mtsohupa ghendo mwemwe na mfalume wenu."